សាលាក្ដីខ្មែរក្រហម ធ្វើសន្និសីទកាសែតបញ្ជាក់នៅថ្ងៃទី២១ វិច្ឆិកា ថា តុលាការកំពូលនឹងប្រកាសសាលដីកាស្ថាពរលើបណ្ដឹងសាទុក្ខក្នុងសំណុំរឿង០០២ វគ្គ១ ប្រឆាំងនឹងជនជាប់ចោទ ខៀវ សំផន និង នួន ជា នៅថ្ងៃពុធ ទី២៣ វិច្ឆិកា សប្ដាហ៍នេះ។
ការប្រកាសសាលដីកាស្ថាពររបស់តុលាការកំពូល នៅថ្ងៃពុធ ទី២៣ វិច្ឆិកា គឺជាការបញ្ចប់សំណុំរឿងទី២ នៃរឿងក្ដីក្ដាំរបស់អតីតមេដឹកនាំខ្មែរក្រហម។
សាលដីកាស្ថាពរនោះ គឺសម្រេចអំពីការមិនសុខចិត្តរបស់ជនជាប់ចោទ នួន ជា និង ខៀវ សំផន ក្នុងសំណុំរឿងលេខ០០២ វគ្គ១ ក្រោយពេលធ្វើសវនាការអស់រយៈពេល ២២២ថ្ងៃ។ អង្គជំនុំជម្រះសាលាដំបូងរកឃើញថា ជនជាប់ចោទមានពិរុទ្ធភាពពីបទឧក្រិដ្ឋប្រឆាំងនឹងមនុស្សជាតិ ហើយនៅថ្ងៃទី៧ ខែសីហា ឆ្នាំ២០១៤ សម្រេចផ្ដន្ទាទោសជនជាប់ចោទទាំងពីរជាប់ពន្ធនាគារអស់មួយជីវិត។
ក្នុងសន្និសីទកាសែតនៅព្រឹកថ្ងៃទី២១ វិច្ឆិកា មន្ត្រីផ្នែកច្បាប់នៃសាលាក្ដីខ្មែរក្រហម លោក ឡាស អូលសិន (Lars Olsen) រំឭកឡើងវិញថា ជនជាប់ចោទ នួន ជា និង ខៀវ សំផន ជំទាស់ការផ្ដន្ទាទោសនេះថាខុសអង្គហេតុ និងអង្គច្បាប់ ហើយធ្វើបណ្ដឹងសាទុក្ខទៅអង្គជំនុំជម្រះតុលាការកំពូល ឲ្យពិនិត្យមើលឡើងវិញ ឬត្រូវដោះលែងពួកគាត់៖ «សាលក្រមរបស់អង្គជំនុំជម្រះសាលាដំបូង ប្រសិនបើត្រូវបានទាត់ចោលដោយតុលាការកំពូល គឺបានន័យថា នៅពេលនោះជនជាប់ចោទនឹងមានសេរីភាព។ បើសិនជាដូច្នេះមែន បានន័យថា ជនជាប់ចោទនឹងឈ្នះក្ដីនៅក្នុងរឿងនេះ ជាពិសេសជនជាប់ចោទ នួន ជា។ ចំពោះ ខៀវ សំផន គឺគាត់ស្នើសុំឲ្យវាយតម្លៃ និងសម្រេចឡើងវិញទៅលើការដាក់ទោសគាត់ផងដែរ។ ដូច្នេះ ខៀវ សំផន បានប្ដឹងសាទុក្ខទៅតុលាការកំពូលថា ប្រសិនបើមិនច្រានចោលសាលក្រមសាលាដំបូងនោះទេ គួរតែតុលាការកំពូលធ្វើការកែទៅលើការកំណត់ទោសទៅលើរូបគាត់។ គួរតែដាក់គាត់ក្នុងពន្ធនាគាររយៈពេលឆ្នាំជាកំណត់វិញ មិនគួរដាក់ទោសគាត់អស់មួយជីវិតនោះទេ»។
