កិច្ចដំណើរការរបស់សាលាក្ដីខ្មែរក្រហមនៅក្នុងរយៈពេល ៣ខែ ដើមឆ្នាំ២០១៣ នេះ ហាក់មិនបានប្រព្រឹត្តទៅដោយរលូនទេ ដោយហេតុថា ចេះតែមានបញ្ហារអាក់រអួលជាបន្តបន្ទាប់ ដូចជាបញ្ហាសុខភាពត្រូវបញ្ជូនជនជាប់ចោទទៅមន្ទីរពេទ្យ បញ្ហាជនជាប់ចោទ អៀង សារី ស្លាប់ និងបញ្ហាបុគ្គលិកអ្នកបកប្រែធ្វើពិការមិនបំពេញការងារ ដោយសារតែអត់ប្រាក់ខែជាដើម។ ក៏ប៉ុន្តែនៅក្នុងសប្ដាហ៍នេះ យើងសង្កេតឃើញថា សាលាក្ដីខ្មែរក្រហមហាក់មានព្រឹត្តិការណ៍គួរឱ្យកត់សម្គាល់ខ្លះៗ មកវិញ។
ព្រឹត្តិការណ៍ខ្លះៗ ទាក់ទងនឹងសាលាក្ដីខ្មែរក្រហមនៅក្នុងសប្ដាហ៍នេះមាន៖ កាលពីថ្ងៃទី ២៥ ខែមីនា ដើមសប្ដាហ៍នេះ សាលាដំបូងសាលាក្ដីខ្មែរក្រហមបានចាប់ផ្ដើមបើកសវនាការឡើងវិញ បន្ទាប់ពីបានផ្អាកចាប់តាំងពីដើមខែ ដោយសារតែជនជាប់ចោទ អៀង សារី មានបញ្ហាសុខភាព ហើយបានស្លាប់នៅមន្ទីរពេទ្យ។
ការធ្វើសវនាការឡើងវិញរបស់សាលាដំបូង គឺដើម្បីស្ដាប់សក្ខីកម្ម និងរបាយការណ៍របស់អ្នកជំនាញអន្តរជាតិពីររូប ដែលចាត់តាំងដោយសាលាដំបូង គឺលោកវេជ្ជបណ្ឌិត ស៊ីណា ហ្វាហ្សែល (Seena Fazel) មានជំនាញខាងវិកលវិទ្យា និងលោកសាស្ត្រាចារ្យ ចន ខេមប៊ែល (John Campbell) ជាអ្នកជំនាញខាងជំងឺមនុស្សចាស់។
ការស្ដាប់របាយការណ៍ និងសក្ខីកម្មរបស់អ្នកជំនាញទាំងពីរ គឺទាក់ទងនឹងការពិនិត្យស្ថានភាពសុខភាពរបស់ជនជាប់ចោទ នួន ជា ថាតើគាត់អាចចូលរួមសវនាការតទៅមុខទៀតបាន ឬមិនបាន? ពីព្រោះមួយរយៈកាលកន្លងមក ជនជាប់ចោទ នួន ជា ឧស្សាហ៍មានបញ្ហាសុខភាព ហើយសុំតាមចូលរួមសវនាការពីចម្ងាយ។
នៅក្នុងរបាយករណ៍វាយតម្លៃរបស់អ្នកជំនាញទាំងពីររូប កាលពីថ្ងៃទី២៥ មីនា បានបង្ហាញជូនអង្គជំនុំជម្រះថា ជនជាប់ចោទ នួន ជា មិនមានបញ្ហាផ្នែកសតិបញ្ញា និងស្មារតី ដែលនាំឱ្យពិបាកផ្ចង់អារម្មណ៍ទេ។
ជនចាប់ចោទ នួន ជា កាលពីពាក់កណ្ដាលខែមករា ត្រូវបានបញ្ជូនទៅពេទ្យភ្លាមៗ ដោយសារតែសុខភាពគាត់ចុះខ្សោយ ហើយដួល។
ក្រោយការស្ដាប់របាយការណ៍របស់អ្នកជំនាញ មេធាវីការពារក្ដីឱ្យជនជាប់ចោទ នួន ជា គឺលោក សុន អរុណ ជម្រាបអង្គជំនុំជម្រះថា កូនក្ដីរបស់លោកនៅមានបញ្ហាសុខភាពរ៉ាំរ៉ៃច្រើនយ៉ាង ដូចជា ជំងឺលើសឈាម បញ្ហារលាកសាច់ដុំបេះដូង ទល់លាមក និងឈឺចង្កេះ ដែលធ្វើឱ្យការចូលរួមសវនាការរបស់គាត់មិនបានពេញលេញ ហើយលោកស្នើសុំឱ្យមានការព្យាបាលកូនក្ដីរបស់លោក ឱ្យបានជាស្រួលបួលសិន មុននឹងនាំយកកូនក្ដីលោកមកចូលរួមសវនាការ។
