ប្រជាពលរដ្ឋនៅភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ កំពុងព្រួយបារម្ភពីករណីបណ្ដឹងទាក់ទងនឹងដីធ្លីដែលពួកគេកំពុងរស់នៅសព្វថ្ងៃ។
ប្រជាពលរដ្ឋម្នាក់ឈ្មោះ នួន សុខុន ដែលបានទៅកាន់តុលាការខេត្តព្រះសីហនុ កាលពីព្រឹកថ្ងៃទី១៧ ខែតុលា ឆ្នាំ២០១៣ បានអោយដឹងថា តុលាការនៅមិនទាន់សម្រេចយ៉ាងណានោះទេ ប៉ុន្តែតុលាការបានស្នើអោយពលរដ្ឋដែលពាក់ព័ន្ធក្នុងបណ្ដឹងដីធ្លីនេះ រៀបចំឯកសាររបស់ពួកគេ ប្រគល់អោយតុលាការពិនិត្យមើលជាមុនសិន។ លោកបន្តថា តុលាការទុកពេលអោយប្រជាពលរដ្ឋរហូតដល់ថ្ងៃទី២៩ ខែវិច្ឆិកា ឆ្នាំ២០១៣ សម្រាប់រៀបចំឯកសារ។ តុលាការក៏បានអោយប្រជាពលរដ្ឋដឹងថា ដីដែលពាក់ព័ន្ធក្នុងបណ្ដឹង មិនមែនមានតែ ៣៧ហិកតារ នោះទេ គឺមានរហូតដល់ ៣៧៣ហិកតារ ឯណោះ។
លោក នួន សុខុន៖ «ដល់ពេលមកដល់នេះគេដាក់ ៣៧៣ហិកតារ អា ៣៧ហ្នឹង គេថាខុសបច្ចេកទេសខាងគាត់ (តុលាការ) សរសេរខុស វាយខុស។ តុលាការគាត់ថាឥឡូវ ប្រសិនបើយើងរស់នៅលើដីហ្នឹងពិតប្រាកដ អោយស្គាល់ពីការរស់នៅរបស់យើងមានព្រំប្រទល់ មានដំណាំ ការរស់នៅ យើងបានធ្វើអ្វីខ្លះនៅលើដីហ្នឹង រៀបចំឯកសារមកដាក់តុលាការ ដើម្បីអោយតុលាការពិនិត្យ ហើយតុលាការហ្នឹងចុះដល់ទីតាំងហ្នឹងទៀត ចាប់ពីថ្ងៃហ្នឹង ដល់ថ្ងៃ២៩ គឺយើងស្រាវជ្រាវបងប្អូនយើង ដែលមានដីផ្ទះសម្បែង ហើយចេញទៅរកស៊ីឆ្ងាយៗអត់ដឹង គឺផ្តល់ព័ត៌មានអោយគាត់បានមកធ្វើឯកសារហ្នឹងអោយច្បាស់លាស់»។
លោក នួន សុខុន និយាយថា ប្រជាពលរដ្ឋដែលពាក់ព័ន្ធ ប្ដេជ្ញាថានឹងមិនចាកចេញពីដីរបស់ពួកគេឡើយ ព្រោះពួកគេបានរស់នៅលើដីទាំងនេះតាំងពីយូរមកហើយ មិនដែលមាននរណាមកប្តឹងផ្តល់ ឬអះអាងថាជាម្ចាស់ដីនោះទេ។ លោកថា ប្រជាពលរដ្ឋមិនដឹងថា ត្រូវទៅរស់នៅឯណាទៀតឡើយ។
កន្លងមក ពលរដ្ឋខ្មែរជាច្រើនត្រូវបានបណ្ដេញចេញពីដីលំនៅឋានរបស់ពួកគេ ដើម្បីយកដីអោយក្រុមហ៊ុនធ្វើវិនិយោគ។ ការបណ្ដេញពលរដ្ឋចេញដោយអយុត្តិធម៌បានធ្វើអោយពលរដ្ឋមួយចំនួន ត្រូវបាត់បង់ដីធ្លីរបស់ខ្លួន។ ការបណ្ដេញចេញដោយអយុត្តិធម៌ ក៏តែងបណ្ដាលអោយកើតជាអំពើហិង្សារាប់មិនអស់ រវាងសមត្ថកិច្ច និងពលរដ្ឋដែលជាជនរងគ្រោះ។
អ្នកស្រី ជាប សុធារី អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ ដែលបានតាមដានរឿងនេះដែរនោះ បានអោយដឹងថា តុលាការបានបង្ហាញប័ណ្ណសម្គាល់សិទ្ធិកាន់កាប់អចលនវត្ថុចំនួន ៩៧ប័ណ្ណ ដែលភាគីដើមចោទបានទទួលពីមនុស្ស ៧នាក់ និងក្រុមហ៊ុនមួយដែលលក់ដីអោយពួកគេ កាលពីឆ្នាំ២០១២។ អ្នកស្រីថា មនុស្សទាំង ៧នាក់នោះ មានឈ្មោះ លី ស៊ើង លូ ឈុន លិញ ឆាន ចាង ហុង តាំង ផេង ទូ អ៊ី លី តុង និងក្រុមហ៊ុន ជុង ថៃ ពាណិជ្ជ។ អ្នកស្រីបន្តថា ក្នុងចំណោមដើមបណ្ដឹងទាំង ៣នាក់ មានម្នាក់ជាតំណាងរបស់ក្រុមហ៊ុន ជុង ថៃ ពាណិជ្ជ ផងដែរ។ ទោះជាយ៉ាងណាក៏ដោយ អ្នកស្រីថា តុលាការត្រូវដោះស្រាយបញ្ហានេះដោយយុត្តិធម៌ និងសន្តិវិធី។
អ្នកស្រី ជាប សុធារី៖ «ខាងយើងសង្គមស៊ីវិល យើងនឹងព្យាយាមអោយមានដំណើរការទៅតាមសន្តិវិធី ទៅតាមនីតិវិធី ហើយយើងគ្រាន់តែសំណូមពរទៅដល់ភាគីដើមចោទដែរ បើក្នុងករណីដែលមិនទាន់ដោះស្រាយតាមផ្លូវច្បាប់អោយបានចប់ទេ អោយវាទៅតាមដំណាក់ការទេ កុំអោយខាងភាគីដើមចោទហ្នឹង ប្រញាប់ប្រើកម្លាំងទៅឈូសឆាយ ព្រោះយើងដឹងស្រាប់ហើយ ប្រជាពលរដ្ឋគាត់នៅតែអះអាងថា គាត់បានចូលរស់នៅហ្នឹងយូរណាស់ហើយ សំខាន់ទៀតថា រឿងនេះ គឺអាជ្ញាធរគាំទ្រការរស់នៅរបស់ប្រជាពលរដ្ឋ»។
លោក ពិន សេន មេឃុំអូរបាក់រទេះ ធ្លាប់បាននិយាយថា ពលរដ្ឋដែលជាប់ពាក់ព័ន្ធនឹងបណ្ដឹងដីធ្លីនោះ បានរស់នៅលើដីពួកគេតាំងពីយូរមកហើយ មិនដែលមានអ្នកណាមករំខាន ប្ដឹងទាមទារដីរបស់គេឡើយ។ លោក ពិន សេន ក៏មិនដឹងថា អ្នកដែលអះអាងថា ជាម្ចាស់ដីនោះជានរណា ហើយមកពីខាងណានោះដែរ។ លោកថា លោកនឹងឈរខាងប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។