កម្លាំងសមត្ថកិច្ចចម្រុះខេត្តក្រចេះ ចាប់ផ្ដើមបើកប្រតិបត្តិការក្តៅ ដោយយកគ្រឿងចក្រចូលឈូសឆាយដីដាំដំណាំរបស់ប្រជាពលរដ្ឋ ៣១គ្រួសារ ដើម្បីផ្ដល់ដីនោះឲ្យពលរដ្ឋ ៧២ក្រុមគ្រួសារផ្សេងទៀត។ អ្នកតំណាងរាស្ត្រ និងសង្គមស៊ីវិល ហៅសកម្មភាពនេះថា មិនមែនជាដំណោះស្រាយអាចភាគីទាំងពីរទទួលបាននោះទេ។
នៅថ្ងៃទី២នៃការផ្ដល់សលាកបត្រដល់ក្រុមពលរដ្ឋ ៧២គ្រួសារនៅថ្ងៃទី៧ ខែមេសា ក្រុមកងកម្លាំងចម្រុះប្រដាប់ដោយអាវុធក្នុងដៃ បានយកគ្រឿងចក្រចូលឈូសឆាយដំណាំពលរដ្ឋ។ ក្នុងពេលនោះដែរ សំឡេងទ្រហោយំរបស់ក្រុមពលរដ្ឋ ៣១គ្រួសារ ប្រណាំងប្រជែងនឹងសំឡេងគ្រឿងចក្រដែលឈូសឆាយ។ អ្នកខ្លះទៅដេកនៅមុខគ្រឿងចក្រនិយាយថា ស៊ូស្លាប់មិនព្រមចេញពីដីជម្លោះនេះជាដាច់ខាត។
ពលរដ្ឋក្រុម ៣១គ្រួសារ លោកស្រី លី មុំ ដែលគ្រឿងចក្រចូលឈូសឆាយចំដីលោកស្រី និយាយទាំងយំសោកថា លោកស្រីស៊ូស្លាប់មិនចេញពីនេះជាដាច់ខាត។ ស្ត្រីរូបនេះស្នើឲ្យអភិបាលរងខេត្តក្រចេះ លោក ខ័ណ្ឌ ចំណាន អនុញ្ញាតឲ្យក្រុមពលរដ្ឋ ៣១គ្រួសាររស់នៅទីនេះ ព្រោះពួកគេបានដាំដំណាំអាស្រ័យផលជាច្រើនឆ្នាំមកហើយ៖ «ធ្វើបាបខ្ញុំណាស់! ខ្ញុំជំពាក់លុយធនាគារព្រោះមករស់នៅក្នុងព្រៃ នៅតែមកបណ្ដេញចេញទៀត ខ្ញុំស៊ូស្លាប់មិនចេញទេ»។
ក្នុងពេលឈូសឆាយនេះដែរ ក្រុម ៣១គ្រួសារបានចេញមកព្រមៗគ្នាប្រឆាំងដោយមិនឲ្យឈូសឆាយ និងស្រែកគំរាមមិនឲ្យពលរដ្ឋក្រុម ៧២គ្រួសារធ្វើសកម្មភាពអ្វីទាំងអស់។ ក្រោយផ្ទុះសកម្មភាពប្រឆាំងដូចនេះ ប្រធានកងរាជអាវុធហត្ថដែលដឹកនាំក្រុមការងារនេះ បានបញ្ជាគ្រឿងចក្រ និងក្រុមសមត្ថកិច្ចចាកចេញ។
មន្ត្រីស៊ើបអង្កេតនៃសមាគមការពារសិទ្ធិមនុស្សអាដហុក (Adhoc) ប្រចាំខេត្តក្រចេះ លោក ហេង ភារៈ ស្នើឲ្យអាជ្ញាធររកវិធីដោះស្រាយដោយសន្តិវិធីនិងឈ្នះៗទាំងសងខាង មិនមែនជាបណ្ដេញពលរដ្ឋមួយក្រុម ហើយយកពលរដ្ឋមួយក្រុមទៀតចូលរស់នៅនោះទេ៖ «អាជ្ញាធរគួរដោះស្រាយរឿងនេះដោយយុត្តិធម៌ និងអនុវត្តតាមប្រសាសន៍សម្ដេចនាយករដ្ឋមន្ត្រីថា មិនបណ្ដេញពលរដ្ឋចេញពីដីបង្កបង្កើនផលទេ»។
