អភិបាលសាលារាជធានីភ្នំពេញ លោក ប៉ា សុជាតិវង្ស បានសន្យាថានឹងចាប់ផ្ដើមចុះវាស់វែងដីក្នុងទីតាំងបឹងកក់ ទំហំ ១២,៤៤ហិកតារ ជូនអ្នកភូមិបឹងកក់ ចំនួន ៣២គ្រួសារ ក្នុងចំណោម ៧៦គ្រួសារ នៅថ្ងៃទី២៣ តុលា កន្លងទៅ។ តែមកទល់ថ្ងៃទី២៥ តុលា នេះហើយ អ្នកភូមិបឹងកក់ នៅមិនទាន់ឃើញក្រុមមន្ត្រីសាលារាជធានីចុះមកវាស់ដីឲ្យពួកគាត់។
ឆ្លើយតបទៅនឹងសេចក្ដីព្រួយបារម្ភនេះ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានបញ្ជាក់នៅថ្ងៃទី២៥ តុលា ថា មូលហេតុដែលអាជ្ញាធររាជធានីភ្នំពេញ មិនបានចុះទៅវាស់ដីជូនអ្នកភូមិបឹងកក់ តាមសន្យានោះ គឺដោយសារក្រុមមន្ត្រីជាប់រវល់ការងារការពារសន្តិសុខ ក្នុងពេលដែលបក្សសង្គ្រោះជាតិ ធ្វើមហាបាតុកម្មបីថ្ងៃនេះ។
អភិបាលសាលារាជធានីភ្នំពេញ លោក ប៉ា សុជាតិវង្ស បានសន្យាថានឹងវាស់ដី និងផ្ដល់ប័ណ្ណកាន់កាប់ដីស្របច្បាប់ជូនអ្នកភូមិបឹងកក់ គ្រប់ៗគ្នា ដែលការសម្រេចនេះធ្វើឲ្យអ្នកភូមិបឹងកក់ ធ្លាប់នាំគ្នាតវ៉ាអស់ជាច្រើនឆ្នាំមកហើយនោះ បានអបអរយ៉ាងខ្លាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។