បន្ទាប់ពីរាជរដ្ឋាភិបាលកម្ពុជា បានដាក់ឱសានវាទ ៣ខែ សម្រាប់ការិយាល័យឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ចាត់ចែងបញ្ជូនជនភៀសខ្លួនវៀតណាម ជាង ២០០នាក់ ដែលកំពុងឋិតក្រោមការគ្រប់គ្រង និងឃ្លាំមើលពីអង្គការនេះ ឲ្យវិលត្រឡប់ទៅប្រទេសវៀតណាម វិញនោះ គឺពេលនេះ មានជនភៀសខ្លួន ១៧នាក់ទៀតបានស្ម័គ្រចិត្តវិលត្រឡប់ទៅលំនៅឋានវិញ។
រថយន្តសារ៉ែនឲ្យសញ្ញាភ្លើងក្រហមនៃអគ្គនាយកដ្ឋានអន្តោប្រវេសន៍ បានបើកនាំមុខក្បួនរថយន្តដឹកជញ្ជូនជនភៀសខ្លួនម៉ុងតាញ៉ាវៀតណាម ១៧នាក់ ចាកចេញពីក្រុងបានលុង ខេត្តរតនគិរី ឆ្ពោះទៅច្រកទ្វារព្រំដែនអន្តរជាតិស្រុកអូរយ៉ាដាវ ខេត្តរតនគិរី ដើម្បីបំពេញបែបបទឲ្យពួកគេឆ្លងព្រំដែនទៅស្រុកកំណើតវិញ កាលពីព្រឹកថ្ងៃទី២៤ ខែវិច្ឆិកា។
ម៉ុងតាញ៉ា ទាំង ១៧នាក់ មាន ១៤នាក់ជាមនុស្សពេញវ័យ និង ៣នាក់ជាកុមារ។ ពួកគេចេញដំណើរពីភ្នំពេញ អមដំណើរដោយក្រុមការងារការិយាល័យ យូ.អិន.អេច្ឆ.ស៊ី.អា បានមកដល់ក្រុងបានលុង នៅរសៀលថ្ងៃទី២៣ ខែវិច្ឆិកា ហើយស្នាក់នៅសណ្ឋាគារសុវណ្ណគិរី មួយយប់ មុននឹងចេញដំណើរបន្តទៅតំបន់ច្រកទ្វារព្រំដែនដោយមិនឆ្លងកាត់ការត្រួតពិនិត្យពីអាជ្ញាធរខេត្តរតនគិរី ឡើយ។
មន្ត្រីការពារសិទ្ធិមនុស្សសមាគមអាដហុក ខេត្តរតនគិរី លោក ឆាយ ធី កត់សំគាល់ថា នេះជាដំណើរមាតុភូមិនិវត្តន៍ក្រុមទី៦ ខណៈជនភៀសខ្លួនម៉ុងតាញ៉ាវៀតណាម ៥ក្រុម ត្រូវបានបញ្ជូនចេញតាមច្រកទ្វារព្រំដែនស្រុកអូរយ៉ាដាវ ចាប់ពីខែកក្កដា ឆ្នាំ២០១៥ មក។ លោក ឆាយ ធី ហៅការចាប់បញ្ជូននេះថា ជាការបរាជ័យក្នុងការស្វែងរកសិទ្ធិជ្រកកោនផ្នែកនយោបាយនៃជនភៀសខ្លួនម៉ុងតាញ៉ា ទាំងនោះចាប់ពីចុងឆ្នាំ២០១៤ រហូតបច្ចុប្បន្ន៖ «កន្លងមកគាត់មកក្នុងនាមសុំសិទ្ធិជ្រកកោនផ្នែកនយោបាយ ដោយគាត់ចាត់ទុកប្រទេសគាត់មានការកៀបសង្កត់ ធ្វើទុក្ខបុកម្នេញផ្នែកជំនឿសាសនា ហើយគាត់មានបំណងទៅប្រទេសទី៣ ប៉ុន្តែដោយសារគាត់រង់ចាំយូរហើយមិនទទួលបានលទ្ធផល ធ្វើឲ្យផ្លាស់ប្ដូរគំនិត បែរជាសុំធ្វើម៉េចឲ្យពួកគាត់បានវិលត្រឡប់ទៅប្រទេសកំណើតវិញ»។
ចាប់ពីខែកក្កដា រហូតមកដល់បច្ចុប្បន្ន មានក្រុមម៉ុងតាញ៉ា ៥ក្រុម មានគ្នាសរុប ៧៧នាក់ បានស្ម័គ្រចិត្តវិលត្រឡប់ទៅប្រទេសវៀតណាមវិញ ក្នុងនោះបីក្រុមមានគ្នា ៤២នាក់ ចាកចេញពីប្រទេសថៃ និងពីរក្រុមទៀតមានគ្នា ៣៥នាក់ ចាកចេញពីក្រុងភ្នំពេញ។ នេះមិនរាប់បញ្ចូលក្រុមមានគ្នា ១៧នាក់ដែលទើបបញ្ជូនចេញនៅថ្ងៃទី២៤ ខែវិច្ឆិកា នេះនៅឡើយ។
