បុគ្គលិក​ឯកជន​មួយ​ចំនួន​ត្រូវ​បាន​គេ​រឹត​បន្តឹង​មិន​ឲ្យ​ចូលរួម​បោះឆ្នោត

បុគ្គលិក​ដែល​បម្រើ​ការ​នៅ​តាម​វិស័យ​ឯកជន​មួយ​ចំនួន ដូច​ជា ក្រុមហ៊ុន សហគ្រាស និង​រោងចក្រ​ជាដើម បាន​បង្ហាញ​ពី​ការ​លំបាក ដោយ​អ្នក​គ្រប់គ្រង​បាន​រឹត​បន្តឹង​បុគ្គលិក​នៅ​ក្រោម​បង្គាប់ មិន​ឲ្យ​ទៅ​ចូលរួម​បោះឆ្នោត ឬ​មិន​បើក​ប្រាក់​ខែ​ឲ្យ​ធ្វើ​ដំណើរ​ទៅ​បោះឆ្នោត​ជាដើម។

0:00 / 0:00

បុគ្គលិក​ដែល​បម្រើ​ការ​នៅ​តាម​ក្រុមហ៊ុន​ឯកជន ជាអាទិ៍ ក្រុមហ៊ុន​ដឹក​សំរាម ស៊ីនទ្រី រោងចក្រ​កាត់​ដេរ និង​វិស័យ​ឯកជន​មួយ​ចំនួន​ទៀត បាន​អះអាង​ថា ថ្នាក់​ដឹកនាំ​មក​ពី​វិស័យ​ទាំង​នេះ មិន​បាន​អនុញ្ញាត​ច្បាប់​ឲ្យ​បុគ្គលិក​បាន​ចេញ​ទៅ​បោះឆ្នោត​នៅ​ថ្ងៃ​ទី២៨ កក្កដា ទេ។

សកម្មភាព​នេះ​បាន​អនុវត្ត​ផ្ទុយ​ពី​សេចក្ដី​ប្រកាស​របស់​ក្រសួង​ការងារ និង​បណ្ដុះ​បណ្ដាល​វិជ្ជាជីវៈ ដែល​សរសេរ​ថា ម្ចាស់ និង​នាយក​រោងចក្រ សហគ្រាស និង​គ្រឹះស្ថាន​ទាំងអស់ ដែល​ស្ថិត​ក្នុង​ដែន​អនុវត្តន៍​នៃ​ច្បាប់​ស្ដីពី​ការងារ ត្រូវ​អនុញ្ញាត​ច្បាប់​ជូន​និយោជិក កម្មករ កម្មការិនី ពី ១​ថ្ងៃ ទៅ ៣​ថ្ងៃ ដើម្បី​ឈប់​សម្រាក និង​បាន​ទៅ​ចូលរួម​បោះឆ្នោត​នៅ​ថ្ងៃ​ទី២៨ កក្កដា ខាង​មុខ។

សេចក្ដី​ជូន​ដំណឹង​របស់​ក្រសួង​ការងារ និង​បណ្ដុះ​បណ្ដាល​វិជ្ជាជីវៈ ដែល​ជា​ការ​ឆ្លើយ​តប​នឹង​សំណើ​របស់ គ.ជ.ប ឲ្យ​ដឹង​ទៀត​ថា ត្រូវ​រក្សា​ប្រាក់​ឈ្នួល និង​ប្រាក់​រង្វាន់​ធ្វើ​ការ​ទៀងទាត់​ជូន​កម្មករ​និយោជិក​នៅ​ដូច​ដើម ដោយ​ពុំ​តម្រូវ​ឲ្យ​បង្ហាញ​ឯកសារ​ពាក់ព័ន្ធ​នានា​នៅ​ពេល​ត្រឡប់​មក​វិញ​ឡើយ។

