ប្រជាពលរដ្ឋមកពីបណ្ដាខេត្តនានា រួមមានខេត្តព្រៃវែង ស្វាយរៀង តាកែវ កំពង់ចាម និងខេត្តស្ទឹងត្រែង ជាង ៦០គ្រួសារ បាននាំគ្នាមកកាប់ឆ្ការព្រៃត្រៀមបម្រុងនៅខេត្តរតនគិរី ហើយវាស់វែងចែកគ្នាសង់រោងស្នាក់នៅក្រោមហេតុផលថា ពួកគេគ្មានដីប្រកបរបរចិញ្ចឹមគ្រួសារ។ មន្ត្រីអាជ្ញាធរចាត់ទុកបញ្ហានេះថា ជាការចូលកាន់កាប់ដីរដ្ឋបែបអនាធិបតេយ្យ ហើយអំពាវនាវឲ្យអ្នកភូមិចាកចេញ ដោយរៀបចំឯកសារស្នើសុំដីសម្បទានសង្គមកិច្ច ប្រសិនពួកគេគ្មានដីប្រាកដមែន។
ដីព្រៃត្រៀមបម្រុងរបស់រដ្ឋចំនួន ៣០ហិកតារ ត្រូវបានប្រជាពលរដ្ឋចំណាកស្រុកចូលមកកាប់រាន ហើយចាប់យកដីសង់ខ្ទមស្នាក់នៅ ឋិតនៅអតីតផ្លូវជាតិលេខ៧៨អា ក្នុងភូមិបី ឃុំត្រពាំងក្រហម ស្រុកកូនមុំ ខេត្តរតនគិរី។
ការកាប់រានព្រៃរបស់ពលរដ្ឋនេះ ធ្វើតាំងពីដើមឆ្នាំរហូតមក ក៏ប៉ុន្តែការចូលមកវាស់វែងចែកដីសង់រោងស្នាក់នៅ ធ្វើឡើងចាប់ពីខែមិថុនា រហូតបច្ចុប្បន្ន។
មេឃុំត្រពាំងក្រហម លោក ឯម អឿន បញ្ជាក់ថា ប្រជាពលរដ្ឋដែលមកតាំងលំនៅនេះគឺជាក្រុមអនាធិបតេយ្យចូលមកកាប់ឆ្ការព្រៃបម្រុងរបស់រដ្ឋយកដីខុសច្បាប់ ហេតុនេះអាជ្ញាធរបានណែនាំឲ្យពួកគេចាកចេញ។ លោកបន្តថា អាជ្ញាធរភូមិឃុំមិនបានឯកភាព ឬផ្តល់ការអនុញ្ញាតណាមួយដល់ពលរដ្ឋចំណាកស្រុកទាក់ទិនការតាំងលំនៅក្នុងដីព្រៃបម្រុងរបស់រដ្ឋនោះឡើយ៖ «ដីហ្នឹងចាប់អនាធិបតេយ្យទេ អត់មានអ្នកណាអនុញ្ញាតឲ្យនៅទេ។ បោះបង្គោលចោលដូចរោងចាំចាបអ៊ីចឹង។ មនុស្សមិនដឹងនៅឯណាផង ឥឡូវឃើញមកហើយ មិនដឹងយ៉ាងម៉េចទេ ប៉ុន្តែត្រូវតែចេញ»។
កាលពីសប្ដាហ៍មុនអាជ្ញាធរប៉ូលិសស្រុកកូនមុំ បានអញ្ជើញប្រជាពលរដ្ឋដែលតាំងលំនៅថ្មីមកសាកសួរនៅអធិការដ្ឋានប៉ូលិស ក៏ប៉ុន្តែក្រុមអ្នកតាំងលំនៅថ្មីលើកគ្នារាប់សិបនាក់មកអធិការដ្ឋានប៉ូលិសហើយបញ្ជាក់ថា ពួកគេគឺជាអ្នកគ្មានដីទើបនាំគ្នាមកកាប់ឆ្ការយកដីដោយសារដីតំបន់នោះនៅទំនេរ។
