មនុស្សជាង ២០នាក់រងរបួសស្រាល ដោយសារចម្ពាមកៅស៊ូប្រើគ្រាប់ដែក និងដុំថ្ម នៅអំឡុងពេលប៉ះទង្គិចគ្នារវាងប្រជាពលរដ្ឋនៅឃុំតាជេស ក្នុងខេត្តកំពង់ឆ្នាំង ជាមួយកម្លាំងកម្មករស៊ីឈ្នួលកាប់ព្រៃ និងធ្វើរបងឲ្យក្រុមហ៊ុន ខេ.ឌី.ស៊ី (KDC) របស់ លោកស្រី ជា ខេង ភរិយា លោក ស៊ុយ សែម ជារដ្ឋមន្ត្រីក្រសួងរ៉ែ និងថាមពល។ ក្រុមមន្ត្រីសិទ្ធិមនុស្សដែលបានឃ្លាំមើលសកម្មភាពនេះ បានរិះគន់សមត្ថកិច្ចថាមិនសូវអើពើ និងទុកឲ្យស្ថានភាពប៉ះទង្គិចគ្នានេះកាន់តែធ្ងន់ធ្ងរទៅ។
ការប៉ះទង្គិចគ្នា បានចាប់ផ្ដើមតាំងពីម៉ោងប្រហែលជា ១២ថ្ងៃត្រង់ ថ្ងៃទី១៧ ខែកក្កដា បន្តរហូតមកដល់ម៉ោងជិត ៤រសៀល បណ្ដាលឲ្យខាងអ្នកភូមិរងរបួសចំនួន ១៣នាក់ និងខាងកម្មករក្រុមហ៊ុនចំនួន ១០នាក់។ សកម្មភាពប្រើចម្ពាមដេញបាញ់គ្នាចុះឡើងនេះ គឺនៅបន្ទាប់ពីក្រុមអ្នកភូមិព្យាយាមវាយទម្លុះរបងក្រុមហ៊ុន ដែលពួកគាត់អះអាងថា កំពុងធ្វើរំលោភយកដីរបស់ពួកគាត់។
ប្រជាពលរដ្ឋម្នាក់មកពីភូមិបឹងកក់ អ្នកស្រី ប៊ិន អូន មានប្រសាសន៍ថា ប្រសិនបើក្រុមហ៊ុនធ្វើរបងព័ទ្ធជាប់លើដីកំពុងមានជម្លោះនោះ គឺការតវ៉ាទាមទាររកដំណោះស្រាយជូនអ្នកភូមិហ្នឹងកាន់តែលំបាក។ អ្នកស្រីសុខចិត្តប្ដូរជីវិតក្នុងសកម្មភាពហាមឃាត់មិនឲ្យក្រុមហ៊ុនធ្វើរបងគ្រប់ពេល លុះត្រាតែមានដំណោះស្រាយផ្លូវការជាមុនសិន៖ «ខ្ញុំចង់ឲ្យពូ ហ៊ុន សែន មកដោះស្រាយឲ្យខ្ញុំវិញ ហើយជំទាវហ្នឹង ពួកខ្ញុំឈឺចាប់ណាស់ដែលយកដីពួកខ្ញុំ ហើយមានជួលកម្មករមកបាញ់ពួកខ្ញុំទៀត ខ្ញុំឈឺចាប់ណាស់ ខ្ញុំនិយាយអត់ចង់កើតទេ ខ្ញុំឈឺចាប់ណាស់»។
ទាក់ទងបញ្ហានេះ តំណាងក្រុមហ៊ុន ខេ.ឌី.ស៊ី លោក ថៃ ហ៊ី បដិសេធមិនធ្វើអត្ថាធិប្បាយអ្វីច្រើននោះទេ ដោយលោកគ្រាន់តែបង្ហើបថា ក្រុមកម្មករ និងអ្នកភូមិបានបាញ់គ្នាទៅវិញទៅមក ក្រោយពីអ្នកភូមិវាយរបងក្រុមហ៊ុនធ្លុះជាច្រើនកន្លែង។
ចំណែកនាយប៉ុស្តិ៍នគរបាលរដ្ឋបាលឃុំតាជេស លោក ជួប ចាន់ធឿន ថ្លែងដោយសុំមិនឲ្យថតសំឡេងថា កម្លាំងសមត្ថកិច្ចលោកមិនហ៊ានចូលទៅជួយអន្តរាគមន៍ភ្លាមៗនោះទេ ដោយកន្លងមកក្រុមអ្នកភូមិចោទសមត្ថកិច្ចថាការពារដីឲ្យក្រុមហ៊ុន រួចក៏នាំគ្នាបាញ់គ្រាប់ចម្ពាមត្រូវទាំងសមត្ថកិច្ចទៀតផង។ លោកសម្គាល់ថា ក្រុមអ្នកភូមិតែងតែពុះកញ្ជ្រោលតវ៉ាខ្លាំង នៅពេលដែលមានមន្ត្រីសិទ្ធិមនុស្ស ឬមន្ត្រីគណបក្សប្រឆាំងចូលទៅឃ្លាំមើលសកម្មភាពពួកគាត់។
