មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ដ្រា ថ្លែងថា នៅថ្ងៃទី៣០ ខែមីនា ខាងការិយាល័យរដ្ឋបាលនៃសាលាក្ដីនេះ បានជូនដំណឹងដល់មន្ត្រី និងបុគ្គលិកខាងភាគីខ្មែរថា ខាងភាគីអន្តរជាតិបានសម្រេចផ្ដល់ថវិកាសង្គ្រោះបន្ទាន់មួយចំណែកមកដល់ភាគីខ្មែរ សម្រាប់ការចំណាយលើប្រាក់ខែដែលមិនបានបើកចាប់តាំងពីខែមករា មក។
លោក នេត្រ ភក្ដ្រា៖ «ការផ្ដល់ថវិកាសង្គ្រោះបន្ទាន់នេះ ធ្វើឱ្យភាគីជាតិហ្នឹងអាចមានថវិកាដើរដល់ខែ៤ ឆ្នាំ២០១៣។ អ៊ីចឹងមានន័យថា ប្រាក់ខែនៅក្នុងខែមករា ខែកុម្ភៈ និងខែមីនា របស់មន្ត្រីបុគ្គលិកដែលគាត់មិនទាន់ទទួលបានហ្នឹង នឹងត្រូវបើកនៅក្នុងអំឡុងពេលសប្ដាហ៍ខាងមុខ ហើយការផ្ទេរសាច់ប្រាក់ពីខាងអង្គការសហប្រជាជាតិ មកកាន់ខាងភាគីជាតិនៃសាលាក្ដីខ្មែរក្រហម នឹងធ្វើឡើងនៅដើមសប្ដាហ៍ក្រោយ។ ហើយមន្ត្រីបុគ្គលិកទាំងអស់ គាត់នឹងទទួលបានប្រាក់ខែរបស់គាត់ខែមករា ខែកុម្ភៈ និងខែមីនា នៅសប្ដាហ៍ខាងមុខ ហើយថវិកាសម្រាប់ខែមេសា ដែលជាប្រាក់របស់គាត់ គឺនឹងទទួលបានជាធម្មតានៅដំណាច់ខែមេសា»។
លោក នេត្រ ភក្ដ្រា ថ្លែងទៀតថា ការទទួលបានថវិកាសង្គ្រោះបន្ទាន់នេះ នឹងជួយដោះស្រាយដល់ជីវភាពរបស់មន្ត្រីបុគ្គលិក ដែលធ្វើការអត់ប្រាក់ខែ និងមិនមានកិច្ចសន្យាការងារអស់រយៈពេលបីខែកន្លងមកហើយ។ លោកបន្តថា ខាងការិយាល័យរដ្ឋបាលនឹងបន្តកិច្ចសន្យាការងារដល់បុគ្គលិកភាគីខ្មែរជាថ្មី នៅសប្ដាហ៍ក្រោយ ហើយមន្ត្រីបុគ្គលិកទាំងនោះនឹងយកថ្ងៃទី១ មេសា ខាងមុខ ដែលគ្រោងធ្វើពហិការផ្អាកការងារ ទៅជាថ្ងៃចូលបំពេញការងារជាធម្មតាវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។