ប្រជាពលរដ្ឋចំណាកស្រុកមកតាំងទីលំនៅក្នុងព្រៃអភិរក្សឃុំរយ៉ ស្រុកកោះញែក ខេត្តមណ្ឌលគិរី អះអាងថា រោងប្រក់កៅស៊ូប្រមាណ ៣០រោងថ្មីទៀត ត្រូវបានក្រុមសមត្ថកិច្ចចម្រុះរុះរើដុតបំផ្លាញចោល និងបង្ខំឲ្យអ្នកតាំងទីលំនៅចាកចេញពីតំបន់នោះនៅព្រឹកថ្ងៃទី១៦ ខែធ្នូ។
តំណាងអ្នកភូមិ លោក កែវ វុទ្ធី មានប្រសាសន៍បញ្ជាក់ថា នេះជាសកម្មភាពប្រើអំពើហិង្សាលើកទី៤ របស់អាជ្ញាធរស្រុកមកលើប្រជាពលរដ្ឋក្រីក្រចាកចេញពីស្រុកកំណើតជិត ២០០គ្រួសារ ដើម្បីរកដីថ្មីប្រកបរបរកសិកម្មចិញ្ចឹមជីវិត។ លោកបន្តថា កន្លងទៅគណៈកម្មការទី១រដ្ឋសភា បានអន្តរាគមន៍ទៅអាជ្ញាធរខេត្ត ឲ្យផ្អាកអនុវត្តការរុះរើដោយបង្ខំ និងសិក្សាពីលទ្ធភាពផ្តល់ដីសម្បទានសង្គមកិច្ច ជូនពលរដ្ឋជិត ២០០គ្រួសារនៅតំបន់នោះ ក៏ប៉ុន្តែក្រុមអាជ្ញាធរមិនបានឆ្លើយតបលិខិតអន្តរាគមន៍នោះទេ៖ «គ្មានសួរស្អីទេ មកឃើញផ្ទះមើលៗពួកខាងកម្លាំងគេហ្នឹង យកពួរទាញផ្ទះធំៗហ្នឹងទាញទម្លាក់ៗ ហើយដុតចាក់សាំងដុតៗ។ ឥឡូវកំពុងដុតបន្តជាងម្ភៃសាមសិបតង់ទៀត»។
ឆ្លើយតបបញ្ហានេះ នាយខុទ្ទកាល័យសាលាខេត្តមណ្ឌលគិរី លោក មឹង សុចន្ថា មានប្រសាសន៍បញ្ជាក់ថា អាជ្ញាធរខេត្តបានផ្តល់របាយការណ៍ពីករណីអ្នកភូមិមកតាំងទីលំនៅខុសច្បាប់ ក្នុងតំបន់ព្រៃការពាររបស់រដ្ឋ ជូនក្រសួងមហាផ្ទៃ ដើម្បីធ្វើរបាយការណ៍បំភ្លឺជូនគណៈកម្មការទី១រដ្ឋសភា។ លោកបន្តថា អ្នកភូមិត្រូវវិលទៅភូមិស្រុកវិញ ហើយស្នើសុំដីសម្បទានសេដ្ឋកិច្ច តាមរយៈអាជ្ញាធរមូលដ្ឋានពួកគាត់រស់នៅ ប្រសិនអ្នកភូមិណាគ្មានដីពិតប្រាកដ ទើបអាជ្ញាធរខេត្តមណ្ឌលគិរី មានមូលដ្ឋានស្នើសុំទៅរាជរដ្ឋាភិបាលផ្តល់ដីសម្បទានសង្គមកិច្ច សម្រាប់ពលរដ្ឋចំណាកស្រុកទាំងនោះ។
កាលពីពាក់កណ្ដាលខែកញ្ញា និងខែតុលា កងកម្លាំងចម្រុះមានកងរាជអាវុធហត្ថ នគរបាល និងយោធា ដឹកនាំដោយអភិបាលរងស្រុកកោះញែក លោក អ៊ុក មុនិន បានយកគ្រឿងចក្រមកកាយផ្ដួលរំលំផ្ទះធ្វើពីឈើប្រក់ស័ង្កសីរបស់ពលរដ្ឋអស់ប្រមាណ ៥០ខ្នង លុបអណ្ដូងទឹករឹបអូសសម្ភារៈប្រើប្រាស់ អង្ករបរិភោគ បាញ់គំរាម និងពោលពាក្យជេរប្រមាថប្រជាពលរដ្ឋទាំងនោះទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។