សាលាដំបូងនៃសាលាក្ដីខ្មែរក្រហម ចេញសេចក្ដីសម្រេចផ្ទាល់មាត់ជាបឋមថា ជនជាប់ចោទ នួន ជា មានស្ថានភាពសុខភាពអាចចូលរួមសវនាការប្រកបដោយអត្ថន័យបាន។
ការប្រកាសបែបនេះ ត្រូវបានធ្វើឡើងដោយប្រធានអង្គជំនុំជម្រះសាលាដំបូង គឺលោកចៅក្រម និល ណុន ក្នុងសវនាការរយៈពេលប្រមាណ ២០នាទី នៅព្រឹកថ្ងៃសុក្រ ទី២៩ ខែមីនា ឆ្នាំ២០១៣ ដោយសម្រេចតម្កល់សេចក្ដីសម្រេចរបស់ខ្លួនដដែលថា ជនជាប់ចោទ នួន ជា នៅមានសុខភាពគ្រប់គ្រាន់។
ចៅក្រម និល ណុន៖ «អង្គជំនុំជម្រះសាលាដំបូង តម្កល់នូវសេចក្តីសម្រេចរបស់ខ្លួនពីពេលកន្លងទៅ ដែលបានថា ជនជាប់ចោទ នួន ជា មានកាយសម្បទា និងសតិបញ្ញាស្មារតីគ្រប់គ្រាន់ ក្នុងការចូលរួមសវនាការ។ សេចក្ដីសម្រេចជាលាយលក្ខណ៍អក្សរ ដែលមានសម្អាងហេតុពេញលេញលើបញ្ហានេះ នឹងចេញនាពេលសមស្របឆាប់ៗខាងមុខនេះ»។
លោកចៅក្រម និល ណុន ប្រកាសទៀតថា ការសម្រេចនេះ គឺផ្អែកលើការសន្និដ្ឋាន របាយការណ៍ និងសក្ខីកម្មថ្មីៗរបស់អ្នកជំនាញវេជ្ជសាស្ត្រ ចាត់តាំងដោយសាលាដំបូង ដែលបញ្ជាក់ច្បាស់ថា ជនជាប់ចោទ នួន ជា នៅតែមានសម្បទាចូលរួមសវនាការប្រកបដោយអត្ថន័យ ថ្វីបើជនជាប់ចោទរូបនេះមានអាយុច្រើន និងរាងកាយទន់ខ្សោយក៏ដោយ។
ក្នុងសវនាការស្ដាប់អ្នកជំនាញសុខភាពមនុស្សចាស់ និងផ្នែកវិកលវិទ្យា កាលពីថ្ងៃទី២៥ ខែមីនា មេធាវីជនជាប់ចោទ នួន ជា បានជម្រាបអង្គជំនុំជម្រះថា កូនក្ដីរបស់ខ្លួននៅមានជំងឺរ៉ាំរ៉ៃធ្ងន់ធ្ងរ ហើយសុំឱ្យព្យាបាលជាស្រួលបួលសិន មុននាំយកមកជំនុំជម្រះ។
ជនជាប់ចោទ នួន ជា បានលះបង់សិទ្ធិដោយមិនចូលរួមសវនាការនៅព្រឹកថ្ងៃទី២៩ មីនា ទេ ព្រោះហេតុផលមានបញ្ហាសុខភាព។
បន្ទាប់ពីការប្រកាសអំពីបញ្ហាសុខភាពរបស់ជនជាប់ចោទ នួន ជា ប្រធានអង្គជំនុំជម្រះសាលាដំបូងក៏បានប្រកាសអំពីការតម្កល់សេចក្តីសម្រេចរបស់សាលាដំបូង ក្នុងការបំបែកសំណុំរឿងលេខ០០២ ដើម្បីពន្លឿនការជំនុំជម្រះឱ្យឆាប់បានចេញសាលក្រមដែរ។ លោកចៅក្រម និល ណុន ប្រកាសថា ការតម្កល់សេចក្ដីសម្រេចនេះ គឺផ្អែកលើសវនាការ កាលពីថ្ងៃទី១២ ខែកុម្ភៈ ឆ្នាំ២០១៣ ដើម្បីស្ដាប់មតិយោបល់របស់ភាគី ទាក់ទងនឹងការបំបែកនីតិវិធីជំនុំជម្រះ គឺសំណុំរឿង០០២/០១ ដែលគ្របដណ្ដប់លើបទឧក្រិដ្ឋជម្លៀសពលរដ្ឋលើកទី១ និងទី២ និងការសម្លាប់មនុស្សមួយកន្លែងឈ្មោះទួលពោធិ៍ជ្រៃ និងផ្អែកលើការពិចារណាអំពីការស្លាប់របស់ជនជាប់ចោទ អៀង សារី កាលពីពេលថ្មីៗនេះ។
ចៅក្រម និល ណុន៖ «អង្គជំនុំជម្រះសាលាដំបូង សម្រេចតម្កល់នូវដីកាបំបែកកិច្ចដំណើរការនីតិវិធីសវនាការរបស់ខ្លួន ដែលបានចេញកាលពីលើកមុន ដោយអនុលោមតាមវិធាន ៨៩ ស្ទួន ២ នៃវិធានផ្ទៃក្នុង ដោយកំណត់វិសាលភាពនៃការជំនុំជម្រះនៅដំណាក់កាលដំបូងក្នុងសំណុំរឿង០០២ គឺសំណុំរឿង០០២/០១ ត្រឹមតែលើការជម្លៀសប្រជាជនក្នុងដំណាក់កាលទី១ និងក្នុងដំណាក់កាលទី២ និងទីតាំងសម្លាប់មនុស្សនៅទួលពោធិ៍ជ្រៃ»។
ទោះជាដូច្នេះក្ដី ការប្រកាសជាលាយលក្ខណ៍អក្សរលើបញ្ហាទាំងពីរនេះ នឹងចេញនៅក្នុងពេលសមស្របឆាប់ៗខាងមុខនេះ។
លោកចៅក្រម និល ណុន ជូនដំណឹងដល់ភាគីថា សវនាការពិនិត្យភស្តុតាងលើសំណុំរឿង០០២/០១ ដែលត្រូវសាក្សីបន្ត នឹងធ្វើនៅថ្ងៃច័ន្ទ ទី៨ ខែមេសា ឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។