ក្រុមអតីតនិស្សិតជនជាតិចាម និងបញ្ញវន្តមួយចំនួន កំពុងធ្វើយុទ្ធនាការរៃអង្គាសប្រាក់ ១០០លានរៀល ជួយដល់លោក អះម៉ាត់ យ៉ះយ៉ា រដ្ឋលេខាធិការក្រសួងសង្គមកិច្ច ដើម្បីសងលោកឧកញ៉ា អូស្មាន ហាស្សាន់ ដែលជាអ្នកឈ្នះក្ដីរឿងបរិហារកេរ្តិ៍។ ក្រុមយុវជនទាំងនោះកំពុងធ្វើយុទ្ធនាការរៃអង្គាសប្រាក់តាមហ្វេសប៊ុក (Facebook) ផង និងដោយផ្ទាល់ផង។
"យើងរួមគ្នាជួយអ្នកដែលហ៊ាននិយាយការពិតដើម្បីការពារផលប្រយោជន៍រួម" គឺជាពាក្យដែលក្រុមអតីតនិស្សិតជនជាតិចាម បានលើកមកនិយាយនៅក្នុងហ្វេសប៊ុក ដើម្បីធ្វើយុទ្ធនាការរៃអង្គាសប្រាក់ចំនួន ១០លានរៀលជួយដល់លោក អះម៉ាត់ យ៉ះយ៉ា រដ្ឋលេខាធិការក្រសួងសង្គមកិច្ច ដែល
សាលាដំបូងរាជធានីភ្នំពេញ បានកាត់ឲ្យចាញ់ក្ដីលោក អូស្មាន ហាស្សាន់ រដ្ឋលេខាធិការក្រសួងការងារ។
ក្រុមអតីតនិស្សិតនេះ បានធ្វើយុទ្ធនាការរៃអង្គាសប្រាក់ អ្នកខ្លះស្ម័គ្រចិត្តជួយពី ២ម៉ឺនរៀល ដល់ ១០ម៉ឺនរៀល អ្នកខ្លះទៀតលើសពីនេះ។ ការចូលរួមថវិកានេះ ដោយពួកគេបានលើកឡើងថា ពួកគាត់ត្រូវផ្ដល់កម្លាំងចិត្តដល់លោក អះម៉ាត់ យ៉ះយ៉ា នៅពេលឃើញលោកហ៊ាននិយាយការពិត ដើម្បីការពារផលប្រយោជន៍រួមហើយត្រូវគេប្ដឹង។ ក្រុមយុវជនទាំងនោះលើកឡើងថា ពួកគេក៏ជំទាស់គម្រោងធ្វើផ្លូវពុះដីវិហារបឹងកក់ ដែរ ហើយការជួយរៃអង្គាសប្រាក់ជួយលោក អះម៉ាត់ យ៉ះយ៉ា នៅពេលនេះ ក៏ដោយសារតែលោកជំទាស់គម្រោងធ្វើផ្លូវកាត់វិហារ ដែលជាទ្រព្យសម្មតិរួមរបស់អ្នកកាន់សាសនាឥស្លាម។
អតីតប្រធានក្រុមនិស្សិតខ្មែរឥស្លាមនៃសាកលវិទ្យាល័យន័រតុន លោក ស្លេះ ណាហ្សី មានប្រសាសន៍ថា ក្រុមអតីតនិស្សិតនឹងដើរធ្វើយុទ្ធនាការ ១០០លានរៀលនេះ នៅតាមបណ្ដាភូមិជនជាតិចាមនីមួយៗនៅទូទាំងប្រទេស។ លោកបញ្ជាក់ថា ជនជាតិចាម រស់នៅភូមិនីមួយៗរីករាយនឹងសហការកម្មវិធីនេះ៖ «យុទ្ធនាការហ្នឹងដំបូងឡើយយើងធ្វើតាមហ្វេសប៊ុកសិន ហើយនៅពេលបងប្អូននៅតាមខែត្រចង់ចូលរួមយើងស្វាគមន៍ ហើយឃើញថា ប៉ុន្មានថ្ងៃមកនេះ យើងឃើញមានបងប្អូននៅតាមខែត្របានទូរស័ព្ទមកសួរនាំច្រើនថា តើយុទ្ធនាការនេះនឹងចាប់ផ្ដើមនៅពេលណា? យើងនឹងចាប់ផ្ដើមនៅពេលមានសាលដីកាចុងក្រោយ»។
