សពលោក អៀង សារី អតីតឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសរបស់របបកម្ពុជាប្រជាធិបតេយ្យ ត្រូវបានបូជារួចរាល់ហើយនៅថ្ងៃទី២១ បន្ទាប់ពីត្រូវតម្កល់ទុកធ្វើបុណ្យអស់រយៈពេល៧ថ្ងៃកន្លងទៅ នៅគ្រាមានពលរដ្ឋដែលបានចូលរួមបូជាសពប្រមាណ១ពាន់នាក់ នៅនាទីចុងក្រោយនៃជីវិតនយោបាយរបស់លោក។
អតីតយោធាខ្មែរក្រហម នៅខេត្តប៉ៃលិន លោក តែម មឿន មានប្រសាសន៍នៅថ្ងៃទី២១ មីនា ថា លោក អៀង សារី គឺជាមេដឹកនាំមានការទទួលខុសត្រូវខ្ពស់អំពីអធិបតីភាព និងបូរណភាពទឹកដី។ រស់ដោយពិកាជើងម្ខាងមុនសមាហរណកម្មឆ្នាំ១៩៩៧ លោកគិតថា លោក អៀង សារី គឺជាផ្នែកមួយដែលជំរុញឲ្យមានសន្តិភាពពិតប្រាកដ នៅនាទីចុងក្រោយនៃនយោបាយរបស់លោក ដែលនាំឲ្យមានការបង្រួបបង្រួម និងផ្សះផ្សាជាតិឆ្នាំ១៩៩៨៖ «បើតាមខ្ញុំតស៊ូ គាត់ជាអ្នកស្រឡាញ់ទឹកស្រឡាញ់ដី បាទៗ គឺមិនចង់ឲ្យបាត់បង់ទៅខាងណាៗទេ។ ការតស៊ូរបស់គាត់ គឺគាត់មានមូលហេតុរបស់គាត់បាទ គឺគោរពស្រឡាញ់ទឹកដីបាទ»។
សពលោក អៀង សារី ត្រូវបូជានៅម៉ោង ៦ និង ៣០នាទី ល្ងាចថ្ងៃទី២១ មីនា ក្នុងភូមិដូង ស្រុកម៉ាឡៃ ខេត្តបន្ទាយមានជ័យ ក្រោយពីតម្កល់អស់រយៈពេល ៦ថ្ងៃកន្លងទៅ។ ពិធីបូជាសពក្នុងថ្ងៃទី៧ នេះ ត្រូវបានគេរៀបចំឡើងយ៉ាងឧឡារិក តាមប្រពៃណីព្រះពុទ្ធសាសនា។ សពលោក អៀង សារី ត្រូវគេតម្កល់លើមេរុ និងបាញ់កាំជ្រួចមុននឹងត្រូវបូជា។
ក្រៅពីអតីតយោធាខ្មែរក្រហម មន្ត្រី អ្នកជំនួញ ព្រះសង្ឃថៃ និងមន្ត្រីសាលាក្ដីខ្មែរក្រហមមួយចំនួនចូលរួមនោះ គឺពុំឃើញវត្តមានមន្ត្រីរបស់រដ្ឋាភិបាលមកពីស្ថាប័នរដ្ឋចូលរួមនោះទេ។
លោក អាង ឧត្ដម មេធាវីការពារក្ដីឲ្យលោក អៀង សារី ចាត់ទុកអតីតឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសរូបនេះថា គឺជាដៃគូដ៏សកម្ម ក្នុងដំណើរការជំនុំជម្រះក្ដីអស់រយៈពេល ៥ឆ្នាំកន្លងទៅនេះ។ លោកបន្តថា អ្វីដែលកូនក្ដីរបស់ខ្លួនពុំបានទម្លាយឯកសារ និងភស្តុតាងពិតប្រាកដជាសាធារណៈនោះ គឺជានីតិវិធី និងជាសិទ្ធិសម្រេចរបស់លោក អៀង សារី បើទោះជាសំណុំរឿងនេះត្រូវបិទបញ្ចប់ហើយក្ដី។
លោកបន្តថា ទោះជាបែបណា ការបង្ហាញវត្តមានរបស់លោកនៅថ្ងៃបូជាសពរបស់លោក អៀង សារី នេះ គឺជាសារបញ្ជាក់ថា កូនក្តីរបស់ខ្លួន បើទោះជាស្ថិតនៅក្នុងនាទីចុងក្រោយក្តី តែលោក អៀង សារី នៅបន្តកិច្ចខិតខំប្រឹងប្រែងក្នុងការផ្ដល់សក្ខីកម្មជាបន្តបន្ទាប់៖ «គាត់បានជួយក្រុមការងារច្រើនណាស់។ ខ្ញុំសរសើរគាត់មានការប្រឹងប្រែងការងារ ក្រុមការងារយើងមែនទែន រហូតដល់ដំណាក់កាលចុងក្រោយដែលគាត់អើមានសុខភាពដុនដាបមែនទែន នៅលើគ្រែ នៅតែប្រឹងជួយយើងជានិច្ច។ រហូតដល់ជួយយោបល់ជួយកិច្ចការរបស់យើង»។
ដូចការគ្រោងទុក លោក អ៊ី ឈាន អភិបាលខេត្តប៉ៃលិន គឺជាអ្នកអុជភ្លើងបូជាសពរបស់លោក អៀង សារី ដោយផ្ទាល់។ នៅមុនបូជាសព អ្នកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចរបស់របបកម្ពុជាប្រជាធិបតេយ្យ បានបង្ហាញវត្តមានក្នុងរយៈពេលខ្លី ក្នុងស្មារតីរវើរវាយ មុននឹងត្រូវជូនដំណើរចូលរថយន្តដោយមិនត្រូវគេរៀបចំដើម្បីបូជាសពលោក អៀង សារី ដោយផ្ទាល់នោះទេ។
អតីតឧបនាយករដ្ឋមន្ត្រី និងរដ្ឋមន្ត្រីក្រសួងការបរទេសនៃរបបខ្មែរក្រហមរូបនេះ បានទទួលមរណភាពកាលពីថ្ងៃទី១៤ មីនា នៅមន្ទីរពេទ្យមិត្តភាពខ្មែរ-សូវៀត ទីក្រុងភ្នំពេញ ក្នុងវ័យ ៨៨ឆ្នាំ ដោយជំងឺ។
មរណភាពរបស់ជនជាប់ចោទ អៀង សារី បានធ្វើឱ្យក្រុមដើមបណ្ដឹងរដ្ឋប្បវេណី និងពលរដ្ឋរងគ្រោះ មានការសោកស្ដាយ និងខកចិត្តយ៉ាងខ្លាំង ខណៈដែលសវនាការសាលាក្តីខ្មែរក្រហមកំពុងតែប្រព្រឹត្តទៅដោយមិនទាន់មានសេចក្តីសម្រេចណាមួយ អំពីពិរុទ្ធភាពលើបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដែលត្រូវបានចោទប្រកាន់លើរូបគាត់។
ក្រុមជនរងគ្រោះទាមទារឱ្យប្រទេសម្ចាស់ជំនួយជួយជំរុញសាលាក្ដីខ្មែរក្រហម ឱ្យដំណើរការវិនិច្ឆ័យសំណុំរឿងក្តី០០២ លើជនជាប់ចោទ នួន ជា និង ខៀវ សំផន ដែលកាន់តែមានវ័យចាស់ជរាទៅហើយនោះ ឱ្យបានឆាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។