ក្រៅពីការមិនសុខចិត្តរបស់ភាគីជនជាប់ចោទ ភាគីសហព្រះរាជអាជ្ញា ក៏បានប្ដឹងសាទុក្ខទៅតុលាការកំពូលដែរ ដោយសុំសាលាក្ដីនេះ ពង្រីកការអនុវត្តទម្រង់សហឧក្រិដ្ឋកម្មរួមទម្រង់ទី III” ដើម្បីឲ្យអ្នកក្នុងក្រុមប្រព្រឹត្តបទឧក្រិដ្ឋ អាចជាប់ពាក់ព័ន្ធការទទួលខុសត្រូវ ហើយយកមកជំនុំជម្រះក្ដីបាន។
ជនជាប់ចោទ ខៀវ សំផន ដែលជាអតីតប្រធានគណៈប្រធានរដ្ឋ នៃរបបកម្ពុជាប្រជាធិបតេយ្យ និង នួន ជា អតីតអនុលេខាបក្សកុម្មុយនិស្តកម្ពុជា ត្រូវបានសាលាដំបូងចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិ ប្រព្រឹត្តនៅក្នុងអំឡុងពេលជម្លៀសពលរដ្ឋនៅទីក្រុងភ្នំពេញយ៉ាងហោច ២លាននាក់ កាលពីខែមេសា ឆ្នាំ១៩៧៥ និងការផ្លាស់ទីដោយបង្ខំបន្តបន្ទាប់ពីតំបន់ដទៃទៀត រួមទាំងការកាប់សម្លាប់អតីតមន្ត្រីរដ្ឋការសម័យ លន់ នល់ នៅទួលពោធិ៍ជ្រៃ ក្នុងខេត្តពោធិ៍សាត់។
ការប្រកាសសាលដីការបស់អង្គជំនុំជម្រះតុលាការកំពូល នៅថ្ងៃពុធ ទី២៣ វិច្ឆិកា គឺជាការប្រកាសលទ្ធផលនៃបណ្ដឹងសាទុក្ខរបស់ភាគីទាំងពីរ ហើយក៏ជាការប្រកាសបិទផ្លូវតវ៉ាទាំងអស់សម្រាប់ការជំនុំជម្រះវគ្គ១ នៃសំណុំរឿង០០២។ មន្ត្រីសាលាក្ដីខ្មែរក្រហម នៅមិនទាន់អាចបញ្ជាក់បានទេថា ជនជាប់ចោទទាំងពីរនឹងត្រូវគេយកទៅឃុំឃាំងនៅឯណានៅឡើយទេ គឺត្រូវរង់ចាំរហូតដល់ក្រោយការសម្រេចរបស់តុលាការកំពូលសិន។
កាលពីសំណុំរឿង ០០១ ដែលមានបណ្ដឹងសាទុក្ខដូចគ្នា លោក កាំង ហ្កេកអ៊ាវ ហៅ ឌុច ត្រូវបានសាលាក្ដីខ្មែរក្រហមប្រគល់ឲ្យក្រសួងមហាផ្ទៃ យកទៅឃុំឃាំងនៅគុកខេត្តកណ្ដាល រហូតមកដល់សព្វថ្ងៃនេះ។ សាលាក្ដីខ្មែរក្រហម ដែលចាប់ផ្ដើមដំណើរការចាប់តាំងពីឆ្នាំ២០០៦ រហូតមកដល់ពេលនេះ បានចំណាយថវិកាអស់ចំនួន ២៦១លានដុល្លារហើយ។ ក្នុងរយៈពេលនេះ សាលាក្ដីបានជំនុំជម្រះចប់សំណុំរឿងមួយជាស្ថាពរ គឺសំណុំរឿង ០០១ ដែលជាសំណុំរឿងប្រឆាំងអតីតប្រធានមន្ទីរសន្តិសុខ ស-២១ ឬគុកទួលស្លែង ឈ្មោះ កាំង ហ្កេកអ៊ាវ ហៅ ឌុច។ លោក ឌុច ត្រូវបានសាលាក្ដីនេះ សម្រេចដាក់គុកអស់មួយជីវិត ដោយសារតែតុលាការរកឃើញថា គាត់ជាអ្នកទទួលខុសត្រូវចំពោះបទឧក្រិដ្ឋសម្លាប់មនុស្សជិត ១ម៉ឺន ៣ពាន់នាក់ នៅគុកទួលស្លែង កាលពីក្នុងរបបកម្ពុជាប្រជាធិបតេយ្យ។