ប្រជាពលរដ្ឋចំណាកស្រុកមកពីខេត្តកំពង់ចាម អ្នកស្រី ធន សុផល បញ្ជាក់ថា ពួកគាត់សុទ្ធសឹងតែជាអ្នកក្រីក្រមកពីខេត្តផ្សេងៗគ្នា បច្ចុប្បន្នខ្លះកំពុងធ្វើកម្មករនៅតាមការដ្ឋានចំការកៅស៊ូក្រុមហ៊ុន ខ្លះទៀតស៊ីឈ្នួលនៅតាមចំការគ្រួសាររបស់អ្នកភូមិ។ ពួកគាត់បានចាកចេញពីស្រុកកំណើតមកខេត្តរតនគិរី ដោយសារនៅស្រុកកំណើតគ្មានដីប្រកបរបរចិញ្ចឹមជីវិត ទើបនាំគ្នាមកធ្វើកម្មករនៅខេត្តរតនគិរី ច្រើនឆ្នាំកន្លងទៅនេះ។
អ្នកស្រីសុំការអនុគ្រោះពីអាជ្ញាធរពាក់ព័ន្ធ និងស្នើសុំអាជ្ញាធរខេត្តផ្ដល់ដីមួយចំណែកតូចសម្រាប់តាំងលំនៅធ្វើជម្រកចិញ្ចឹមកូននៅក្នុងបន្ទុកចំនួន ៩នាក់៖ «ឲ្យប្រជាពលរដ្ឋមានកន្លែងរស់នៅថា កន្លែងណាដែលរដ្ឋអធ្យាស្រ័យបានឲ្យលោកអនុគ្រោះឲ្យកូនចៅផង ព្រោះកូនចៅសុទ្ធតែអ្នកក្រីក្រ។ប្អូនសុំនៅត្រង់ហ្នឹងដែរ តែលោកមេភូមិគាត់ថា ដីហ្នឹងដីបម្រុងទេ គេមិនឲ្យប្រជាជននៅទេ»។
ប្រជាពលរដ្ឋចំណាកស្រុកទាំងនោះទើបធ្វើរោងប្រក់កៅស៊ូបានបីទៅបួនរោងតែប៉ុណ្ណោះ ក្រៅពីនោះអ្នកខ្លះបានកាប់ឆ្ការព្រៃយកចំណែកដីគ្រោងសង់រោងស្នាក់ និងខ្លះទៀតកំពុងភ្ជួររាស់ធ្វើស្រែ។
ប្រជាពលរដ្ឋចំណាកស្រុកទាំងនោះបញ្ជាក់ថា បានធ្វើលិខិតស្នើសុំដីសម្បទានសង្គមកិច្ចដាក់ជូនអាជ្ញាធរស្រុកកូនមុំជួយផ្ដល់ដីឲ្យពួកគាត់បានសង់ខ្ទមរស់នៅ ក៏ប៉ុន្តែលិខិតស្នើសុំនោះគ្មានការបញ្ជាក់ពីអាជ្ញាធរភូមិកំណើតគាត់នោះឡើយ។
អធិការប៉ូលិសស្រុកកូនមុំ លោក ភោគ បូរិទ្ធ មានប្រសាសន៍ថា គោលការណ៍អាជ្ញាធរមូលដ្ឋានមិនអនុញ្ញាតឲ្យប្រជាពលរដ្ឋតាំងលំនៅទីនោះបានទេ ពីព្រោះតំបន់នោះជាដីព្រៃបម្រុងទុករបស់អាជ្ញាធរខេត្ត។ លោកថា អាជ្ញាធរស្រុកកំពុងអញ្ជើញប្រជាពលរដ្ឋចំណាកស្រុកទាំងនោះមកសាកសួរបន្ត ដើម្បីរកមូលហេតុនាំឲ្យពួកគាត់មកកាប់ឆ្ការព្រៃរដ្ឋចាប់យកដីនេះ៖ «គាត់កាប់ព្រៃតាមបណ្ដោយផ្លូវចាស់ដីហ្នឹងវាស្មើជាង ៣០ហិកតារ គាត់មកធ្វើជារោងយកកូនឈើ ធ្វើរោងប្រក់តង់នៅ។ ក្រៅពីហៅគាត់មកសួរនាំ និងបង្អាក់គាត់ឲ្យឈប់បន្តសកម្មភាពអត់ទាន់មានវិធានការអ្វីទាំងអស់»។
