ក្រុមមនុស្សទាំងនោះ មានដូចជាមន្ត្រីរដ្ឋាភិបាល បុគ្គលខាងបក្សប្រឆាំង ខាងអង្គការសង្គមស៊ីវិល ពលរដ្ឋធម្មតា ជនរងគ្រោះពីការរំលោភសិទ្ធិមនុស្ស ដៃគូអភិវឌ្ឍន៍នៅកម្ពុជា និងតំណាងរាជធានីភ្នំពេញ។
ការងាររបស់លោក គឺស្ដាប់។ ស្ដាប់គ្រប់ភាគីទាំងអស់ ហើយធ្វើសេចក្ដីសន្និដ្ឋានផ្អែកលើមូលដ្ឋានព័ត៌មានដែលលោកបានទទួល រួចលោកនឹងវាយតម្លៃស្ថានភាពនោះ តាមចំណាប់អារម្មណ៍ និងទស្សនៈរបស់លោក ហើយសរសេរជារបាយការណ៍ដ៏ឯករាជ្យទាំងស្រុង មិនលម្អៀង និងមានកម្មវត្ថុច្បាស់លាស់ មិនដូចក្រុមនិស្សិតមួយចំនួនចោទប្រកាន់រូបលោកនោះទេ។
អ្នករាយការណ៍ពិសេសនៃអង្គការសហប្រជាជាតិ លោក សុរិយា ស៊ូប៊ែឌី បានចាត់ទុកអ្នករិះគន់របាយការណ៍របស់លោកថា អ្នកនោះមិនបានអានរបាយការណ៍របស់លោកឲ្យបានច្បាស់លាស់ និងចប់សព្វគ្រប់នោះឡើយ។
ការលើកឡើងរបស់លោក សុរិយា ស៊ូប៊ែឌី ដូច្នេះ ជាការឆ្លើយតបទៅនឹងអ្នកប្រឆាំងនឹងរូបលោក និងរបាយការណ៍របស់លោក នៅក្នុងដំណើរបេសកកម្មរបស់លោកនៅកម្ពុជា។
លោក សុរិយា ស៊ូប៊ែឌី បានបញ្ជាក់ពីតួនាទីរបស់លោកថា ការងាររបស់លោក គឺលើកស្ទួយសិទ្ធិមនុស្ស តាងនាមឱ្យសហគមន៍អន្តរជាតិ និងអង្គការសហប្រជាជាតិ ពិនិត្យមើលស្ថានភាព វិភាគស្ថានភាព និងផ្ដល់យោបល់របស់លោកជាអនុសាសន៍ផ្លូវការ ដាក់ជូនរដ្ឋាភិបាល។ រដ្ឋាភិបាលជាអ្នកពិចារណាអនុសាសន៍របស់លោក។
លោកបញ្ជាក់ថា ទស្សនៈទាំងអស់របស់លោក មានកម្មវត្ថុច្បាស់លាស់ មិនលម្អៀង និងឯករាជ្យ ក្នុងការបំពេញអាណត្តិការងារ និងភារកិច្ចរបស់លោក ក្នុងនាមជាអ្នករាយការណ៍ពិសេសរបស់អង្គការសហប្រជាជាតិប្រចាំកម្ពុជា៖ «ការតវ៉ារបស់និស្សិតដែលលោកលើកឡើងនេះ បើយើងមើលតាមប្រព័ន្ធផ្សព្វផ្សាយវិញ ការតវ៉ានេះ គឺមានការរៀបចំទុក ដើម្បីក្រឡុកខ្ញុំ ឬបង្អាប់បង្អោន ឬបំផ្លាញខ្ញុំពីការងារ។ ក៏ប៉ុន្តែ ខ្ញុំមិនវិនាសដោយសារតែការតវ៉ានោះទេ ពីព្រោះតែខ្ញុំចង់ជួយពលរដ្ឋកម្ពុជា ឱ្យបានច្រើន តាមតែអាចធ្វើទៅបាន។ នេះហើយជាអាណត្តិការងាររបស់ខ្ញុំ។ ប្រទេសកម្ពុជា កំពុងស្ថិតក្នុងដំណើរឆ្លងកាត់មួយ ដែលការបោះឆ្នោតជាតិមួយនឹងមកដល់នៅក្នុងរយៈពេលខែទៀត។ ជាពេលវេលាមួយ ដែលមានការចាប់អារម្មណ៍ខ្លាំង។ ខ្ញុំយល់ពីបញ្ហានេះ»។
