ជនជាប់ចោទ នួន ជា ត្រូវបានគេបញ្ជូនទៅមន្ទីរពេទ្យមិត្តភាពខ្មែរ-សូវៀត ភ្លាមៗកាលពីថ្ងៃទី១៣ មករា ដើម្បីសង្គ្រោះបន្ទាន់ ដោយសារតែគាត់មានបញ្ហាហត់ ខ្សោយអស់កម្លាំង ហើយដួលនៅក្នុងបន្ទប់ឃុំឃាំងនៃសាលាក្ដីខ្មែរក្រហម។ គ្រូពេទ្យរកឃើញថា ស្ថានភាពជំងឺរបស់លោក នួន ជា មានជំងឺរលាកទងសួតធ្ងន់ធ្ងរ។
សវនាការនេះ ធ្វើឡើងបន្ទាប់ពីអតីតឧបនាយករដ្ឋមន្ត្រី និងរដ្ឋមន្ត្រីក្រសួងការបរទេសនៃរបបខ្មែរក្រហម លោក អៀង សារី បានទទួលមរណភាព កាលពីថ្ងៃទី១៤ មីនា នៅមន្ទីរពេទ្យមិត្តភាពកម្ពុជា-សហព័ន្ធរុស្ស៊ី ទីក្រុងភ្នំពេញ ក្នុងវ័យ ៨៨ឆ្នាំ ដោយជំងឺ។
មរណភាពរបស់ជនជាប់ចោទ អៀង សារី បានធ្វើឱ្យក្រុមដើមបណ្ដឹងរដ្ឋប្បវេណី និងពលរដ្ឋរងគ្រោះ មានការសោកស្ដាយ និងខកចិត្តយ៉ាងខ្លាំង ខណៈដែលសវនាការសាលាក្តីខ្មែរក្រហមកំពុងតែប្រព្រឹត្តទៅដោយមិនទាន់មានសេចក្តីសម្រេចណាមួយអំពីពិរុទ្ធភាព លើបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដែលត្រូវបានចោទប្រកាន់លើរូបគាត់។
សាកសពលោក អៀង សារី ត្រូវបានបូជាកាលពីថ្ងៃព្រហស្បតិ៍ ទី២១ នៅស្រុកម៉ាឡៃ ខេត្តបន្ទាយមានជ័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។