អភិបាលខេត្តក្រចេះ លោក សរ ចំរុង ទទួលស្គាល់ក្រុមពលរដ្ឋ ៧២គ្រួសារថា ជាអ្នកមានសិទ្ធិរស់នៅកំពុងមានជម្លោះ ស្ថិតក្នុងនៅចំណុចអូរសំពុង ក្នុងភូមិប្រឡាយទ្រៀល ឃុំដំរីផុង ស្រុកឆ្លូង។ ដោយឡែកក្រុមពលរដ្ឋ ៣១គ្រួសារ លោកអភិបាលខេត្តបង្គាប់ឲ្យដាក់ពាក្យស្នើសុំដីសង្គមកិច្ចទីតាំងផ្សេងនេះផ្អែកតាលិខិតមួយច្បាប់ចុះថ្ងៃទី១៧ ខែធ្នូ ឆ្នាំ២០១៤។ អភិបាលរងខេត្តក្រចេះ លោក ខ័ណ្ឌ ចំណាន ដែលទទួលបន្ទុកដោះស្រាយជម្លោះដីធ្លីក្នុងស្រុកឆ្លូង បដិសេធមិនធ្វើអត្ថាធិប្បាយឡើយ។
ចំណែកប្រធានកងរាជអាវុធហត្ថប្រចាំខេត្តក្រចេះ លោក ស្រី វុត្ថា ដែលចុះដឹកនាំសកម្មភាពឈូសឆាយ ក៏បដិសេធមិនថ្លែងអ្វីទាំងអស់ ក្រៅពីប្រាប់ឲ្យអ្នកយកព័ត៌មានចេញពីកន្លែងកងកម្លាំងបើកប្រតិបត្តិការ។
ទោះបែបនេះក្តី តំណាងពលរដ្ឋ ៧២គ្រួសារ លោក សាន ជ្រោយ ថ្លែងគាំទ្រចំណាត់ការរបស់សកម្មភាពឈូសឆាយរបស់កម្លាំងខេត្ត។ លោកស្រីនៅតែអះអាងជំហរមិនរាថយក្នុងការកាន់កាប់ដីនេះទេ។ ក្រៅពីនេះ លោកស្រី សាន ជ្រោយ ចង់ឃើញអាជ្ញាធរសម្របសម្រួលយ៉ាងមិនឲ្យពលរដ្ឋទាំងពីរក្រុមមានជម្លោះនឹងគ្នា៖ «ក្រុមពលរដ្ឋ ៧២គ្រួសារចូលរស់នៅស្របច្បាប់ ម៉េចក៏ចោទថា ពួកយើងរំលោភដីក្រុម ៣១គ្រួសារ»។
ប្រធានគណៈកម្មការទី១នៃរដ្ឋសភា ទទួលបន្ទុកអង្កេតសិទ្ធិមនុស្ស និងពាក្យបណ្ដឹង គឺលោក អេង ឆៃអ៊ាង ដែលធ្លាប់អង្កេតជម្លោះដីធ្លីក្នុងនេះយល់ថា អាជ្ញាធរខេត្តក្រចេះ មិនត្រូវយកពលរដ្ឋទៅជល់ និងពលរដ្ឋឡើយ។
លោក អេង ឆៃអ៊ាង ស្នើឲ្យអាជ្ញាធរខេត្តរកទីតាំងដីថ្មីដល់ក្រុមពលរដ្ឋ ៧២គ្រួសារ៖ «ក្នុងនាមខ្ញុំជាតំណាងរាស្ត្រស្នើឲ្យអាជ្ញាធរខេត្តក្រចេះពិនិត្យឡើងវិញ មិនត្រូវប្រើវិធីបង្ខិតបង្ខំទេ»។
ក្រុមពលរដ្ឋទាំងពីរក្រុមចង់ឃើញអាជ្ញាធរខេត្តផ្ដល់ដំណោះស្រាយឈ្នះៗទាំងអស់គ្នា។ ដូចគ្នានេះដែរ ប្រធានគណៈកម្មការទី១នៃរដ្ឋសភា លោក អេង ឆៃអ៊ាង និយាយថា ដីនៅខេត្តក្រចេះសល់ច្រើនណាស់មិនគួរប្រើធម៌ក្ដៅលើពលរដ្ឋឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។