អ្នកនាំពាក្យសាលាក្ដីខ្មែរក្រហម លោក នេត្រ ភក្ត្រា មានប្រសាសន៍នៅថ្ងៃទី២១ ខែមីនា ឆ្នាំ២០១៣ ថា ផ្នែករដ្ឋបាលនៃសាលាក្ដីនេះ បានជូនដំណឹងជាផ្លូវការទៅបុគ្គលិក និងមន្ត្រីខាងភាគីខ្មែរអំពីប្រាក់ខែនោះហើយ៖ «នៅថ្ងៃនេះនៅការិយាល័យរដ្ឋបាលនៃសាលាក្ដីខ្មែរក្រហម ចេញនូវសេចក្ដីជូនដំណឹងមួយជូនដល់មន្ត្រីបុគ្គលិកជាតិនៃសាលាក្ដីដែលពួកគាត់មិនទទួលបានប្រាក់ខែតាំងពីខែធ្នូនោះ អំពីដំណឹងនៃការទទួលបានប្រាក់ខែរបស់ពួកគាត់សម្រាប់ខែធ្នូ ឆ្នាំ២០១២ ដែលថវិកានេះត្រូវបានផ្ទេរចូលគណនេយ្យរបស់បុគ្គលិកទាំងអស់នៅថ្ងៃនេះ ក៏ដូចជាថ្ងៃស្អែក អាស្រ័យទៅតាមប្រភេទគណនេយ្យធនាគាររៀងៗខ្លួន»។
លោក នេត្រ ភក្ត្រា ឱ្យដឹងដែរថា ថវិកាបើកឱ្យបុគ្គលិកពេលនេះ គឺជាថវិការបស់សហភាពអឺរ៉ុប ដែលបានសន្យាតាំងពីឆ្នាំ២០១២ ហើយលោកអំពាវដល់ប្រទេសម្ចាស់ជំនួយផ្សេងទៀតឱ្យជួយផ្ដល់ថវិកាបន្ត ព្រោះខាងភាគីខ្មែរត្រូវការថវិកាចំនួនប្រមាណ ៧លានដុល្លារទៀតសម្រាប់ឆ្នាំ២០១៣។
ក្រុមប្រទេសម្ចាស់ជំនួយនៅមិនទាន់បានសន្យាផ្ដល់ថវិកាថ្មីសម្រាប់ឆ្នាំ២០១៣ នៅឡើយទេ។ បញ្ហានេះធ្វើឱ្យបុគ្គលិកខាងភាគីខ្មែរ ធ្វើការដោយមិនមានកិច្ចសន្យាការងារ និងមិនបានទទួលប្រាក់ទេ ចាប់តាំងពីខែមករាមក។ ប្រសិនបើមិនមានព័ត៌មានជាក់លាក់ពីប្រាក់ខែឆ្នាំ២០១៣ ទេ បុគ្គលិកនឹងចាប់ផ្ដើមធ្វើពហិការបន្តទៀត នៅថ្ងៃទី១ ខែមេសា ខាងមុខនេះ។
ព័ត៌មានពីសាលាក្ដីខ្មែរក្រហម ឱ្យដឹងថា អ្នកជំនាញការពិសេសរបស់អគ្គលេខាធិការអង្គការសហប្រជាជាតិ លោក ដាវីដ សេហ្វ័រ (David Scheffer) បានជួបប្រជុំជាមួយក្រុមប្រទេសម្ចាស់ជំនួយ នៅរសៀលថ្ងៃទី២១ ខែមីនា នេះ។ ប៉ុន្តែយើងនៅមិនទាន់ទទួលបានលទ្ធផលពីកិច្ចប្រជុំនេះនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។