ប្រធានផ្នែកកិច្ចការសាធារណៈនៃសាលាក្ដីខ្មែរក្រហម លោក ឌឹម សុវណ្ណារុំ ថ្លែងថា សាលាក្ដីនេះ នឹងចោទប្រកាន់ជនជាប់ចោទណាបន្ថែមទៀតទេ៖ «ដោយឡែកសំណុំរឿង ០០៣ និង ០០៤ គឺកំពុងឋិតនៅក្នុងដៃរបស់តុលាការខ្មែរក្រហម ដោយសារតែសហចៅក្រមស៊ើបអង្កេតកំពុងធ្វើការស៊ើបអង្កេត ហើយការស៊ើបអង្កេត អាចនឹងឈានទៅបញ្ចប់ក្នុងឆ្នាំខាងមុខនេះ។ ក្រៅពីហ្នឹង តុលាការខ្មែរក្រហមនឹងមិនមានសំណុំរឿង ០០៥ ០០៦ ០០៧ អីតទៅទៀតទេ ពីព្រោះសហព្រះរាជអាជ្ញាទាំងជាតិ និងអន្តរជាតិ បានប្រកាសហើយថា ខ្លួនមិនធ្វើការប៉ុនប៉ងចោទប្រកាន់ទៅលើជនសង្ស័យថ្មីបន្ថែមទៀតទេ»។
ទន្ទឹមគ្នានេះ អង្គជំនុំជម្រះសាលាដំបូងកំពុងបន្តសវនាការជំនុំជម្រះជនជាប់ចោទ នួន ជា និង ខៀវ សំផន ក្នុងសំណុំរឿង ០០២ វគ្គទី ២ ទៀត ដោយស្ដាប់ដើមបណ្ដឹងរដ្ឋប្បវេណី និងសាក្សីនានា ទាក់ទងអង្គហេតុប្រល័យពូជសាសន៍ប្រឆាំងជនជាតិចាម និងវៀតណាម ការរៀបអាពាហ៍ពិពាហ៍ដោយបង្ខំ និងការរំលោភសេពសន្ថវៈ ការបោសសម្អាតផ្ទៃក្នុង ឧក្រិដ្ឋកម្មនៅមន្ទីរសន្តិសុខ ស-២១ មន្ទីរសន្តិសុខក្រាំងតាចាន់ មន្ទីរសន្តិសុខអូរកន្សែង មន្ទីរសន្តិសុខភ្នំក្រោល ការដ្ឋានសាងសង់ទំនប់១ មករា ការដ្ឋានសាងសង់វាលយន្តហោះកំពង់ឆ្នាំង ការដ្ឋានលើកទំនប់អាងត្រពាំងថ្ម អង្គហេតុសហករណ៍ត្រាំកក់ ការប្រព្រឹត្តលើពុទ្ធសាសនិកជន។
នៅរសៀលថ្ងៃទី២១ វិច្ឆិកា សាលាដំបូងបានស្ដាប់សក្ខីកម្មសាក្សីពីប្រទេសបារាំង មួយរូប ឈ្មោះ ធុច ស៊ីថន ដែលជាអតីតបុគ្គលិកធ្វើការនៅមន្ទីរសង្គមកិច្ចនៃរបបកម្ពុជាប្រជាធិបតេយ្យ។ សាក្សីរូបនេះជម្រាបអង្គជំនុំជម្រះអំពីព្រឹត្តិការណ៍នានា នៅមន្ទីរសង្គមកិច្ចពេលនោះ ដូចជាការបង្ខំឲ្យរៀបការ និងការចាប់ខ្លួនបញ្ញាជនយកទៅបាត់ៗ។ សាក្សីរូបនេះ នឹងបន្តផ្ដល់សក្ខីកម្មទៀត នៅថ្ងៃទី២២ វិច្ឆិកា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។