ស្នងការនគរបាលរាជធានីភ្នំពេញ លោក ជួន សុវណ្ណ ថ្លែងថា ជនបង្កគ្រោះថ្នាក់ចរាចរណ៍ចំនួន ២នាក់ ដែលប្រើហិង្សាលើក្រុមអ្នកកាសែតកាលពីអធ្រាត្រថ្ងៃទី១៨ មីនា នោះ បានបញ្ជូនទៅតុលាការហើយនៅរសៀលថ្ងៃអង្គារ ទី១៩ ខែមីនា។
កាលពីម៉ោង១២ និង ១៥នាទី រំលងអធ្រាត្រថ្ងៃទី១៨ ខែមីនា មានរថយន្តទំនើបច្រើនគ្រឿងបើកដេញគ្នានៅតាមមហាវិថីព្រះមុនីវង្ស កែងផ្លូវ២១៤ ក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ។ រថយន្តម៉ាក មីនី កូបពើ (Mini cooper) ពណ៌ក្រហម មានស្លាកលេខបណ្ដោះអាសន្ន៦១០៨ បានបុកបង្គោលភ្លើងសាធារណៈលើផ្លូវ២១៤ ចំណែករថយន្ត ស៊ីអវី (CRV) ពណ៌ទឹកប្រាក់ មានស្លាកលេខ2C1369 បានបុកការដ្ឋានសំណង់។ ខណៈនោះ ក្រុមអ្នកកាសែតច្រើនស្ថាប័ន បានចុះថតព័ត៌មាន ហើយក៏ត្រូវអ្នកបើកបររថយន្តទាំងនោះវាយឲ្យរបួសធ្ងន់ និងស្រាលជិត ១០នាក់។
ឪពុកជនរងរបួសធ្ងន់ក្រោមអំពើហិង្សា លោក សុវណ្ណ សុខា ដែលជាអ្នកសារព័ត៌មាន កាសែតកោះសន្តិភាព បានថ្លែងថា កូនប្រុសគាត់ ២រូប ធ្វើកម្មវិធីបច្ចុប្បន្នភាពឲ្យទូរទស្សន៍ខ្មែរប៉ុស្តិ៍លេខ៩ ត្រូវក្រុមបង្កគ្រោះថ្នាក់ចរាចរណ៍វាយឲ្យរបួសធ្ងន់។ កូនគាត់មានឈ្មោះ សុវណ្ណ សេដ្ឋី អាយុ ១៨ឆ្នាំ កំពុងសម្រាកព្យាបាលក្បាលនៅមន្ទីរពេទ្យ និងកូនប្រុសម្នាក់ទៀតឈ្មោះ សុវណ្ណ រិទ្ធីគីន អាយុ ២១ឆ្នាំ របួសស្រាល។
លោកសុំឲ្យរដ្ឋាភិបាល និងក្រសួងមានសមត្ថកិច្ច ចាប់ជនដៃដល់កាត់ទោសតាមច្បាប់ ដើម្បីផ្តល់យុត្តិធម៌ជូនក្រុមអ្នកកាសែត និងកូនរបស់គាត់ទាំង ២នាក់៖ «យកព័ត៌មានទៅថតហេតុការណ៍គ្រោះថ្នាក់ចរាចរណ៍ បែរជាត្រូវបានគេវាយនៅលើផ្លូវសាធារណៈ។ អីចឹង ខ្ញុំសុំសំណូមពរទៅអាជ្ញាធរមានសមត្ថកិច្ច ជាពិសេសតុលាការជួយចាត់ការតាមនីតិវិធីតាមផ្លូវច្បាប់ ដើម្បីផ្តល់យុត្តិធម៌ដល់អ្នកកាសែតដែលកំពុងតែរងគ្រោះ»។
ប្រធានព័ត៌មានកម្មវិធីបច្ចុប្បន្នភាពនៃស្ថានីយទូរទស្សន៍ខ្មែរប៉ុស្តិ៍លេខ៩ លោក ឯម ប៊ុនធឿន ថ្លែងថា អ្នកសារព័ត៌មានគ្រាន់តែចុះថតរូបភាពជាក់ស្តែងនៃគ្រោះថ្នាក់នោះ មិនមែនអ្នកកាត់ក្តីជនណាខុស ឬជនណាត្រូវទេ តែបែរជាទទួលរងនូវអំពើហិង្សាពីសំណាក់អតីតមេធាវីឈ្មោះ ដេវីត ឆាយណាវ៉ា ដែលធ្លាប់បង្កឲ្យខូចសណ្ដាប់ធ្នាប់ទីក្រុងភ្នំពេញ និងម្នាក់ទៀតឈ្មោះ យាន ស៊ីណា ជាអនុរដ្ឋលេខាធិការក្រសួងយុត្តិធម៌៖ «ប៉ុន្តែរូបភាពមួយចំនួនបានបង្ហាញថា លោកអនុរដ្ឋលេខាធិការរូបនេះស្ថិតនៅក្នុងហេតុការណ៍នោះពិតមែន»។
ចំណែកនាយកព័ត៌មានទូរទស្សន៍ហង្សមាស លោក មាស រិទ្ធី ថ្លែងថា ក្រុមអ្នកកាសែតមានគម្រោងចូលជួបជាមួយរដ្ឋមន្ត្រីក្រសួងព័ត៌មាន ស្នើសុំឲ្យក្រសួងនេះជួយរកគន្លឹះណាមួយចៀសវាងកុំឲ្យក្រុមអ្នកសារព័ត៌មានរងគ្រោះថ្នាក់ក្នុងពេលបំពេញបេសកកម្ម៖ «ដើម្បីឲ្យក្រុមអ្នកសារព័ត៌មាន ឬមួយជួបជុំគ្នា ដើម្បីជជែករកគន្លឹះណាមួយពីរឿងកុំឲ្យមានហេតុការណ៍បែបហ្នឹងកើតឡើងជាដដែលៗទៅលើអ្នកសារព័ត៌មាន»។
ក្លឹបអ្នកកាសែតកម្ពុជា ចេញសេចក្តីថ្លែងការណ៍នៅថ្ងៃទី១៩ ខែមីនា ថា អ្នកសារព័ត៌មានជិត ១០នាក់ បានរងរបួសធ្ងន់ និងស្រាល ក្រោមអំពើហិង្សាពីជនបង្កគ្រោះថ្នាក់ចរាចរណ៍នោះ។ ក្លឹបអ្នកកាសែតកម្ពុជា ក៏បានចាត់ទុកការវាយដំអ្នកកាសែតនោះ ជាការគំរាមកំហែងធ្ងន់ធ្ងរដល់ស្មារតីអ្នកសារព័ត៌មាន ដែលកំពុងបំពេញបេសកកម្មតាមវិជ្ជាជីវៈ និងជាចេតនារារាំងដល់សកម្មភាពអ្នកសារព័ត៌មាន រួមទាំងបន្ទច់បង្អាក់ដោយផ្ទាល់ដល់ដំណើរការនៃការអនុវត្តសិទ្ធិសេរីភាពសារព័ត៌មាន ការបញ្ចេញមតិ និងការអនុវត្តលទ្ធិប្រជាធិបតេយ្យនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។