ការប្រឈមមុខដាក់គ្នា បានបញ្ចប់នៅម៉ោងជិត ៤រសៀល បន្ទាប់ពីអធិការស្រុកកំពង់ត្រឡាច និងកម្លាំងសមត្ថកិច្ចចម្រុះប្រហែលជា ៥០នាក់ ចូលទៅអន្តរាគមន៍។ ចំណែករឿងវាយរបងទម្លុះ ក្រុមអ្នកភូមិបានចោទក្រុមកម្មករក្រុមហ៊ុនជាអ្នកវាយមុន ដើម្បីយកប្រឡោះបាញ់ពួកគាត់ ប៉ុន្តែសមត្ថកិច្ចសន្និដ្ឋានថា ក្រុមអ្នកភូមិជាអ្នកវាយទម្លុះរបងនោះ ដោយយោងលើកម្ទេចរបងថ្មខ្ទាតចូលផ្នែកខាងក្នុងដីក្រុមហ៊ុន។
អធិការនគរបាលស្រុកកំពង់ត្រឡាច លោក ហ៊ុល វាសនា ថ្លែងបញ្ជាក់ថា ខាងលោកគ្រាន់តែបានហាមឃាត់មិនឲ្យមានអំពើហិង្សាធ្ងន់ធ្ងរកើតឡើង រវាងក្រុមកម្មករស៊ីឈ្នួលឲ្យក្រុមហ៊ុន និងអ្នកភូមិកើតឡើងប៉ុណ្ណោះ ចំពោះដំណោះស្រាយរឿងដីធ្លីយ៉ាងណានោះ គឺជាសមត្ថកិច្ចរបស់ថ្នាក់លើ៖ «ខ្ញុំរាយការណ៍ជូនថ្នាក់លើ ហើយចាំមើលថ្នាក់លើមានវិធានការយ៉ាងម៉េច? ប៉ុន្តែកម្លាំងដែលខ្ញុំមកនេះ គឺរក្សាការពារកុំឲ្យមានអំពើហិង្សាចង់ឲ្យមានសណ្ដាប់ធ្នាប់ តែឥឡូវវាដូចជាបាត់បង់សណ្ដាប់ធ្នាប់អស់ហើយ វាទៅជារញ៉េរញ៉ៃពេញហ្នឹងហើយ»។
ប្រធានផ្នែកបច្ចេកទេសស៊ើបអង្កេតនៃអង្គការសិទ្ធិមនុស្សលីកាដូ (Licadho) លោក អំ សំអាត យល់ថា ការមិនសូវអើពើរបស់សមត្ថកិច្ច គឺអាចធ្វើឲ្យស្ថានការណ៍ប្រឈមមុខដាក់គ្នានេះកាន់តែធ្ងន់ធ្ងរទៅ។ លោកផ្ដល់អនុសាសន៍ថា ដើម្បីជៀសវាងការចោទប្រកាន់ដាក់គ្នាថា ប្រជាពលរដ្ឋ ឬភាគីក្រុមហ៊ុនជាអ្នកធ្វើបំពានច្បាប់នោះ គេគប្បីបើកការស៊ើបអង្កេតឲ្យបានច្បាស់សាល់ ទៅលើដីដែលកំពុងមានជម្លោះនោះជាមុនសិន៖ «យកតុលាការធ្វើជាដំណោះស្រាយក្នុងការប្ដឹងផ្ដល់នោះ បានន័យថា ប្រជាពលរដ្ឋដែលរងគ្រោះ ហើយគាត់ត្រូវរងគ្រោះបន្ថែមទៀត អាហ្នឹង គឺជាការដាក់បន្ទុក ឬក៏ជាបញ្ឆេះកំហឹងសម្រាប់ប្រជាពលរដ្ឋជាបន្តទេបាទ»។
ស្ថានភាពប្រឈមមុខដាក់គ្នា និងប៉ះទង្គិចគ្នាដោយគ្រាប់ចម្ពាម រវាងក្រុមអ្នកភូមិ និងក្រុមកម្មករ បានកើតឡើងជាបន្តបន្ទាប់ ចាប់តាំងពីថ្ងៃទី៤ ខែកក្កដា ឆ្នាំ២០១៤។ នៅអំឡុងពេលនៃការប៉ះទង្គិចគ្នានេះ ខាងតុលាការខេត្តកំពង់ឆ្នាំង បានចេញដីកាកោះហៅប្រជាពលរដ្ឋចំនួន ៣នាក់ គឺទី១ឈ្មោះ ស្ងួន ញឿន ទី២ឈ្មោះ ស្រ៊ុន ផា និងទី៣ឈ្មោះ គុជ ហុក ឲ្យចូលខ្លួនទៅបំភ្លឺនៅថ្ងៃទី៦ ខែសីហា ឆ្នាំ២០១៤ ទាក់ទងនឹងសកម្មភាពដុតរោងប្រក់តង់របស់កម្មករស៊ីឈ្នួលកាប់ព្រៃ និងធ្វើរបងឲ្យក្រុមហ៊ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។