សេចក្ដីថ្លែងការណ៍រួមមួយចុះថ្ងៃទី២៤ មីនា របស់គណៈកម្មាធិការប្រព្រឹត្តិកម្មដើម្បីសិទ្ធិមនុស្សនៅកម្ពុជា (CHRAC) វិទ្យាស្ថានស្រាវជ្រាវបញ្ហាសង្គម (ASRIC) និងសមាគមជនរងគ្រោះនៃរបបកម្ពុជាប្រជាធិបតេយ្យ មានឈ្មោះថា "ក្សេមក្សាន្ត" បានទទូចឲ្យសាលាក្ដីខ្មែរក្រហមចាប់ផ្ដើមលើកយកបទចោទធំៗ រួមមានបទប្រល័យពូជសាសន៍ និងអាពាហ៍ពិពាហ៍ចាប់បង្ខំជាដើមនៅក្នុងសំណុំរឿង ០០២ មកបើកសវនាការកាត់សេចក្ដី។
សេចក្ដីថ្លែងការណ៍បន្តថា បច្ចុប្បន្នសាលាដំបូងនៃសាលាក្ដីខ្មែរក្រហម កំពុងតែបើកសវនាការជំនុំជម្រះឧក្រិដ្ឋកម្មបណ្ដេញពលរដ្ឋកម្ពុជា ចេញដោយបង្ខំពីទីក្រុង ក្នុងឆ្នាំ១៩៧៥ ដែលជារឿងសំខាន់សម្រាប់ប្រវត្តិសាស្ត្រកម្ពុជា។ ប៉ុន្តែបទឧក្រិដ្ឋធំៗជាងនេះទៅទៀត ដែលសាលាក្ដីគួរតែពិចារណាលើកយកមកជំនុំជម្រះជាមុន មុនពេលបាត់បង់ឱកាសរបស់ខ្លួន ពីព្រោះជនជាប់ចោទដែលនៅសេសសល់ គឺមានវ័យកាន់តែចាស់ជរា និងមានជំងឺ។
បច្ចុប្បន្នចំនួនជនជាប់ចោទក្នុងសំណុំរឿង ០០២ នៅសល់តែពីរនាក់ទេ គឺលោក នួន ជា អតីតប្រធានរដ្ឋសភាប្រជាជនកម្ពុជា និងលោក ខៀវ សំផន ប្រធានគណៈប្រធានរដ្ឋនៃរបបកម្ពុជាប្រជាធិបតេយ្យ។ ចំណែកជនជាប់ចោទ អៀង សារី ក្នុងសំណុំរឿង ០០២ ដែរនោះ បានទទួលមរណភាពកាលពីថ្ងៃទី១៤ មីនា ដោយសារជំងឺ នៅមុនពេលការជំនុំជម្រះមិនទាន់បញ្ចប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។