ចំណែកមេបញ្ជាការកងរាជអាវុធហត្ថស្រុកកូនមុំ បញ្ជាក់ដែរថា ប្រជាពលរដ្ឋចំណាកស្រុកទាំងនោះកំពុងភ័យខ្លាច ខណៈអាជ្ញាធរអញ្ជើញពួកគាត់មកសាកសួរពីករណីតាំងលំនៅនេះ។ លោកបន្តថា ក្រុមសមត្ថកិច្ចសង្ស័យមានមេខ្លោងដឹកនាំប្រជាពលរដ្ឋទាំងនោះមកចាប់ដីនេះ៖ «ហៅមកបំភ្លឺសួររកមេខ្លោងអ្នកបង្កបញ្ហា ប៉ុន្តែសួររកអត់ទាន់ឃើញ ជាចេតនារបស់ប្រជាពលរដ្ឋ រួមគំនិតគ្នា។ ពួកកំពង់ចាម ព្រៃវែង។ យើងធ្វើលិខិតអញ្ជើញមុនដំបូងគាត់ចង់ចូលខ្លួន ឥឡូវបិតទូរស័ព្ទអស់»។
មន្ត្រីឃ្លាំមើលសិទ្ធិមនុស្សសមាគមអាដហុក ខេត្តរតនគិរី លោក ឆាយ ធី កត់សំគាល់ថា បច្ចុប្បន្ននេះសកម្មភាពប្រជាពលរដ្ឋចូលកាន់កាប់ដីរដ្ឋកើតមានជាបន្តបន្ទាប់ ដោយសារប្រជាពលរដ្ឋខ្លះជឿតាមមេខ្លោងស្វែងរកផលប្រយោជន៍ពីការចូលកាន់កាប់ដីរបស់ប្រជាពលរដ្ឋ។ លោកអំពាវនាវឲ្យប្រជាពលរដ្ឋចំណាកស្រុកដែលគ្មានដីពិតប្រាកដឲ្យបំពេញបែបបទស្នើសុំដីសម្បទានសង្គមដោយធ្វើលិខិតបញ្ជាក់ពីអាជ្ញាធរនៅភូមិកំណើតរបស់ខ្លួនអំពីភាពក្រីក្រ និងគ្មានដីពិតប្រាកដ រួមទាំងធ្វើលិខិតផ្លាស់ទីលំនៅដាក់ជូនអាជ្ញាធរខេត្តរតនគិរី ដើម្បីសុំគោលការណ៍ផ្ដល់ដីសម្បទានសង្គមកិច្ច៖ «អាជ្ញាធរខេត្តអាចមានវិធានការដោះស្រាយហើយ ព្រោះជាគោលនយោបាយរបស់រាជរដ្ឋាភិបាល ត្រូវតែដោះស្រាយ តែដោះស្រាយចំពោះគ្រួសារណាដែលអត់ដីពិតប្រាកដ»។
ទោះជាយ៉ាងណាក៏ដោយ អភិបាលស្រុកកូនមុំ លោក ឈឿន ចាន់ធាង បញ្ជាក់ថា អាជ្ញាធរស្រុកកំពុងចាត់មន្ត្រីណែនាំប្រជាពលរដ្ឋចំណាកស្រុកទាំងនោះឲ្យយល់ដឹងពីភាពផ្ទុយច្បាប់ក្នុងការចូលមកតាំងលំនៅលើដីរដ្ឋដោយគ្មានការអនុញ្ញាត។ លោកថា នឹងចាត់វិធានការផ្លូវច្បាប់ប្រសិនប្រជាពលរដ្ឋមិនព្រមចាកចេញ៖ «អត់មានអនុញ្ញាតទេ យើងមិនឲ្យ យើងចាត់វិធានការតាមផ្លូវច្បាប់បើសិនរឹងទទឹង។ តែឥឡូវឲ្យធ្វើស្រែសិនទៅ យើងមិនទាន់ធ្វើក្ដៅទេ យកមេខ្លោងឲ្យអស់សិន»។
ដីត្រៀមបម្រុងដែលប្រជាពលរដ្ឋចំណាកស្រុកចូលទៅតាំងលំនៅមានទំហំជាង ៣០០ហិកតារ ជាប្រភេទដីព្រៃរបោះ។ មន្ត្រីការិយាល័យភូមិបាលស្រុកកូនមុំ ឲ្យដឹងថា ដីនេះអាជ្ញាធរខេត្តរក្សាទុកសម្រាប់អភិវឌ្ឍន៍វិស័យកសិកម្ម មិនមែនជាដីសម្បទានសង្គមកិច្ចនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។