សាលាដំបូងរាជធានីភ្នំពេញ កាលពីថ្ងៃទី១៥ ខែសីហា បានបង្គាប់ឱ្យលោក អះម៉ាត់ យ៉ះយ៉ា បង់ប្រាក់សំណងជំងឺចិត្តចំនួន ១០០លានរៀល ទៅឱ្យលោក អូស្មាន ហាស្សាន់ ជាភាគីដើមចោទ និងពិន័យជាប្រាក់ ៥លានរៀល ដាក់ចូលថវិកាជាតិ ពីបទបរិហារកេរ្តិ៍ជាសាធារណៈតាមមាត្រា ៣០៥ នៃក្រមព្រហ្មទណ្ឌ ប្រព្រឹត្តទៅនៅរាជធានីភ្នំពេញ កាលពីថ្ងៃទី២៨ មេសា ឆ្នាំ២០១៦។
ការប្រកាសសាលក្រមនេះ នៅក្រោយពេលសាលាដំបូងបានបើកសវនាការជំនុំជម្រះកាលពីថ្ងៃទី២ ខែសីហា ដែលលោក អះម៉ាត់ យ៉ះយ៉ា គ្មានមេធាវីការពារក្ដី ដោយសារគ្មានលុយជួលមេធាវី។ រីឯលោក អូស្មាន ហាស្សាន់ វិញ មានមេធាវីការពារក្ដីចំនួនពីររូប។
លោក អះម៉ាត់ យ៉ះយ៉ា បានច្រានចោលភ្លាមៗ កាលពីថ្ងៃទី១៥ ខែសីហា ក្រោយពេលតុលាការប្រកាសសាលក្រម។ លោកសោកស្ដាយចំពោះសាលាដំបូងរាជធានីភ្នំពេញ ដែលសម្រេចក្តីមិនឈរលើយុត្តិធម៌ និងភស្តុតាងត្រឹមត្រូវបែបនេះ៖ «យើងមានភស្តុតាងគ្រប់គ្រាន់ ប៉ុន្តែខ្ញុំអត់យល់ ខ្ញុំដឹង ខ្ញុំមានការសោកស្ដាយដែលតុលាការកាត់ឲ្យខ្ញុំចាញ់ទៅវិញ តើតុលាការកាត់សំអាងលើស្អី? ក្រែងតុលាការកាត់សេចក្ដីយោងលើភស្តុតាង? ខ្ញុំអត់យល់សោះ ឥឡូវហ្នឹង ខ្ញុំមានភស្តុតាង»។
ក្រោយពីតុលាការប្រកាសសាលក្រមឲ្យលោក អះម៉ាត់ យ៉ះយ៉ា ចាញ់ក្ដី លោក អូស្មាន ហាស្សាន់ នោះ លោកបានបកស្រាយបញ្ហានេះថតជាវីដេអូ ផ្សព្វផ្សាយតាមបណ្ដាញសង្គមហ្វេសប៊ុក ដោយលោកថែមទាំងបានបង្ហាញឯកសារភស្តុតាងដែលជាគម្រោងប្លង់គូរពុះផ្លូវកាត់វិហារបឹងកក់ និងគម្រោងសាងសង់អគារខុនដូទំនើបនៅក្នុងបរិវេណនោះផង ដែលលោកអះអាងថា ជាគម្រោងដែលលោក អូស្មាន ហាស្សាន់ និងសហការីគូរផ្ញើទៅសាលារាជធានីភ្នំពេញ៖ «យើងបានទៅប្រជុំនៅថ្ងៃទី១៣ ខែ៣ ឆ្នាំ២០១៣ សាលារាជធានីភ្នំពេញ បានអញ្ជើញខ្ញុំ អូស្មាន ហាស្សាន់ មូហ្វទី ។ល។ និង ។ល។ ចូលក្នុងអង្គប្រជុំ ហើយគេចែកឯកសារនេះក្នុងអង្គប្រជុំ ហើយខ្ញុំបានសួរ អូស្មាន ហាស្សាន់ ថា អ្នកណាជាអ្នកគូរប្លង់នេះ អូស្មាន ហាស្សាន់ បានឆ្លើយប្រាប់ខ្ញុំខ្សឹបៗតិចៗថា ខ្ញុំនិងសហការីជាអ្នកគូរ (ប្លង់) ហើយជាការពិតខ្ញុំសូមអានឯកសារនេះជូនផ្ទៃដីដែលវិហារឥស្លាម ដែលស្នើសុំសាលារាជធានីភ្នំពេញ មានផ្ទៃដីបំពេញជុំវិញទំហំ ៤៨៣០.៤០ម៉ែត្រការ៉េ ស្នើសុំឲ្យសាលារាជធានីភ្នំពេញ ជាអ្នកសម្រេច»។