តំណាងការិយាល័យ យូ.អិន.អេច្ឆ.ស៊ី.អា អ្នកស្រី វីវៀន តាន់ បញ្ជាក់តាមសារអេឡិចត្រូនិក ឆ្លើយតបទៅនឹងសំណួរវិទ្យុអាស៊ីសេរី ស្ដីពីហេតុផលនៃការបញ្ជូនជនភៀសខ្លួនវិលត្រលប់ទៅប្រទេសវៀតណាមវិញ ចាប់ពីខែកក្កដា ថា គឺជាការស្ម័គ្រចិត្តរបស់ម៉ុងតាញ៉ា ទាំងនោះ។ ដូចគ្នានេះដែរ តាមរយៈសារអេឡិចត្រូនិក នៅថ្ងៃទី២៤ ខែវិច្ឆិកា អ្នកស្រីបញ្ជាក់បន្ថែមថា ជនភៀសខ្លួន ១៧នាក់ថ្មីនេះ បានស្នើសុំឲ្យ យូ.អិន.អេច្ឆ.ស៊ី.អា ជួយពួកគេក្នុងការវិលត្រឡប់ដោយស្ម័គ្រចិត្តនេះដែរ។
ម៉ុងតាញ៉ា ម្នាក់ក្នុងចំណោមម៉ុងតាញ៉ា ១៧នាក់ ដែលវិទ្យុអាស៊ីសេរី សាកសួរនៅមុនពេលចេញដំណើរពីក្រុងបានលុង ក្រោមការឃ្លាំមើលពីមន្ត្រី យូ.អិន.អេច្ឆ.ស៊ី.អា បញ្ជាក់យ៉ាងខ្លីថា ពួកគេពិតជាស្នើសុំវិលត្រឡប់ទៅស្រុកកំណើតវិញ ក៏ប៉ុន្តែនិយាយដោយប្រយ័ត្នប្រយែងពីហេតុផលនៃការវិលត្រឡប់ ដោយគាត់អះអាងថា ដោយសារនឹករលឹកភូមិកំណើត និងក្រុមគ្រួសារ៖ «វិលត្រឡប់ទៅផ្ទះវិញ ព្រោះនឹកផ្ទះនៅស្រុកជីបប្រុង ខេត្តយ៉ាឡាយ ខ្ញុំមកនេះបីខែកន្លះគ្មានអ្នកណាចាប់បង្ខំឡើយ»។
រាជរដ្ឋាភិបាលកម្ពុជា ដាក់ឱសានវាទថ្ងៃទី១០ ខែមករា ឆ្នាំ២០១៦ សម្រាប់ការបញ្ជូនជនភៀសខ្លួនម៉ុងតាញ៉ា ជាង ២០០នាក់ ដែលកំពុងរស់នៅដោយខុសច្បាប់នៅក្រុងភ្នំពេញ បន្ទាប់ពីពួកគេរត់ភៀសខ្លួនពីភាគកណ្ដាលប្រទេសវៀតណាម កាលពីចុងឆ្នាំ២០១៤ ដើម្បីស្វែងរកសិទ្ធិជ្រកកោនផ្នែកនយោបាយ ប៉ុន្តែក្រសួងមហាផ្ទៃ ចាត់ទុកពួកគេជាជនអន្តោប្រវេសន៍ខុសច្បាប់។ ដោយឡែកម៉ុងតាញ៉ា ១៣នាក់ទៀតដែលនាយកដ្ឋានជនភៀសខ្លួនទទួលស្គាល់ចុះបញ្ជីកំណត់អត្តសញ្ញាណជាជនភៀសខ្លួន ក៏រដ្ឋាភិបាលកំណត់ឱសានវាទត្រឹមថ្ងៃទី៦ ខែកុម្ភៈ ឲ្យ យូ.អិន.អេច្ឆ.ស៊ី.អា បញ្ជូនពួកគេត្រឡប់ទៅប្រទេសវៀតណាម វិញ ប្រសិនមិនមានប្រទេសទី៣ ទទួលយកពួកគេ។
ទោះជាយ៉ាងណាក៏ដោយ ជនភៀសខ្លួនដែលស្ម័គ្រចិត្តត្រឡប់ទៅវិញ ត្រូវបានមន្ត្រី យូ.អិន.អេច្ឆ.ស៊ី.អា អះអាងថា នឹងទៅសួរសុខទុក្ខពួកគេតាមអនុស្សរណៈស្ដីពីការបញ្ជូនជនភៀសខ្លួនត្រឡប់ទៅប្រទេសដើមវិញ ត្រូវការពារដោយច្បាប់ ដូចប្រជាពលរដ្ឋទូទៅដែរ ដោយគ្មានការយកទោសពៃរ៍ដែល យូ.អិន.អេច្ឆ.ស៊ី.អា រដ្ឋាភិបាលកម្ពុជា និងរដ្ឋាភិបាលវៀតណាម បានចុះហត្ថលេខាទទួលស្គាល់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។