លោកមេធាវី សុន អរុណ ថ្លែងថា កូនក្ដីរបស់លោកមិនសូវមានសមត្ថភាពចងចាំបានល្អទេ ហើយការដែលមានបញ្ហាសុខភាពរាងកាយ គឺអាចប៉ះពាល់សុខភាពផ្លូវចិត្ត ដែលជាហេតុធ្វើកូនក្ដីលោកពិបាកផ្ចង់អារម្មណ៍តាមដានស្ដាប់សវនាការ។
អ្នកជំនាញទាំងពីរ គឺលោកវេជ្ជបណ្ឌិត ស៊ីណា ហ្វាហ្សែល និងលោកសាស្ត្រាចារ្យ ចន ខេមប៊ែល ជម្រាបអង្គជំនុំជម្រះថា ក្រោយការពិនិត្យរបស់ខ្លួន តាមរយៈការធ្វើតេស្តលើស្មារតីចងចាំ ដែលមានពិន្ទុស្តង់ដារ ៣០ ជនជាប់ចោទ នួន ជា ឆ្លើយតបវិញបានពិន្ទុ ២៨ គឺជាពិន្ទុមួយខ្ពស់។ រីឯសុខភាពរាងកាយរបស់គាត់ទន់ខ្សោយ ដោយសារតែគាត់មិនបានហាត់ប្រាណ។ អ្នកជំនាញផ្ដល់យោបល់ថា ជនជាប់ចោទ នួន ជា គួរតែហាត់ប្រាណ ដើម្បីពង្រឹងសុខភាពរាងកាយ ហើយជួយឱ្យសុខភាពផ្លូវចិត្តរឹងប៉ឹងឡើងវិញ។
ក្រោយការស្ដាប់ និងពិចារណាលើរបាយការណ៍ និងសក្ខីកម្មរបស់អ្នកជំនាញទាំងពីរ គឺនៅថ្ងៃសុក្រ ទី២៩ ខែមីនា សាលាដំបូងបានប្រកាសអំពីសេចក្ដីសម្រេចផ្ទាល់មាត់ជាបឋមថា ជនជាប់ចោទ នួន ជា មានស្ថានភាពសុខភាពអាចចូលរួមសវនាការបាន។
ប្រធានអង្គជំនុំជម្រះសាលាដំបូង គឺលោកចៅក្រម និល ណុន ប្រកាសថា សាលាដំបូងសម្រេចតម្កល់សេចក្ដីសម្រេចរបស់ខ្លួនដូចកាលពីលើកមុនដដែល ដែលថា ជនជាប់ចោទ នួន ជា នៅមានសុខភាពគ្រប់គ្រាន់ក្នុងការសូលរួមសវនាការ៖ «អង្គជំនុំជម្រះសាលាដំបូងតម្កល់នូវសេចក្តីសម្រេចរបស់ខ្លួនពីពេលកន្លងទៅ ដែលបានថា ជនជាប់ចោទ នួន ជា មានកាយសម្បទា និងសតិបញ្ញាស្មារតីគ្រប់គ្រាន់ ក្នុងការចូលរួមសវនាការ។ សេចក្ដីសម្រេចជាលាយលក្ខណ៍អក្សរ ដែលមានសម្អាងហេតុពេញលេញលើបញ្ហានេះ នឹងចេញនាពេលសមស្របឆាប់ៗ ខាងមុខនេះ»។
លោកចៅក្រម និល ណុន ថ្លែងថា ការសម្រេចនេះ គឺផ្អែកលើការសន្និដ្ឋាន របាយការណ៍ និងសក្ខីកម្មថ្មីៗ របស់អ្នកជំនាញ ដែលបញ្ជាក់ច្បាស់ថា ជនជាប់ចោទ នួន ជា នៅតែមានសម្បទាចូលរួមសវនាការប្រកបដោយអត្ថន័យ ថ្វីបើជនជាប់ចោទរូបនេះមានអាយុច្រើន និងរាងកាយទន់ខ្សោយក៏ដោយ។
ទោះជាដូច្នេះក្ដី ជនជាប់ចោទ នួន ជា ដែលមានវ័យ ៨៦ឆ្នាំ បានលះបង់សិទ្ធិចូលរួមសវនាការនៅព្រឹកថ្ងៃទី២៩ មីនា ព្រោះហេតុផលមានបញ្ហាសុខភាពដដែល។