បុគ្គលិក​ដែល​បម្រើ​ការ​នៅ​ក្រុមហ៊ុន​កាត់​ត​រូបភាព ឬ​ហៅ​កាត់​ជា​ភាសា​អង់គ្លេស​ថា ជី.អេស.ឌី (GSD = Graphic Solution Digital) នៅ​សង្កាត់​ទំនប់ទឹក ខណ្ឌ​ចម្ការមន ដែល​ថ្លែង​ក្នុង​លក្ខខណ្ឌ​សុំ​មិន​បញ្ចេញ​ឈ្មោះ និយាយ​ថា អ្នក​គ្រប់គ្រង​ទូទៅ​មិន​បាន​បើក​សិទ្ធិ​ឲ្យ​បាន​ទូលំទូលាយ​សម្រាប់​បុគ្គលិក នៅ​ខេត្ត​ឆ្ងាយៗ​បាន​ចេញ​ទៅ​បោះឆ្នោត​ទេ។ លើស​ពី​នេះ​ទៀត ក្រុមហ៊ុន​ដែល​មាន​សាខា​នៅ​ប្រទេស​ថៃ ហើយ​នាំ​ផលិត​ផល​សម្រេច​របស់​ខ្លួន​ពី​ប្រទេស​កម្ពុជា នាំ​ទៅ​សហភាព​អឺរ៉ុប ផង​នោះ នឹង​ពុំ​បាន​បើក​លុយ​ឲ្យ​បុគ្គលិក​ជាង ២០០​នាក់ ដើម្បី​អាច​មាន​លទ្ធភាព​បាន​ទៅ​បោះឆ្នោត​ដូច​ពលរដ្ឋ​ដទៃ​ទៀត​ឡើយ។

បដិសេធ​នឹង​ការ​ចោទ​ប្រកាន់​នេះ ប្រធាន​ចាត់​ការ​ទូទៅ​ប្រចាំ​ប្រទេស​កម្ពុជា នៃ​ក្រុមហ៊ុន ជី.អេស.ឌី អះអាង​ថា លោក​បាន​បើក​សិទ្ធិ​យ៉ាង​ទូលំទូលាយ​សម្រាប់​បុគ្គលិក​ដែល​បម្រើ​ការ​នៅ​ក្រុមហ៊ុន​កាត់​ត​រូបភាព​មួយ​នេះ។

ទន្ទឹម​នឹង​នេះ ក្រុមហ៊ុន​សន្តិសុខ​ឈ្មោះ ហ្គុបល សិកឃ្យូរិទ្ធី ស៊ូលូសិន (Global Security Solution) ត្រូវ​បាន​បុគ្គលិក​សន្តិសុខ​ទម្លាយ​ឲ្យ​ដឹង​ថា អ្នក​គ្រប់គ្រង​ទូទៅ​បាន​រារាំង​មិន​ឲ្យ​ពួក​គេ​បាន​ចេញ​ទៅ​បោះឆ្នោត​នៅ​ថ្ងៃ​ទី២៨ កក្កដា ខាង​មុខ​នេះ​ដែរ។

ក៏ប៉ុន្តែ បញ្ហា​នេះ​ត្រូវ​បាន​អ្នក​គ្រប់គ្រង​ផ្នែក អាយ.កូម (I com) របស់​ក្រុមហ៊ុន​សន្តិសុខ ហ្គុបល សិកឃ្យូរិទ្ធី ស៊ូលូសិន លោក ឈុន តុលា បដិសេធ​ការ​ចោទ​ប្រកាន់​នេះ ដោយ​ចាត់​ទុក​ថា លោក​មិន​ព្រងើយ​កន្តើយ​នោះ​ឡើយ។ លោក​អះអាង​ថា បុគ្គលិក​ទាំងអស់​ត្រូវ​បាន​ចាត់​ចែង​រួច​ហើយ​ក្នុង​ការ​សម្រួល ដើម្បី​អាច​មាន​ឱកាស​ចេញ​ទៅ​បោះឆ្នោត​ដូចៗ​គ្នា។

ស្រដៀង​គ្នា​នេះ​ដែរ បុគ្គលិក​បម្រើ​ការ​គ្រប់​ស្ថានីយ​ប្រេង​ឥន្ធនៈ​នៅ​ទូទាំង​ប្រទេស​កម្ពុជា កាស៊ីណូ (Casino) រោងចក្រ​កាត់​ដេរ និង​ក្រុមហ៊ុន​សម្អាត​ទីក្រុង​ឈ្មោះ ស៊ីនទ្រី អះអាង​ប្រហាក់​ប្រហែល​គ្នា​ថា ថៅកែ​រោងចក្រ​មិន​បាន​បើក​លុយ​ឲ្យ​ដូច​ការ​អនុវត្ត​ក្នុង​ពេល​កន្លង​ទៅ​នោះ​ទេ។ ពួក​គេ​ចាត់​ទុក​ថា នេះ​ជា​មធ្យោបាយ​រារាំង​សម្រាប់​ពួក​គេ ជា​ថ្នូរ​នឹង​មិន​អនុញ្ញាត​ឲ្យ​បាន​ទៅ​បោះឆ្នោត។ លើស​ពី​នេះ ពួក​គេ​រង​ការ​ព្រមាន​ថា ត្រូវ​ប្រឈម​មុខ​នឹង​ការ​កាត់​ប្រាក់​ខែ​ថែម​ទៀត។

