អាជ្ញាធរឃុំម្លូព្រៃ២ នៃស្រុកឆែប ខេត្តព្រះវិហារ កំពុងមានក្តីព្រួយបារម្ភថា ប្រជាពលរដ្ឋខ្មែរ និងជនជាតិដើមភាគតិចកួយ ប្រហែល ២០០គ្រួសារ នៅភូមិចំនួនពីរ នឹងបាត់បង់ដីស្រែចម្ការ និងវាលស្មៅសម្រាប់គោក្របីនៅពេលខាងមុខ។
ការអះអាងបែបនេះ ក្នុងអំឡុងពេលក្រុមហ៊ុនចិន ឈ្មោះ រួយ ហ្វេង (Ruy Feng) ទទួលបានដីសម្បទានសេដ្ឋកិច្ច និងចាប់ផ្តើមអភិវឌ្ឍដាំអំពៅនៅទីនោះ និងកំពុងមានជម្លោះជាមួយប្រជាពលរដ្ឋនៅតំបន់នោះ។
ការព្រួយបារម្ភនេះ បានកើតឡើងបន្ទាប់ពីក្រុមហ៊ុនចិន ឈ្មោះ រួយ ហ្វេង ចាប់ផ្ដើមឈូសឆាយពង្រីកចូលដីព្រៃ និងដីបម្រុងសម្រាប់ប្រជាពលរដ្ឋធ្វើស្រែចម្ការបន្តិចម្ដងៗ។
មេឃុំម្លូព្រៃ២ គឺលោក សាប់ សាយ។ លោកមានប្រសាសន៍កាលពីរសៀលថ្ងៃពុធ ទី២៤ ខែមិថុនា ថា បច្ចុប្បន្នប្រជាពលរដ្ឋខ្មែរ និងជនជាតិដើមភាគតិចកួយ ចំនួន ៧០០គ្រួសារ កំពុងរស់នៅលាយឡំគ្នាក្នុងភូមិពីរ គឺភូមិប្រើសក្អក និងភូមិបុស។ ក៏ប៉ុន្តែក្នុងចំណោមនោះ គឺប្រជាពលរដ្ឋប្រមាណ ២០០គ្រួសារ កំពុងតែប្រឈមមុខនឹងការបាត់បង់ដីស្រែចម្ការ។ លោកមេឃុំម្លូព្រៃ២ បញ្ជាក់ទៀតថា កាលពីថ្ងៃទី២៣ ខែមិថុនា កន្លងទៅ ក្រុមហ៊ុនចិន ឈ្មោះ រួយ ហ្វេង បានបញ្ជូនគ្រឿងចក្រ ២គ្រឿងទៅឈូសឆាយលើដីបម្រុងទុកធ្វើស្រែចម្ការរបស់ប្រជាពលរដ្ឋទាំងនោះ៖ «ព្រួយបារម្ភក្រែងអត់មានដីព្រៃសម្រាប់ទុកចិញ្ចឹមគោក្របី។ វាបំពានប្រជាជន គាត់តវ៉ាទៅគេថាកុំតវ៉ាអីដីនេះ មិនមែនជាដីរបស់ប្រជាជនទេ»។
កាលពីរសៀលថ្ងៃទី២៣ ខែមិថុនា កន្លងទៅ ក្រុមប្រជាពលរដ្ឋខ្មែរ និងជនជាតិដើមភាគតិចកួយ នៅភូមិប្រើសក្អក និងភូមិបុស ប្រមាណ ១៥០នាក់ បានលើកគ្នាទៅព័ទ្ធចាប់គ្រឿងចក្ររបស់ក្រុមហ៊ុនចិន រួយ ហ្វេង ចំនួន ២គ្រឿង មិនឲ្យឈូសឆាយដីធ្វើផ្លូវចូលទៅកាន់តំបន់ដីបម្រុងទុករបស់ពួកគេទេ។
មន្ត្រីផ្នែកតស៊ូមតិរបស់អង្គការពន្លកខ្មែរ លោក ប៉ិក សោភ័ណ ដែលតាមឃ្លាំមើលសកម្មភាពរបស់ប្រជាពលរដ្ឋ មានប្រសាសន៍ថា គ្រឿងចក្រ ២គ្រឿងរបស់ក្រុមហ៊ុនចិន ដែលអ្នកភូមិព័ទ្ធចាប់នោះ គឺនៅពេលដែលកំពុងឈូសឆាយដីធ្វើផ្លូវរំលោភចូលទៅក្នុងតំបន់ដីបម្រុងទុករបស់ប្រជាពលរដ្ឋ៖ «គេធ្វើត្រាសេ ប៉ុន្តែចូលទៅក្នុងដីដែលរដ្ឋបានប្រគល់ឲ្យថាជាដី ១០% សម្រាប់ប្រើប្រាស់អាស្រ័យផលនោះ»។
លោក ប៉ិក សោភ័ណ បញ្ជាក់ថា ក្រុមហ៊ុនចិន ឈ្មោះ រួយ ហ្វេង ដែលបញ្ជូនគ្រឿងចក្រទៅឈូសឆាយដីនោះ គឺជាការរំលោភបំពានមកលើដីរបស់ប្រជាពលរដ្ឋទាំងស្រុង ពីព្រោះតែការឈូសឆាយមិនបានប្រាប់មកអាជ្ញាធរមូលដ្ឋាន ឬក៏ហៅអ្នកភូមិទៅពិគ្រោះគ្នាជាមុនឡើយ។
បច្ចុប្បន្ននៅខេត្តព្រះវិហារ ទំនាស់ដីធ្លី គឺកើតមាននៅគ្រប់ស្រុកទាំង៧ ប៉ុន្តែអាជ្ញាធរខេត្តនេះហាក់មានការដោះស្រាយបានផលតិចតួចសម្រាប់ប្រជាពលរដ្ឋ។
កាលពីដើមខែមិថុនា កន្លងទៅ សហគមន៍ទំនាស់ដីធ្លីប្រមាណ ២ពាន់នាក់មកពី ៧ស្រុក ធ្លាប់បានប្រមូលគ្នាឡើងទៅតវ៉ាជាទ្រង់ទ្រាយធំនៅក្នុងទីរួមខេត្តម្ដងមកហើយ ក៏ប៉ុន្តែគម្រោងតវ៉ានោះមិនបានសម្រេច ដោយសារតែអាជ្ញាធរដាក់ពង្រាយកម្លាំងប៉ូលិសនៅតាមដងផ្លូវជាច្រើនកំណាត់ ដើម្បីរារាំងកុំឲ្យកម្លាំងប្រជាពលរដ្ឋចូលទៅតវ៉ានៅក្នុងទីរួមខេត្តបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។