ប្រជាពលរដ្ឋរស់នៅភូមសំបួរ ឃុំស្វាយជ្រះ ស្រុកស្នួល ខេត្តក្រចេះ ប្រមាណ ៣០ ទៅ ៤០នាក់ បាននាំគ្នាទៅរារាំងគ្រឿងចក្រពីរគ្រឿងរបស់អាជ្ញាធរខេត្ត ដែលកំពុងឈូសឆាយទៅលើដីចម្ការអ្នកភូមិ នៅព្រឹកថ្ងៃព្រហស្បតិ៍ ទី៤ ខែមេសា ឆ្នាំ២០១៣។
មិនមានអំពើហិង្សាអ្វីកើតឡើងនោះទេ ដោយសារអ្នកបញ្ជាគ្រឿងចក្របានយល់ព្រមបញ្ឈប់ការឈូសឆាយភ្លាមៗវិញ នៅពេលអ្នកតវ៉ាបានស្រែកគំរាមឲ្យគ្រឿងចក្របញ្ឈប់ការឈូសឆាយ ហើយក៏មិនមានក្រុមសមត្ថកិច្ចណាមកការពារសន្តិសុខ និងឃ្លាំមើលការតវ៉ានេះដែរ។
អ្នកតវ៉ាមួយរូប គឺអ្នកស្រី អៀង ចន្ធូ មានប្រសាសន៍បញ្ជាក់ថា ដីដែលគ្រឿងចក្រឈូសឆាយនេះ ឋិតនៅចំណុចស្នែងប្រើស ជាតំបន់ដែលអ្នកភូមិបានចូលមកតាំងទីលំនៅបន្តបន្ទាប់គ្នាប្រមាណ ១០០គ្រួសារ តាំងពីឆ្នាំ២០០២ រហូតបច្ចុប្បន្ន និងបង្កើតតំបន់នោះជាភូមិថ្មី មានអាជ្ញាធរភូមិឃុំបានទទួលស្គាល់ការមកតាំងទីលំនៅក្នុងតំបន់នោះទៀតផង។
អ្នកស្រីបន្តថា ការឈូសឆាយនេះប៉ះពាល់លើដីចម្ការដំឡូងរបស់អ្នកភូមិបានដាំដុះ៖ «ប៉ះពាល់ដំឡូង។ ខែហ្នឹងមិនចង់ទុក ហើយនាំគ្នាឈូសរំលើងរំលំចោលខ្ទេចខ្ទីអស់។ ពួកខ្ញុំមកតាំងពី២០០២ មេឃុំបោះត្រាទទួលស្គាល់ទាំងអស់គ្នា»។
ចំណែកអ្នកតវ៉ាម្នាក់ទៀត គឺអ្នកស្រី ម៉េង ស៊ូហ្គេច មានប្រសាសន៍បញ្ជាក់ដែរថា អ្នកភូមិមិនបានទទួលដំណឹងអ្វីស្ដីពីការឈូសឆាយនោះទេ ក៏ប៉ុន្តែកាលពីឆ្នាំកន្លងទៅនេះ អាជ្ញាធរខេត្តបានធ្វើការឈូសឆាយដីមួយផ្នែកនៅខាងកើតផ្លូវរួចហើយ ដើម្បីយកដីសម្រាប់ធ្វើតំបន់យោធិនពិការ។
អ្នកស្រីបន្តថា អ្នកភូមិមិនជំទាស់គោលការណ៍យកដីសម្រាប់គោលនយោបាយយោធិនពិការនោះទេ ប៉ុន្តែអ្នកភូមិសុំឲ្យអាជ្ញាធរខេត្តធ្វើការឈូសឆាយទៅលើតំបន់គ្មានស្រែចម្ការអ្នកភូមិ៖ «ដីសោធននិវត្តន៍តែប៉ុន្មានហិកតារទេចូលទៅខាងក្រោយទេ តែវាបំពានយកលើសចូលដល់ដីប្រជាពលរដ្ឋតែម្ដង»។
មេឃុំស្វាយជ្រះ លោក វ៉ាន់ វេត មានប្រសាសន៍បញ្ជាក់ថា ប្រជាពលរដ្ឋបានចូលមកតាំងទីលំនៅតំបន់នេះមុនមានគម្រោងយកដីតំបន់នោះជាសម្បទានសង្គមកិច្ចរបស់រាជរដ្ឋាភិបាល។ លោកបន្តថា អ្នកភូមិមួយចំនួនធំមានលិខិតផ្លាស់ប្ដូរទីលំនៅពីខេត្តផ្សេង ហើយមកតាំងទីលំនៅនៅតំបន់នេះជាជនចំណាកស្រុក៖ «មិនទាន់ដឹងច្បាស់ដែរ កម្មវិធីរបស់រាជរដ្ឋាភិបាល មិនដឹងធ្វើយ៉ាងម៉េចទេ អត់មានប្រាប់ខ្ញុំទេ។ កន្លងមកគេឈូស យូរបន្តិចទើបខ្ញុំដឹងក្រោយ»។
ទាក់ទិនករណីនេះដែរ អភិបាលស្រុកស្នួល លោក គង់ គឹមលី មានប្រសាសន៍ថា គោលការណ៍របស់អាជ្ញាធរខេត្ត គឺមិនធ្វើការឈូសឆាយប៉ះពាល់ដីស្រែចម្ការអ្នកភូមិឡើយ ក៏ប៉ុន្តែអ្នកភូមិចង់បានពង្រីកដីភូមិច្រើនពេក ទើបប៉ះពាល់គម្រោងឈូសឆាយដីនេះ។
លោកបន្តថា នឹងផ្អាកគ្រឿងចក្របណ្ដោះអាសន្ន ហើយរៀបចំធ្វើការសម្របសម្រួលជាមួយអ្នកភូមិ ដើម្បីបញ្ចប់បញ្ហាទាំងអស់នេះ៖ «យើងបាននិយាយគ្នារួចហើយ តាំងពីឈូសឆាយលើកទី១ ដំបូងមកម្ល៉េះ គឺឲ្យវៀងឲ្យស្អីសព្វបែបយ៉ាងទាំងអស់ គឺមិនឲ្យប៉ះពាល់ដល់បងប្អូនទេ។ សុំឲ្យបងប្អូនហ្នឹងគាត់យោគយល់ផងថា អ្វីជាកម្មសិទ្ធិសង្គមកិច្ច កុំឲ្យគាត់ចេះតែរំលោភចង់បាន ១០០ ១ពាន់របស់គាត់អ៊ីចឹងណា!»។
តំណាងអ្នកតវ៉ា អ្នកស្រី ម៉េង ស៊ូហ្គេច មានប្រសាសន៍បញ្ជាក់ថា អ្នកភូមិសំណូមពរឲ្យអាជ្ញាធរពាក់ព័ន្ធរក្សាទុកដីត្រៀមបម្រុងរបស់រដ្ឋប្រមាណ ១០ភាគរយបន្ថែមទៀត សម្រាប់ការអភិវឌ្ឍភូមិថ្មីនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។