មន្ត្រីសម្របសម្រួលសមាគមអាដហុក ខេត្តរតនគិរី លោក ឆាយ ធី នៅថ្ងៃអាទិត្យ ទី២១ ខែមេសា ឆ្នាំ២០១៣ សំដែងក្ដីបារម្ភពីសុវត្ថិភាពផ្ទាល់ខ្លួន ដែលអាចប្រឈមមុខទៅនឹងការចោទប្រកាន់ក្នុងបទឧក្រិដ្ឋ។
សេចក្ដីព្រួយបារម្ភនេះកើតមានឡើង បន្ទាប់ពីមន្ត្រីអាជ្ញាធរមូលដ្ឋានស្រុកអូរយ៉ាដាវ បានបើកការស៊ើបអង្កេតមួយទៅលើប្រជាពលរដ្ឋសហគមន៍ភូមិឡំ ឃុំប៉ក់ញ៉ៃ កាលពីថ្ងៃទី២០ ខែមេសា ឆ្នាំ២០១៣ បន្ទាប់ពីមន្ត្រីឃ្លាំមើលសិទ្ធិមនុស្សរូបនេះបានជួបប្រជុំជាមួយតំណាងសហគមន៍ភូមិឡំ ហើយត្រូវបានមន្ត្រីមូលដ្ឋានរាយការណ៍ថា លោកញុះញង់ប្រជាពលរដ្ឋ។
លោក ឆាយ ធី បញ្ជាក់ថា លោកត្រូវមន្ត្រី និងសមត្ថកិច្ចស្រុកអូរយ៉ាដាវ ទូរស័ព្ទសាកសួរពីបញ្ហានេះ ហើយលោកក៏ទទួលបានព័ត៌មានថា ក្នុងកិច្ចប្រជុំថ្នាក់ខេត្តកាលពីថ្ងៃទី១៩ ខែមេសា អាជ្ញាធរខេត្តបានលើកចំឈ្មោះលោកថា កំពុងប្រឆាំងនឹងរាជរដ្ឋាភិបាល។
លោកបន្តថា ការចោទប្រកាន់នេះមានលក្ខណៈប្រមាថធ្ងន់ធ្ងរខុសពីការពិតដែលលោកមិនបានប្រព្រឹត្តកំហុសអ្វីឡើយ៖ «ប្រភពហ្នឹងប្រជុំនៅសាលាខេត្ត មានស្រុកទាំង ៩ ចូលរួម។ ប្រសិនបើមែន វាជារឿងធ្ងន់ធ្ងរសម្រាប់ខ្ញុំ ថាខ្ញុំប្រឆាំងរដ្ឋាភិបាលហ្នឹង»។
ឆ្លើយតបបញ្ហានេះ អធិការនគរបាលស្រុកអូរយ៉ាដាវ លោក ម៉ា វិចិត្រ មានប្រសាសន៍បញ្ជាក់ថា អាជ្ញាធរស្រុកបានបញ្ចប់ការស៊ើបអង្កេតហើយរកឃើញថា លោក ឆាយ ធី មិនបានញុះញង់អ្នកភូមិនោះឡើយ។
លោកបន្តថា លោក ឆាយ ធី បានជួបប្រជុំជាមួយតំណាងសហគមន៍ដោយមិនបានជូនដំណឹងមកអាជ្ញាធរមូលដ្ឋាន ទើបមានពាក្យចចាមអារ៉ាមថា ការប្រជុំនោះមានការញុះញង់៖ «ប្រជាពលរដ្ឋហ្នឹងឆ្លើយដូចលោក ឆាយ ធី ដែរ ថាគាត់មិនបានញុះញង់ទេ។ គាត់ថា ប្រសិនជាមានការរំលោភដីធ្លីពីសំណាក់ណាមួយនោះ គឺឲ្យមានការប្ដឹងតវ៉ា ដាក់ញត្តិទៅតាមនីតិវិធីច្បាប់ ចៀសវាងប្រើអំពើហិង្សា»។
ចំណែកអភិបាលខេត្តរតនគិរី លោក ប៉ាវ ហមផាន មានប្រសាសន៍បញ្ជាក់ដែរថា អាជ្ញាធរខេត្តមិនបានចោទប្រកាន់លោក ឆាយ ធី អ្វីនោះទេ ប៉ុន្តែលោកព្រមានថា ប្រសិនសកម្មជនការពារសិទ្ធិមនុស្សមួយនេះប្រឆាំងរដ្ឋាភិបាលមែន អាជ្ញាធរខេត្តនឹងចាត់វិធានការផ្លូវច្បាប់៖ «អត់មាននរណាចោទទេ បើមានការធ្វើមែន មានការប្រឆាំងមែន អាហ្នឹងប្រុងខ្លួនទៅ»។
