ក្រុមសហជីព និងសហភាពការងារនៅវិស័យកាត់ដេរកម្ពុជា បានរៀបចំពិធីរំលឹកការតស៊ូរបស់ស្ត្រីនៅថ្ងៃទី៨ មីនា ដើម្បីបង្ហាញថា ស្ត្រីបានចូលរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ចជាតិ កាន់តែខ្លាំង ប្រសិនបើស្ត្រីទទួលបានការងារសមរម្យ និងគ្មានការរើសអើងនៅក្នុងវិស័យកាត់ដេរ សំលៀកបំពាក់។
នៅក្នុងឱកាសរលឹកខួបលើកទី១០៤ ក្នុងទិវាសិទ្ធិនារីអន្តរជាតិ ៨ មីនា នៅទីលានប្រជាធិបតេយ្យ ក្រុមអង្គការសង្គមស៊ីវិល និងសហជីពក្នុងវិស័យកាត់ដេរកម្ពុជា ប្រមាណ ៥០០នាក់ បានជួបជុំគ្នា និងលើកទិសដៅសម្រេចឲ្យបាននោះ គឺការលើកសិទ្ធិការងារ និងការងារសមរម្យសម្រាប់កម្មករជាស្ត្រី។
ការប្រារព្ធទិវាសិទ្ធិនារីអន្តរជាតិនៅក្នុងឆ្នាំ២០១៥នេះ ដើម្បីរំលឹកការតស៊ូរបស់ស្ត្រី និងជាការបង្ហាញថា ការធ្វើបាតុកម្មរបស់កម្មករជាស្ត្រីកន្លងមក គឺធ្វើឡើងដោយសារថៅកែរោងចក្រ ឬសហជីពមួយចំនួនមិនគោរពច្បាប់ការងារ និងមានការកេងប្រវ័ញ្ច។
ប្រធានសហជីពការងារកម្ពុជា លោក អាត់ ធន់ មានប្រសាសន៍ថា បច្ចុប្បន្ននៅតាមសហគ្រាស ឬរោងចក្រមួយចំនួន មានការរើសអើង និងរំលោភបំពានចំពោះកម្មករជាស្ត្រី ដោយរាប់ទាំងពីទីកន្លែងធ្វើការងារ រហូតដល់ទីកន្លែងស្នាក់នៅរបស់ពួកគេ។ លោកបញ្ជាក់ថា ដរាបណាមានការធ្វើទុក្ខបុកម្នេញចំពោះកម្មករជាស្ត្រី ដរាបនោះសិទ្ធិរបស់ពួកគេត្រូវបានគេមើលរំលង៖ «បច្ចុប្បន្នមិនថា នៅក្នុងផ្នែកនយោបាយ មិនថានៅក្នុងលក្ខខណ្ឌការងារទេ ភាពអយុត្តិធម៌ និងការរំលោភចំពោះសិទ្ធិស្ត្រីនៅតែកើតមានដដែល»។
នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព បានលើកឡើងថា នៅពេលសមត្ថភាពស្ត្រីនៅមានកម្រិតទាប និងមានការគាបសង្កត់ នៅពេលនេះ តួនាទីរបស់ស្ថាប័នរដ្ឋាភិបាលត្រូវដើរតួនាទីយ៉ាងសំខាន់ក្នុងការពង្រឹង និងគាំពារចំពោះពួកគាត់។ ស្របពេលជាមួយគ្នានេះ ស្ត្រីទាំងអស់ក៏ត្រូវមានជំនឿថា គ្រប់កិច្ចការអ្វីទាំងអស់ គឺយើងអាចធ្វើបាន។
អ្នកស្រីបានលើកទឹកចិត្តស្ត្រីជាកម្មកររោងចក្រដែលចូលរួមទិវាសិទ្ធិនារីអន្តរជាតិ ប្រមាណ ៥០០នាក់នោះថា ការឲ្យតម្លៃខ្លួនឯង គឺជាវិធីតែមួយគត់ដែលសិទ្ធិស្ត្រីត្រូវបានគេឲ្យតម្លៃពីសាធារណជន៖ «យើងកុំចាំឲ្យអ្នកដទៃឲ្យតម្លៃឲ្យខ្លួនយើង យើងត្រូវមានជំនឿថា អ្វីៗយើងអាចធ្វើបានទាំងអស់»។
ទោះជាយ៉ាងណាក៏ដោយ ថ្នាក់ដឹកនាំស្ថាប័ន និងក្រសួងនានា បានអះអាងថា រាជរដ្ឋាភិបាលកម្ពុជា បានប្រើប្រាស់គ្រប់មធ្យោបាយ គ្រប់បែបយ៉ាងដើម្បីលើកកម្ពស់ស្ត្រី ជាពិសេស បានបង្កលក្ខណៈងាយស្រួលដល់អង្គការសង្គមស៊ីវិលនានា ធ្វើសកម្មភាពដើម្បីលើកកម្ពស់សិទ្ធិស្ត្រី។ ប៉ុន្តែសកម្មភាពទាំងអស់ត្រូវធ្វើឡើងតាមច្បាប់កំណត់។
អភិបាលរងនៃគណៈអភិបាលរាជធានីភ្នំពេញ លោក ឃួង ស្រេង មានប្រសាសន៍ថា សាលារាជធានីភ្នំពេញ បានគាំទ្រការប្រារព្ធពិធីសិទ្ធិនារីអន្តរជាតិ តែសូមកុំយកពិធីនោះមកប្រើប្រាស់ក្នុងន័យនយោបាយ។
ទោះជាយ៉ាងណាក៏ដោយ ប្រធានសហភាពការងារកម្ពុជា លោក អាត់ ធន់ នៅក្នុងទិវាសិទ្ធិនារីអន្តរជាតិ ៨ មីនា នាទីលានប្រជាធិបតេយ្យ បានស្នើឲ្យរាជរដ្ឋាភិបាលកម្ពុជា ដោះលែងស្ត្រីជាប់ឃុំដោយសារតវ៉ាដីធ្លីចំនួន ១១នាក់ ដើម្បីបង្ហាញថា រាជរដ្ឋាភិបាលកម្ពុជា មានឆន្ទៈពិតប្រាកដក្នុងការ ការពារសិទ្ធិស្ត្រីនៅថ្ងៃសិទ្ធិនារីអន្តរជាតិ ៨ មីនា លើកទី១០៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។