មជ្ឈមណ្ឌលសិទ្ធិមនុស្សកម្ពុជា (CCHR) ប្រកាសអោយអ្នកសារព័ត៌មានចូលរួមក្នុងយុទ្ធនាការលើកកម្ពស់សេរីភាពសារព័ត៌មាននៅកម្ពុជា។
សេចក្ដីប្រកាសព័ត៌មានរបស់មជ្ឈមណ្ឌលសិទ្ធិមនុស្សកម្ពុជា ចុះថ្ងៃទី១២ ខែមេសា បានអំពាវនាវអោយអ្នកសារព័ត៌មានគ្រប់ផ្នែក ចូលរួមប្រកួតប្រជែងក្នុងប្រធានបទ "មានសុវត្ថិភាពក្នុងការនិយាយ" ដែលមានន័យថា ធានានូវសេរីភាពបញ្ចេញមតិសម្រាប់សារព័ត៌មានទាំងអស់។
យុទ្ធនាការនេះ នឹងជ្រើសរើសយកអ្នកសារព័ត៌មានដែលមានសក្ដានុពលចំនួន ២០នាក់ ហើយប្រវត្តិរូបរបស់ពួកគេម្នាក់ៗ នឹងត្រូវបង្ហាញជារៀងរាល់ថ្ងៃនៅលើគេហទំព័ររបស់មជ្ឈមណ្ឌលសិទ្ធិមនុស្សកម្ពុជា និងបណ្ដាញព័ត៌មានសង្គម ចាប់ពីថ្ងៃទី៣ ដល់ថ្ងៃទី២២ ខែឧសភា។ មជ្ឈមណ្ឌលសិទ្ធិមនុស្ស បានបញ្ជាក់ថា អ្នកសារព័ត៌មានដែលបានជ្រើសរើស នឹងចូលរួមប្ដេជ្ញាចិត្តក្នុងការបញ្ជូនព័ត៌មានត្រឹមត្រូវ ជាពិសេសពាក់ព័ន្ធនឹងសិទ្ធិមនុស្ស លទ្ធិប្រជាធិបតេយ្យនយោបាយ អភិបាលកិច្ចល្អ និងបញ្ហាសង្គម។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា អ្នកសារព័ត៌មាននៅកម្ពុជា បានបំពេញការងារដែលប្រកបដោយគ្រោះថ្នាក់ ក្នុងការបំពេញវិជ្ជាជីវៈរបស់ខ្លួនក្នុងនាមជាអ្នកសារព័ត៌មានឯករាជ្យ។ ប៉ុន្តែ ជាទូទៅ ពួកគេមិនត្រូវបានសង្គមលើកទឹកចិត្តឡើយ៖ «អ្នកសារព័ត៌មាន គាត់ប្រឈមនឹងការរើសអើងពីសង្គមផង ពីអ្នកមានអំណាចផង។ ហើយមានការមើលងាយអីចឹងទៅ។ ខ្ញុំមើលទៅជាជំនាញមួយដែលប្រសើរសម្រាប់សង្គម ដែលសង្គមគួរតែគោរព និងចូលរួមលើកទឹកចិត្តផ្ដល់តម្លៃ ការគោរពស្រឡាញ់ដល់ពួកគាត់ផងដែរ»។
មជ្ឈមណ្ឌលសិទ្ធិមនុស្សកម្ពុជា បញ្ជាក់ថា ការជ្រើសរើស នឹងបិទបញ្ចប់ត្រឹមថ្ងៃទី២៥ ខែមេសា ហើយគម្រោងនេះ គឺជាការចូលរួមអបអរទិវាសេរីភាពសារព័ត៌មានថ្ងៃទី៣ ខែឧសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។