កាលពីរសៀលថ្ងៃទី២០ ខែមេសា ឆ្នាំ២០១៣ តំណាងសហគមន៍ភូមិឡំ ចំនួនបីនាក់ ត្រូវបានមន្ត្រីប៉ូលិសរដ្ឋបាលឃុំប៉ក់ញ៉ៃ អញ្ជើញមកបំភ្លឺពីខ្លឹមសារនៃការប្រជុំរវាងមន្ត្រីការពារសិទ្ធិមនុស្ស និងប្រជាពលរដ្ឋ បន្ទាប់ពីអាជ្ញាធរស្រុក មានប៉ូលិស និងកងរាជអាវុធហត្ថ បានអញ្ជើញប្រជាពលរដ្ឋក្នុងភូមិឡំ ប្រមាណ ១០០នាក់ ដើម្បីស្រាវជ្រាវករណីនេះដូចគ្នាកាលពីព្រឹកថ្ងៃដដែល។
តំណាងសហគមន៍ លោក សេវ ញ៉ត មានប្រសាសន៍បញ្ជាក់ថា អ្នកភូមិកំពុងមានបញ្ហារំលោភឈូសឆាយយកដីពីក្រុមហ៊ុនសម្បទាន គ្លបល ធិច រ៉ាម៉ា ខ្មែរអន្តរជាតិ និងមិត្តភាព ម៉ែន សារុន (Global Tceh Sdn.,Bhd Rama Khmer International and Men Sarun Friendship) ទើបសួរយោបល់ពីមន្ត្រីសិទ្ធិមនុស្សជួយរកដំណោះស្រាយ។
លោកបន្តថា អ្នកភូមិកំពុងព្រួយបារម្ភពីបញ្ហាបាត់បង់ដីធ្លី ហើយអ្នកភូមិមិនហ៊ានប្រឹក្សាបញ្ហានេះជាមួយមន្ត្រីអាជ្ញាធរមូលដ្ឋាន ដោយសារមន្ត្រីមូលដ្ឋានអមដោយកងកម្លាំងចូលមកក្នុងភូមិគួរឲ្យភ័យខ្លាច៖ «មកប្រជុំនិយាយពីដីធ្លី ការដោះស្រាយមិនចាំបាច់យកមកប៉ូលិស ទាហានអ៊ីចឹងទេ។ ភូមិឡំ ទាំងអស់មានការព្រួយបារម្ភតទៅទៀត។ ផ្សព្វផ្សាយឲ្យអង្គការនានាជួយអន្តរាគមន៍ភូមិឡំ ប៉ុណ្ណឹងបានហើយ»។
កាលពីឆ្នាំ២០០៩ និងឆ្នាំ២០១០ លោក ឆាយ ធី និងសកម្មជនសិទ្ធិមនុស្សពីរនាក់ទៀត គឺលោក ប៉ែន ប៊ុណ្ណារ៍ អតីតអ្នកសម្របសម្រួលសមាគមអាដហុក ខេត្តរតនគិរី និងប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានរងការចោទប្រកាន់តាមផ្លូវតុលាការ ពីបទញុះញង់អ្នកភូមិឲ្យប្រព្រឹត្តអំពើហិង្សាបំផ្លាញទ្រព្យសម្បត្តិអ្នកដទៃ និងញុះញង់ឲ្យមានបទល្មើសឧក្រិដ្ឋប្រឆាំងអាជ្ញាធរមូលដ្ឋាន ក៏ប៉ុន្តែក្រោយការស៊ើបអង្កេត មន្ត្រីតុលាការបានសម្រេចមិនចាត់ការ និងលើកលែងការចោទករណីទាំងអស់នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។