ក្រៅពីការប្រកាសអំពីបញ្ហាសុខភាពរបស់ជនជាប់ចោទ នួន ជា អង្គជំនុំជម្រះសាលាដំបូង ក៏សម្រេចរក្សាទុកការបំបែកសំណុំរឿងលេខ ០០២ ដែរ គឺដើម្បីជាការពន្លឿនការជំនុំជម្រះឱ្យឆាប់បានចេញសាលក្រម។
លោកចៅក្រម និល ណុន ប្រកាសថា ការតម្កល់ទុកសេចក្ដីសម្រេចនេះ គឺទាក់ទងនឹងការបំបែកនីតិវិធីជំនុំជម្រះ គឺសំណុំរឿង ០០២/០១ ដែលត្រូវជំនុំជម្រះលើបទឧក្រិដ្ឋជម្លៀសពលរដ្ឋលើកទី១ និងទី២ និងការសម្លាប់មនុស្សមួយកន្លែងឈ្មោះទួលពោធិ៍ជ្រៃ៖ «អង្គជំនុំជម្រះសាលាដំបូង សម្រេចតម្កល់នូវដីកាបំបែកកិច្ចដំណើរការនីតិវិធីសវនាការរបស់ខ្លួនដែលបានចេញកាលពីលើកមុន ដោយអនុលោមតាមវិធាន ៨៩ ស្ទួន ២ នៃវិធានផ្ទៃក្នុង ដោយកំណត់វិសាលភាពនៃការជំនុំជម្រះ នៅដំណាក់កាលដំបូងក្នុងសំណុំរឿង០០២ គឺសំណុំរឿង ០០២/០១ ត្រឹមតែលើការជម្លៀសប្រជាជនក្នុងដំណាក់កាលទី ១ និងក្នុងដំណាក់កាលទី ២ និងទីតាំងសម្លាប់មនុស្ស នៅទួលពោធិ៍ជ្រៃ»។
ទោះជាយ៉ាងនេះក្ដី លោកចៅក្រម និល ណុន ថ្លែងថា សេចក្ដីសម្រេចជាលាយលក្ខណ៍អក្សរលើបញ្ហាទាំងពីរនេះ នឹងប្រកាសនៅក្នុងពេលសមស្របឆាប់ៗខាងមុខនេះ។
ទន្ទឹមគ្នាដែរ លោកចៅក្រមជូនដំណឹងថា សវនាការពិនិត្យភស្តុតាងលើសំណុំរឿង ០០២/០១ ដែលត្រូវសាក្សីបន្តនឹងធ្វើនៅថ្ងៃច័ន្ទ ទី៨ ខែមេសា ឆ្នាំ២០១៣។
រីឯព័ត៌មានដែលទទួលបាននៅចុងសប្ដាហ៍នេះ គឺបញ្ហាថវិកាវិញ សម្រាប់បុគ្គលិកខាងភាគីខ្មែរ ត្រូវបានការិយាល័យរដ្ឋបាលសាលាក្ដីជូនដំណឹងថា ពួកគាត់នឹងទទួលបានរហូតដល់ចុងខែមេសា ឆ្នាំ២០១៣។
នៅថ្ងៃទី៣០ ខែមីនា ចុងសប្ដាហ៍នេះ មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ត្រា ថ្លែងថា ឱ្យដឹងថា ខាងភាគីអន្តរជាតិបានសម្រេចផ្ដល់ថវិកាសង្គ្រោះបន្ទាន់មួយចំណែកសម្រាប់បើកប្រាក់ខែឱ្យបុគ្គលិកខាងភាគីខ្មែរ ដែលមិនបានបើកចាប់តាំងពីខែមករាមក។
លោក នេត្រ ភក្ត្រា ថ្លែងបន្តថា ការទទួលបានថវិកាសង្គ្រោះបន្ទាន់នេះ គឺនឹងជួយមន្ត្រីបុគ្គលិកបានទទួលប្រាក់ខែ និងមានកិច្ចសន្យាការងារឡើងវិញ បន្ទាប់ពីមិនបានទទួលអស់រយៈពេលបីខែកន្លងមក។ លោកថ្លែងបន្តថា ជំនួយថវិកានេះ ធ្វើឱ្យបុគ្គលិកភាគីខ្មែរមានកិច្ចសន្យាការងារជាថ្មីនៅសប្ដាហ៍ក្រោយដែរហើយថ្ងៃទី១ មេសា ដែលជាថ្ងៃគ្រោងធ្វើពហិការផ្អាកការងារនឹងក្លាយទៅជាថ្ងៃដែលបុគ្គលិកនាំគ្នាចូលបំពេញការងារជាធម្មតាឡើងវិញដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។