អតីតកម្មករ និងក្រុមគ្រួសារកម្មករធ្វើការនៅចម្ការកៅស៊ូមេមត់ ខេត្តកំពង់ចាម ប្រមាណ ១០០នាក់ ត្រូវបានអាជ្ញាធរស្រុករារាំងមិនឲ្យទៅសាលាខេត្ត ដើម្បីទាមទារសុំកម្មសិទ្ធិរស់នៅស្របច្បាប់ក្បែររោងចក្រចម្ការកែច្នៃជ័រកៅស៊ូឡើយ។
បញ្ហានោះ បានអូសបន្លាយតាំងពីឆ្នាំ២០០៩ មកម្ល៉េះ បន្ទាប់ពីក្រុមហ៊ុនចម្ការកៅស៊ូបានផ្លាស់ប្ដូរឲ្យពលរដ្ឋទៅរស់នៅតំបន់ថ្មី ប៉ុន្តែអាជ្ញាធរមិនទាន់រកដំណោះស្រាយជូនប្រជាពលរដ្ឋបាននៅឡើយ។
ប្រជាពលរដ្ឋមកពីភូមិខ្នងក្រពើលិច ឃុំត្រមូង ស្រុកមេមត់ បានវិលត្រឡប់មកលំនៅឋានវិញ បន្ទាប់ពីអាជ្ញាធរស្រុកបានឃាត់រថយន្តរបស់ពលរដ្ឋវិលមកសាលាស្រុក សន្យាថានឹងផ្ដល់ដំណោះស្រាយនៅក្រោយថ្ងៃបុណ្យចូលឆ្នាំខ្មែររួច។
អ្នកភូមិម្នាក់ក្នុងចំណោមអ្នកភូមិប្រមាណ ១០០នាក់ ដែលជិះរថយន្តទៅសាលាខេត្តកំពង់ចាម គឺអ្នកស្រី អ៊ុន ស៊ូចេង បានថ្លែងនៅថ្ងៃទី១០ មេសា ថា ពួកគាត់មានបំណងទៅជួបអភិបាលខេត្តដើម្បីស្នើសុំឲ្យផ្ដល់កម្មសិទ្ធិរស់នៅស្របច្បាប់ដល់ពលរដ្ឋ ២២៥គ្រួសារ ជាអតីតកម្មករ និងក្រុមគ្រួសារកម្មករធ្វើការនៅចម្ការកៅស៊ូសាមគ្គីមេមត់របស់រដ្ឋ ដែលបានមករស់នៅលើផ្ទៃដីជាង ១២ហិកតារ តាំងពីឆ្នាំ១៩៨២ មក។ អ្នកស្រីបន្តថា អាជ្ញាធរស្រុកបានសន្យាថា អាជ្ញាធរនឹងប្រើប្រាស់គណៈកម្មការចុះត្រួតពិនិត្យទិន្នន័យពីស្ថានភាពរស់នៅរបស់ពលរដ្ឋ បន្ទាប់ពីពិធីបុណ្យចូលឆ្នាំរួច។
ទាក់ទងទៅនឹងបញ្ហានេះ អភិបាលរងស្រុកមេមត់ លោក ចាន់ សុភី មានប្រសាសន៍ថា អាជ្ញាធរបានបង្កើតគណៈកម្មការចម្រុះតាំងពីដើមខែមេសា ប៉ុន្តែដោយរង់ចាំបុណ្យចូលឆ្នាំរួចរាល់ ក្រុមការងារស្រុកនឹងចុះធ្វើអត្តសញ្ញាណកម្មស្រង់ស្ថិតិពីស្ថានភាពរស់នៅ និងចំនួនដីកាន់កាប់របស់ពលរដ្ឋ បញ្ជូនរបាយការណ៍នេះទៅអភិបាលខេត្តជាអ្នកដោះស្រាយ។ លោកថា ដោយសារពលរដ្ឋមិនចង់ទៅរស់នៅបុរីតេជោសែន ស្ថិតនៅឃុំដា ទើបពួកគាត់មានការខ្វល់ខ្វាយ។
យ៉ាងណាក៏ដោយ អ្នកសម្របសម្រួល សមាគមអាដហុក (Adhoc) ការពារសិទ្ធិមនុស្ស ប្រចាំខេត្តកំពង់ចាម លោក នាង សាវ៉ាត ដែលបានតាមដានករណីនេះ មានមតិថា លោកនាយករដ្ឋមន្ត្រី ហ៊ុន សែន ធ្លាប់បានប្រកាស និងចេញលិខិតឲ្យពលរដ្ឋរស់នៅក្នុងតំបន់ចម្ការកៅស៊ូនេះ ក្លាយទៅជាការគ្រប់គ្រងរបស់រដ្ឋបាលឃុំ សង្កាត់ ប៉ុន្តែចំណាត់ការរបស់អាជ្ញាធរមានការយឺតយ៉ាវ។ លោកថា ប្រៀបធៀបទៅនឹងការប្រគល់ដីចម្ការកៅស៊ូដល់ពលរដ្ឋនៅតំបន់ដទៃនោះ ប្រជាពលរដ្ឋទាំងនេះ គឺសាកសមនឹងទទួលបានកម្មសិទ្ធិពីរដ្ឋដែរ។
ប្រជាពលរដ្ឋ បានអះអាងថា កាលពីថ្ងៃទី២២ ខែតុលា ឆ្នាំ២០១២ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានផ្ញើលិខិតទៅអភិបាលខេត្ត និងក្រុមហ៊ុនចម្ការកៅស៊ូ ឲ្យបង្កើតគណៈកម្មការចម្រុះចុះធ្វើទិន្នន័យប្រជាពលរដ្ឋ ដែលកំពុងរស់នៅ និងកាន់កាប់លើដីអតីតចម្ការកៅស៊ូរដ្ឋ ដើម្បីកាត់ចេញពីបញ្ជីសារពើភណ្ឌផ្ដល់កម្មសិទ្ធិស្របច្បាប់ឲ្យពលរដ្ឋ។ ប៉ុន្តែពួកគាត់ពុំទាន់ឃើញអាជ្ញាធរដោះស្រាយនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។