នៅក្នុងបេសកកម្មរបស់អ្នករាយការណ៍ពិសេសលើកទី៩ នេះ មានការរំខានដោយការប្រឆាំងតវ៉ាចំពោះវត្តមានលោក ស៊ូប៊ែឌី ចំនួន ២លើក។ លើកទី១ នៅថ្ងៃទី២០ ឧសភា នៅខាងមុខទីស្នាក់ការរបស់ការិយាល័យឧត្ដមស្នងការទទួលបន្ទុកសិទ្ធិមនុស្ស ប្រចាំកម្ពុជា ដោយសមាគមរួមគ្នាដើម្បីអភិវឌ្ឍន៍កម្ពុជា ដែលគេស្គាល់ថា ជាក្រុមអ្នករត់ម៉ូតូឌុប។ លើកទី២ ធ្វើឡើងដោយក្រុមយុវជននៅក្នុងពេលលោកធ្វើបាឋកថា ស្ដីពីការប្រឈមទៅនឹងការផ្សះផ្សាជម្លោះផលប្រយោជន៍ នៅក្នុងច្បាប់ស្ដីពីការវិនិយោគបរទេស នៅឯសកលវិទ្យាល័យមេគង្គកម្ពុជា កាលពីថ្ងៃទី២១ ឧសភា។
ទោះបីជាយ៉ាងណាក៏ដោយ នៅក្រោយពីអ្នកប្រឆាំងតវ៉ា និងរិះគន់លោក សុរិយា ស៊ូប៊ែឌី នោះ ពិសេសក្រុមនិស្សិតដែលលើកបដាប្រឆាំងនឹងរូបលោក ហើយចោទថា របាយការណ៍របស់លោកបំផ្លើសការពិតនៅកម្ពុជា ដែលបានតវ៉ានៅសាកលវិទ្យាល័យមេគង្គកម្ពុជា នោះ ត្រូវបានមជ្ឈដ្ឋានជាច្រើនបានរិះគន់ក្រុមនិស្សិតទាំងនោះ ពិសេសនៅក្នុងបណ្ដាញសង្គមហ្វេសប៊ុក (Facebook)។
និស្សិត ជា ឆេង ក្នុងចំណោមនិស្សិតមួយចំនួនទៀត ដែលឡើងតវ៉ាប្រឆាំងនឹងរូបលោក សុរិយា ស៊ូប៊ែឌី នោះ នៅក្នុងរយៈពេលប៉ុន្មានថ្ងៃមកនេះ លោកបានព្យាយាមថតជាខ្សែវីដេអូ ដើម្បីបកស្រាយពន្យល់នៅក្នុងបណ្ដាញសង្គមហ្វេសប៊ុក។ នៅក្នុងឃ្លីបវីដេអូ នោះ យុវជន ជា ឆេង បានអះអាងថា មូលហេតុដែលលោកមិនស្វាគមន៍លោក សុរិយា ស៊ូប៊ែឌី នោះ គឺផ្ដើមចេញពីការអានកាសែតថា សហភាពអឺរ៉ុប ព្រមានដកកិច្ចព្រមព្រៀងអនុគ្រោះពាណិជ្ជកម្មនៅកម្ពុជា ដោយសារតែរបាយការណ៍របស់លោក សុរិយា ស៊ូប៊ែឌី។
ទោះបីជាយ៉ាងនេះក្ដី នៅក្នុងបណ្ដាញសង្គមនោះ ក្រុមយុវជនជាច្រើនបានរិះគន់ និងសម្ដែងកាយវិការមិនពេញចិត្តចំពោះការបកស្រាយពន្យល់របស់និស្សិតរូបនេះ ដោយបានសង្កត់ធ្ងន់ថា លោក ជា ឆេង បានធ្វើសកម្មភាពដើម្បីផ្ដល់ប្រយោជន៍ដល់គណបក្សនយោបាយ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង មានប្រសាសន៍ថា ការសួរដេញដោលជារឿងល្អមួយនៅក្នុងសង្គមប្រជាធិបតេយ្យ។ តែយ៉ាងនេះក្ដី លោកបញ្ជាក់ថា របាយការណ៍របស់លោក សុរិយា ស៊ូប៊ែឌី គឺឆ្លុះបញ្ចាំងពីការពិតនៅកម្ពុជា។ ហើយកម្ពុជា ត្រូវការវត្តមានរបស់លោកបន្តទៀត។
ទោះបីជាយ៉ាងណាក៏ដោយ លោក សុរិយា ស៊ូប៊ែឌី បានអះអាងថា ការធ្វើរបាយការណ៍របស់លោកផ្អែកលើមូលដ្ឋានច្បាស់លាស់ជាច្រើន សុក្រឹត និងឯករាជ្យ។ ហើយលោកបញ្ជាក់ថា ប្រជាពលរដ្ឋកម្ពុជា នឹងដឹងគុណលោកនៅក្នុងរយៈពេល ២០ឆ្នាំទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។