លោក អះម៉ាត់ យ៉ះយ៉ា ឲ្យដឹងថា លោកនឹងរកមេធាវីដើម្បីដាក់ពាក្យប្ដឹងទៅសាលាឧទ្ធរណ៍ឆាប់ៗនេះ។ លោកបញ្ជាក់ថា មូលហេតុសំខាន់ដែលលោក អូស្មាន ហាស្សាន់ ប្ដឹងលោកពីបទបរិហារកេរ្តិ៍នោះ គឺក្រោយពីលោកបានផ្ដល់បទសម្ភាសន៍ជាមួយសារព័ត៌មានថ្មីៗ ដោយលោកលើកឡើងថា លោក អូស្មាន ហាស្សាន់ ជាអ្នកគូរប្លង់ពុះដីវិហារបឹងកក់ និងគ្រោងសាងសង់អគារខុនដូជូនទៅសាលារាជធានីភ្នំពេញ ដើម្បីដោះដូរមានផលប្រយោជន៍ តែលោកមិនបានចោទថា លោក អូស្មាន ហាស្សាន់ ជាអ្នកបានផលប្រយោជន៍នោះទេ។
ឆ្លើយតបនឹងបញ្ហានេះ រដ្ឋលេខាធិការក្រសួងការងារ លោក អូស្មាន ហាស្សាន់ ធ្លាប់បានបដិសេធថា លោកមិនមែនជាអ្នកស្នើសុំទៅសាលារាជធានីភ្នំពេញ គឺសាលារាជធានីភ្នំពេញ ទៅវិញទេ ដែលជាអ្នកស្នើសុំពុះដីកាត់វិហារ បឹងកក់នេះ៖ «បើ សិនណាជាលោកមិនបានឃើញលិខិតគ្រប់កុំអាលផ្សាយទៅវាល្អជាង វាមានលិខិតពីដើមមកទើបមានអាក្រោយហ្នឹង។ ហ្សាការីយ៉ា៖ ឯកឧត្ដមអាចបញ្ចេញលិខិតពីដើមមកបានទេ? អូស្មាន ហាស្សាន់៖ សាលាក្រុងមានទៅយកទៅ។ ហ្សាការីយ៉ា៖ អ៊ីចឹងលិខិតនោះ មិនមែនឯកឧត្ដមជាអ្នកស្នើសុំឲ្យពុះផ្លូវទេ? អូស្មាន ហាស្សាន់៖ មិនមែនទេ គឺសាលាក្រុងគាត់ស្នើសុំបើកផ្លូវហ្នឹង បន្ទាប់ពីអភិវឌ្ឍន៍តំបន់បឹងកក់ អ៊ីចឹងវាមានផ្លូវ R1, R2, R3, R4 នៅយើងនេះ។ ហ្សាការីយ៉ា៖ អ៊ីចឹងឯកឧត្ដមនឹងធ្វើប្រជាមតិលើរឿងហ្នឹង? អូស្មាន ហាស្សាន់៖ អត់ទេ យើងគិតថា អ្វីដែលយើងធ្វើទៅ ព្រោះបើអាវយើងប្រឡាក់យើងដឹងតើ បើប្រឡាក់យកទៅបោកឲ្យល្អហើយ»។
ទោះជាបែបនេះក្ដី នៅក្នុងបទសម្ភាសន៍ជាមួយសារព័ត៌មានថ្មីៗ កាលពីខែមេសា ឆ្នាំ២០១៦ នាយករដ្ឋបាលសាលារាជធានី លោក មាស ចាន់យ៉ាដា បញ្ជាក់ថា គម្រោងធ្វើផ្លូវនេះ គឺមានការឯកភាពពីលោក អូស្មាន ហាស្សាន់ និងលោក វ៉ាន់ ម៉ាត់៖ «យើង ទាំងអស់គ្នាមិនឯកភាពថា មិនឲ្យធ្វើទេ។ សាលាក្រុងគេធ្វើសិទ្ធិលើគេហើយ តែយើងខ្ញុំនឹងតវ៉ាទៀត គឺតវ៉ាទៅសម្ដេច ហ៊ុន សែន ថាតើសម្ដេច ហ៊ុន សែន គាត់យល់ព្រមអត? តែខ្ញុំជឿជាក់ថា សម្ដេច ហ៊ុន សែន នឹងយល់ព្រមធ្វើអ៊ីចឹងទេ»។
