លោកស្រី ហ៊ាន សុខុម ភរិយាលោក មួន ទឹម ហៅ ញ៉ន អតីតមេប៉ុស្តិ៍បរថ្មី មានប្រសាសន៍នៅថ្ងៃទី៩ មេសា ថា ក្រៅពីប្ដីរបស់លោកស្រីត្រូវបានស្នងការនគរបាលខេត្តប៉ៃលិន បញ្ចប់ពីតួនាទី និងដាក់ឲ្យស្ថិតក្រោមការតាមដានតាមរយៈបង្ខំឲ្យចុះហត្ថលេខាទទួលកំហុសក្នុងមួយថ្ងៃបួនដង ជារៀងរាល់ថ្ងៃ។
បន្ថែមលើនេះ លោកស្រីអះអាងថា បច្ចុប្បន្ននេះ ក្រុមគ្រួសាររបស់លោកស្រីត្រូវបានមេបញ្ជាការរងនគរបាលវរព្រំដែន៨២១ លោក អែម ជាតិ គំរាមប្ដឹងចាប់ដាក់គុក ប្រសិនបើគ្រួសារមួយនេះនៅតែបន្តធ្វើកសិកម្មជាបន្តទៀតនោះ៖ «ហើយអ្នកជិតខាងគេដាំបាន។ ចំណែកតែខ្ញុំមួយប្រឡោះកណ្ដាលហ្នឹង គេអត់ឲ្យដាំ។ គេខឹងកាច់កុងប្ដីហ្នឹងអ្ហា ថាបក់ខោអាវខោអី ដល់ពេលវាមិនទាន់នេះ ធ្វើបាបដល់ខ្ញុំទៀតថា គ្រួសារហ្នឹងធ្វើឲ្យដាច់ខ្យល់ កុំឲ្យបានលុយបានអី។ អ៊ីចឹងទេ ឲ្យជំពាក់គេទៅ ឲ្យទៅយកដីភូមិដីអីអ៊ីចឹងអ្ហា គេធ្វើដើម្បីអ៊ីចឹង»។
លោកស្រី ហ៊ាន សុខុម បន្តថា ដី ៥ហិកតារ ដែលក្រុមគ្រួសាររបស់ខ្លួនកាន់កាប់តាំងពីឆ្នាំ២០០៨ មក នៅពេលនេះគឺពុំអាចធ្វើអ្វីបានឡើយ ក្រោយពីប្ដីរបស់លោកស្រីត្រូវរងការចោទប្រកាន់ ថាបានដឹកនាំអ្នកយកព័ត៌មានវិទ្យុអាស៊ីសេរី ថតបង្គោលព្រំដែនកម្ពុជា-ថៃ លេខ៦៤ និងរស់នៅលើដំបន់ស។ ក៏ប៉ុន្តែ លោកស្រីអះអាងថា ចំណែកដីជាច្រើនគ្រួសារផ្សេងទៀតនៅហ៊ុមព័ទ្ធជុំវិញនោះ អាចធ្វើកសិកម្មបាន ដោយពុំមានការរារាំងឡើយ។
ទាក់ទិនបញ្ហានេះ អតីតមេប៉ុស្តិ៍បរថ្មី នៃសង្កាត់បរយ៉ាខា លោក មួន ទឹម ហៅ ញ៉ន ត្រូវបានស្នងការនគរបាលខេត្តប៉ៃលិន បញ្ចប់ពីតួនាទីកាលពីចុងខែមីនា និងកំពុងរឹតបន្តឹងសិទ្ធិសេរីភាព ដែលអាចប្រឈមនឹងការជាប់ពន្ធនាគារ។ មូលហេតុដែលឈានដល់ការដកហូតតួនាទីនេះ កើតឡើងក្រោយពីលោកត្រូវគេរកឃើញថា មានជាប់ពាក់ព័ន្ធនឹងបញ្ហាព្រំដែន និងរស់នៅលើដីតំបន់ស តាមព្រំដែនកម្ពុជា-ថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។