ទាក់ទិន​ករណី​នេះ បុគ្គលិក​ដែល​បម្រើ​ការ​នៅ​តាម​វិស័យ​ឯកជន​ទាំង​នេះ ចាត់​ទុក​ថា ក្រុមហ៊ុន​ឯកជន​ហាក់​ប្រឆាំង​នឹង​គោលការណ៍​នៃ​សេចក្ដី​ណែនាំ​របស់ គ.ជ.ប និង​មិន​បាន​អនុវត្ត​ច្បាប់​ស្ដីពី​ការងារ​របស់​ប្រទេស​កម្ពុជា ឲ្យ​បាន​ពេញលេញ​នោះ​ឡើយ។

កាល​ពី​ថ្ងៃ​ទី១១ មិថុនា ក្រសួង​ការងារ និង​បណ្ដុះ​បណ្ដាល​វិជ្ជាជីវៈ បាន​ចេញ​គោលការណ៍​អនុញ្ញាត​ឲ្យ​បុគ្គលិក​វិស័យ​ឯកជន និង​កម្មករ​និយោជិក បាន​ឈប់​សម្រាក ១​ថ្ងៃ សម្រាប់​ភ្នំពេញ។ ហើយ ៣​ថ្ងៃ សម្រាប់ ២៣​ខេត្ត ដោយ​គិត​ចាប់​ពី​ថ្ងៃ​ត្រឡប់​មក​បំពេញ​ការងារ​វិញ ឬ​ពី​បណ្ដា​ខេត្ត​ណា​មួយ​ទៅ​បណ្ដា​ខេត្ត​ណា​មួយ​ផ្សេង​ទៀត។

ឆ្លើយ​តប​បញ្ហា​នេះ ប្រធាន​នាយកដ្ឋាន​វិវាទ​ការងារ​នៃ​ក្រសួង​ការងារ លោក ខៀវ សាវុធ ឲ្យ​ដឹង​ថា ក្នុង​ករណី​បុគ្គលិក​នៅ​តាម​វិស័យ​ឯកជន រក​ឃើញ​ថា ម្ចាស់​សហគ្រាស ឬ​រោងចក្រ​ពុំ​បាន​អនុវត្ត​តាម​គោលការណ៍​របស់​ក្រសួង​ទេ កម្មករ​និយោជិក​គួរ​ធ្វើ​សំណើ​សុំ​កិច្ច​អន្តរាគមន៍​ពី​ក្រសួង ឬ​ស្ថាប័ន​ដែល​នៅ​ជិត​បំផុត ដើម្បី​រក​ច្រក​ចេញ។

ប្រធាន​សម្ព័ន្ធ​សហជីព​ជាតិ លោក ហ្វា សាលីន អះអាង​ថា ម្ចាស់​សហគ្រាស និង​វិស័យ​ឯកជន​ទាំងអស់ គួរ​ផ្ដល់​ភាព​ងាយ​ស្រួល​ដល់​បុគ្គលិក​ក្រោម​ឱវាទ ជា​ជាង​ការ​លើក​ហេតុផល​ផ្សេង​ជា​ថ្នូរ​នឹង​ការ​រារាំង។ លោក​គិត​ថា ព្រោះ​នេះ​គឺ​ជា​កាតព្វកិច្ច និង​ការ​ទទួល​ខុស​ត្រូវ​របស់​ពលរដ្ឋ​សម្រាប់​ជាតិ​របស់​ខ្លួន។

ការ​រឹត​បន្តឹង​នេះ ត្រូវ​បាន​កម្មករ​និយោជិក​ចាត់​ទុក​ថា នេះ​គឺ​ជា​លើក​ទី​មួយ​ហើយ​ដែល​ម្ចាស់​សហគ្រាស និង​ក្រុមហ៊ុន អនុវត្ត​តឹងរ៉ឹង បើ​ប្រៀបធៀប​ទៅ​នឹង​អាណត្តិ​នៃ​ការ​បោះឆ្នោត​ក្រុម​ប្រឹក្សា​ឃុំ​សង្កាត់ ឬ​ការ​បោះឆ្នោត​ជាតិ​ក្នុង​ពេល​កន្លង​ទៅ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។