ចំពោះគម្រោងសាងសង់អគារសម្រាប់ជួលនៅក្នុងបរិវេណវិហារបឹងកក់វិញ លោក អូស្មាន ហាស្សាន់ ទទួលស្គាល់ថា លោកពិតជាមានគម្រោងសាងសង់អគារសម្រាប់ជួលមែន ដើម្បីស្វែងរកចំណូលផ្គត់ផ្គង់វិហារ៖ «ក្នុងបរិវេណនោះនឹងធ្វើអ្វីដែលរកចំណូលបាន ដូចជា apartment ឬ Resort ដែលរកចំណូលបាន»។
ទាក់ទងនឹងបញ្ហានេះ ទាំងគម្រោងផ្លូវពុះដីវិហារបឹងកក់ និងគម្រោងសាងសង់អគារនៅក្នុងបរិវេណនោះ សាសនិកឥស្លាមដែលជាចំណុះវិហារបឹងកក់ ស្ទើរតែទាំងអស់មិនគាំទ្រឡើយ។ នៅរៀងរាល់ថ្ងៃសុក្រ កាលពីខែមេសា ដែលជាពេលតវ៉ាឥតឈប់ឈរនៅពេលក្រុមសន្តិសុខសាលារាជធានីភ្នំពេញ ទៅវាយរបងវិហារនោះ គឺពួកគេបាននាំគ្នាតវ៉ា និងទប់ស្កាត់មិនឲ្យមានការពុះធ្វើផ្លូវ ឬសាងសង់អ្វីនៅក្នុងបរិវេណនោះឡើយ។
សាសនិកឥស្លាមនៅភូមិពង្រ ស្រុកឆ្លូង ខែត្រក្រចេះ លោក លី ជិ ឲ្យដឹងថា ពលរដ្ឋនៅភូមិរបស់លោកស្ទើរតែទាំងអស់មិនគាំទ្រចំពោះសកម្មភាពណាមួយដែលធ្វើឲ្យប៉ះពាល់ដល់បរិវេណវិហារបឹងកក់ទេ កុំថាឡើយដល់ទៅពុះផ្លូវកាត់វិហារបឹងកក់។ លោកបញ្ជាក់ថា ពួកលោកក៏នឹងចូលរួមធ្វើយុទ្ធនាការរៃអង្គាសប្រាក់ដើម្បីជួយដល់លោក អះម៉ាត់ យ៉ះយ៉ា ដែរ ព្រោះថា លោកជាអ្នកដែលទប់ស្កាត់មិនឲ្យមានការពុះដីវិហារបឹងកក់ ដោយសារដីវិហារឥស្លាមមិនខុសពីដីវត្តព្រះពុទ្ធសាសនាដែរ គឺមិនអនុញ្ញាតឲ្យអ្នកណាជ្រៀតជ្រែក ឬចង់យកអភិវឌ្ឍន៍ធ្វើអ្វីនោះឡើយ៖ «ខ្ញុំ យល់ឃើញថា លោក អះម៉ាត់ យ៉ះយ៉ា បានជួយគេជាច្រើន ដូចជាជួយនិស្សិត បង់សាលាឲ្យនិស្សិត ហើយថវិកាដែលលោករកបានមក លោកតែងតែជួយក្នុងផលប្រយោជន៍រួម»។
ក្រុមអតីតនិស្សិត និងប្រជាពលរដ្ឋមួយចំនួនលើកឡើងថា ពួកគាត់នឹងជំទាស់គម្រោងធ្វើផ្លូវនេះដល់ទីបញ្ចប់ ហើយពួកគេក៏នឹងធ្វើយុទ្ធនាការរៃអង្គាសប្រាក់ឲ្យបានគ្រប់ ១០០លានរៀល បើសិនជាសាលាឧទ្ធរណ៍នៅតែកាត់ឲ្យលោក អះម៉ាត់ យ៉ះយ៉ា ចាញ់ក្ដីលោក អូស្មាន ហាស្សាន់ ទៀតនោះ ដោយសារថា នៅក្នុងច្បាប់ឥស្លាមចាត់ទុកដីបរិវេណវិហារ ដូចវិហារដែរ ដែលមិនអនុញ្ញាតឲ្យពុះ ឬកាត់ច្រៀកធ្វើអ្វីទេ ក្រៅពីតម្រូវការចាំបាច់របស់សាសនាឥស្លាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។