ក្រសួង​មហាផ្ទៃ​គ្រោង​ចុះ​ពិនិត្យ​ជនជាតិ​ម៉ុងតាញ៉ា​​១៣​នាក់​​នៅ​រតនគិរី

មន្ត្រី​នាំ​ពាក្យ​ក្រសួង​មហាផ្ទៃ លោក ខៀវ សុភ័គ បញ្ជាក់​កាល​ពី​យប់​ថ្ងៃ​ទី​២៤ វិច្ឆិកា ថា លោក​នឹង​បញ្ជូន​ក្រុម​ការងារ​របស់​លោក​ចុះ​ទៅ​ពិនិត្យ​ផ្ទាល់​ពី​ស្ថានភាព​របស់​ជនជាតិ​ចារ៉ាយ​វៀតណាម ដែល​គេ​ហៅ​ថា ម៉ុងតាញ៉ា ១៣​នាក់ ដែល​បាន​ភៀស​ខ្លួន​មក​ពី​ខេត្ត​ភាគ​កណ្តាល​ប្រទេស​វៀតណាម។

លោក​បន្ត​ថា ការ​ពិនិត្យ​នេះ​ដើម្បី​វាយ​តម្លៃ​ថា តើ​មនុស្ស​ទាំង ១៣​នាក់ នោះ​ជា​ជន​ភៀស​ខ្លួន​ពិត​ប្រាកដ៖ «ខ្ញុំ​នៅ​មិន​ទាន់​ទទួល​ព័ត៌មាន​នេះ​ជា​ផ្លូវការ​នៅ​ឡើយ​ទេ ប៉ុន្តែ​ជា​គោលការណ៍ ព្រោះ​ថា រឿង​នេះ​មិន​មែន​ជា​រឿង​ថ្មី​ទេ ពីព្រោះ​កើត​ឡើង​តាំង​ពី​ឆ្នាំ​២០០០ ម្ល៉េះ ហើយ​យើង​ក៏​បាន​ចាត់​ចែង​រក​ប្រទេស​ទី​៣ ឲ្យ​ទៅ​រស់​នៅ​រាប់​ពាន់​នាក់ ជនជាតិ​ចារ៉ាយ​នេះ។ យើង​ត្រូវ​ចុះ​ទៅ​ពិនិត្យ​ហើយ ថា​តើ​គាត់​ជា​ជនភៀសខ្លួន​មែន​ទែន ឬ​មិន​មែន»

​អ្នក​ភូមិ​ជនជាតិ​ដើម​ភាគ​តិច​ម្នាក់​ដែល​សុំ​មិន​បញ្ចេញ​ឈ្មោះ រស់​នៅ​ខេត្ត​រតនគិរី ជាប់​ព្រំដែន​ប្រទេស​វៀតណាម ឲ្យ​ដឹង​ថា ជនភៀសខ្លួន​ចារ៉ាយ​វៀតណាម​ទាំង​នេះ កំពុង​មាន​ជំងឺតម្កាត់ ខ្វះខាត​ស្បៀង​អាហារ ជាពិសេស​អាជ្ញាធរ​វៀតណាម កំពុង​តាម​ចាប់​ខ្លួន​ពួកគេ។

លោក​បន្ត​ថា លោក​នឹង​ទាក់ទង​ជាមួយ​សមាគម​សិទ្ធិ​មនុស្ស​អាដហុក (Adhoc) ឲ្យ​ជួយ​ដោះស្រាយ ដោយសារ​តែ​អាជ្ញាធរ​មូលដ្ឋាន​មិន​ហ៊ាន​ធ្វើ​អន្តរាគមន៍៖ «ខ្ញុំ​បាន​ជួប​ផ្ទាល់ ខ្ញុំ​សួរ​ម្នាក់​ពីរ​នាក់​ដែរ​គាត់​ថា គេ​ជិះជាន់​សង្កត់សង្កិន​គាត់ មិន​ឲ្យ​គោរព​ជំនឿ​សាសនា​របស់​គាត់។ អាជ្ញាធរ​វៀតណាម ចាប់​ដាក់​គុក និង​វាយ​ធ្វើ​បាប។ មាន​ម្នាក់​ត្រូវ​ជាប់​គុក​ម្តង​ជា​ពីរ​ដង​រួច​ហើយ និង​ត្រូវ​គេ​វាយ​ឈាម​មុខ​ឈាម​មាត់»

​បុរស​ជនជាតិ​ភាគ​តិច​ដដែល​នេះ​បន្ត​ថា ជនជាតិ​ដើម​ចារ៉ាយ​នេះ​មាន​ពីរ​ក្រុម។ ក្រុម​ទី​១ មាន​គ្នា ៨​នាក់ បាន​រត់​ចេញ​ពី​ប្រទេស​វៀតណាម កាល​ពី​បី​សប្ដាហ៍​មុន និង​មួយ​ក្រុម​ទៀត​មាន​គ្នា​បី​នាក់ បាន​រត់​ចេញ​ពី​ភូមិ​កំណើត​ចូល​មក​លាក់​ខ្លូន​ក្នុង​ព្រៃ​ខេត្ត​រតនគិរី កាល​ពី​ចុង​សប្តាហ៍​មុន ដើម្បី​ភៀស​ខ្លួន​ចេញ​ពី​ការ​ធ្វើ​ទុក្ខបុកម្នេញ​របស់​អាជ្ញាធរ​វៀតណាម លើ​បញ្ហា​ជំនឿ​សាសនា។

រដ្ឋាភិបាល​កម្ពុជា បាន​បិទ​ជំរំ​ជនភៀសខ្លួន​ម៉ុងតាញ៉ា របស់​អង្គការ​សហប្រជាជាតិ​ទទួល​បន្ទុក​ជន​ភៀសខ្លួន​នៅ​ក្នុង​រាជធានី​ភ្នំពេញ ជា​ផ្លូវ​ការ​កាល​ពី​ថ្ងៃ​ទី​១៥ ខែ​កុម្ភៈ ឆ្នាំ​២០១១។ នៅ​ពេល​នោះ ជនភៀសខ្លួន​មួយ​ចំនួន​បាន​ទទួល​សិទ្ធិ​ជ្រកកោន​នៅ​ក្នុង​ប្រទេស​ទី​៣ រួម​មាន​ប្រទេស​កាណាដា ជា​ដើម ហើយ​ខ្លះ​ទៀត ត្រូវ​បាន​រដ្ឋាភិបាល​កម្ពុជា បញ្ជូន​ពួកគេ​ត្រឡប់​ទៅ​ប្រទេស​វៀតណាម​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។