អង្គការលីកាដូ (Licadho) បង្ហាញថា ជម្លោះដីធ្លីនៅឆ្នាំ២០១៤ មានអ្នករងផលប៉ះពាល់ជាង ១០.៦០០គ្រួសារ នៅក្នុង ១៤ខេត្ត ដែលអង្គការនេះបានស្រាវជ្រាវ។ ការចេញរបាយការណ៍ជាថ្មីនេះ បន្ទាប់ពីក្រសួងរៀបចំដែនដី នគរូបនីយកម្ម និងសំណង់ បានច្រានចោលរបាយការណ៍នោះនៅក្នុងសន្និសីទសារព័ត៌មានស្ដីពីរបាយការណ៍សង្គមស៊ីវិលពាក់ព័ន្ធដីធ្លីកាលពីឆ្នាំមុន។
អង្គការលីកាដូ ចេញសេចក្ដីថ្លែងការណ៍ជាថ្មីស្ដីពីជម្លោះដីធ្លីនៅក្នុងប្រទេសកម្ពុជា នៅឆ្នាំ២០១៤ ហើយរបាយការណ៍នោះបញ្ជាក់ថា ជម្លោះបានកើនឡើង ៣ដងនៃចំនួនគ្រួសារ បើធៀបនឹងឆ្នាំ២០១៣។ សេចក្ដីថ្លែងការណ៍ជាថ្មីនេះ បានផ្សាយជាសាធារណៈនៅថ្ងៃ១៩ ខែកុម្ភៈ ឆ្នាំ២០១៥។
លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការលីកាដូ ថ្លែងថា ឆ្នាំ២០១៤ នាំមកនូវរលកថ្មីនៃជម្លោះដីធ្លីនៅកម្ពុជា ខណៈស្ថាប័នដោះស្រាយដីធ្លីមិនបានពន្លឿននីតិវិធីឲ្យចប់សព្វគ្រប់៖ «ហើយឆ្នាំ២០១៤នេះ ក៏មានការកើនឡើងយ៉ាងគំហុកសម្រាប់ប្រជាពលរដ្ឋដែលរងគ្រោះដោយសារបញ្ហាដីធ្លីនោះ។ នេះហើយបានយើងចេញរបាយការណ៍នេះ ក្នុងគោលបំណងដើម្បីពញ្ញាក់ និងជំរុញឲ្យរដ្ឋាភិបាល ដូចជាស្ថាប័នពាក់ព័ន្ធហ្នឹង ធ្វើការដោះស្រាយ»។
លោក អំ សំអាត បន្តថា អង្គការនេះបានយកតួលេខអ្នករងផលប៉ះពាល់ដីធ្លីនៅ ១៤ខេត្ត ដែលអង្គការនេះបានធ្វើការក្នុងរឿងដីធ្លី គឺមានពលរដ្ឋជាង ១០.៦០០គ្រួសារ ប៉ះពាល់ដីកំពុងរស់នៅជាមួយនឹងការវិនិយោគដោយក្រុមហ៊ុនទទួលបានសិទ្ធិអភិវឌ្ឍន៍ដីសម្បទានសេដ្ឋកិច្ច។
លោកថា បញ្ហាជម្លោះដីរវាងពលរដ្ឋរស់នៅផ្ទាល់ និងក្រុមហ៊ុនទទួលបានដីវិនិយោគ គឺគ្រប់ស្ថាប័នមិនបានពន្លឿនការដោះស្រាយជម្លោះដីធ្លីនោះ ទើបតួលេខឆ្នាំ២០១៤ កើនពីជាង ៣ពាន់គ្រួសារ ទៅជាង ១ម៉ឺនគ្រួសារ៖ «ដែលកើនឡើង ៣ដង បើធៀបនឹងឆ្នាំ២០១៣ យើងមានតែ ៣.៤៧៥គ្រួសារតែប៉ុណ្ណោះ ដែលបញ្ហានេះយើងមើលឃើញថា ជាបញ្ហាមួយដែលគួរឲ្យព្រួយបារម្ភយ៉ាងខ្លាំងទាក់ទងនឹងប្រជាពលរដ្ឋដែលរងគ្រោះដោយសារបញ្ហាដីធ្លី ដោយសារតែឆ្នាំចាស់ៗ អត់ទាន់បានដោះស្រាយបានចប់ផង»។
ផ្ទុយពីរបាយការណ៍អង្គការលីកាដូ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក សរ សុវណ្ណ ថ្លែងថា ជម្លោះដីនៅក្នុងប្រទេសកម្ពុជា បានថយនៅឆ្នាំ២០១៤។ លោកអះអាងនៅក្នុងវេទិកាថ្នាក់ជាតិស្ដីពីការគ្រប់គ្រងដីធ្លីនិងធនធានធម្មជាតិ កាលពីថ្ងៃទី២៥ ខែធ្នូ ឆ្នាំ២០១៤ ថា គោលដៅយុទ្ធសាស្ត្ររបស់រាជរដ្ឋាភិបាលនីតិកាលទី៥ គឺពង្រឹងប្រព័ន្ធគ្រប់គ្រង បែងចែក និងប្រើប្រាស់ដី ធានាសុវត្ថិភាពនៃកម្មសិទ្ធិដី លុបបំបាត់ភាពអនាធិបតេយ្យក្នុងការកាន់កាប់ដីដោយខុសច្បាប់ និងទប់ស្កាត់ការប្រមូលដីទុកដោយមិនបានប្រើប្រាស់ជាដើម។
លោក សរ សុវណ្ណ៖ «ហើយខាងក្រសួងបានសរសេរលិខិតទៅអង្គការទាំងនោះឲ្យគាត់ប្រាប់មកថា នៅកន្លែងណាដើម្បីយើងព្យាយាមដោះស្រាយ។ តាំងពីខែឧសភា មកទល់ពេលនេះ គាត់អត់មានឲ្យយើងទេ។ អ៊ីចឹងចម្រៀងដែលគាត់ច្រៀង គឺគាត់ច្រៀងតាំងពី ៧សែនគ្រួសារ រហូតដល់ ៧៧ម៉ឺននាក់ ឥឡូវមកនៅសល់ ៣០ម៉ឺននាក់។ អ៊ីចឹងមិនមែនថា យើងមិនទទួលស្គាល់នូវការលំបាក នូវការប្រឈមទេ យើងទទួលស្គាល់ ប៉ុន្តែអ្វីដែលយើងបានធ្វើ សុំឲ្យទទួលស្គាល់ការពិត»។
លោក សរ សុវណ្ណ បន្តថា មកទល់ខែវិច្ឆិកា ឆ្នាំ២០១៤ គណៈកម្មការសុរិយោដីមានបណ្ដឹងពាក់ព័ន្ធជម្លោះដីធ្លីក្នុងប្រទេសចំនួនជាង ៦ពាន់ករណី ក្នុងនោះបានដោះស្រាយចប់ជិត ៣ពាន់ករណី និងច្រានចោលជាង ២ពាន់ករណី សុំដកពាក្យបណ្ដឹងជាង ៦០០ករណី ហើយនៅសល់តែជាង ៨០០ករណី កំពុងដោះស្រាយ។
របាយការណ៍អង្គការលីកាដូ ឲ្យដឹងថា នៅឆ្នាំ២០១៥ នឹងគ្មានអ្វីប្រសើរឡើងក្នុងការដោះស្រាយជម្លោះដីធ្លីទេ។ ពលរដ្ឋកម្ពុជា កាន់តែច្រើនឡើងត្រូវបណ្ដេញចេញដោយបង្ខំពីផ្ទះសម្បែង ហើយការរុករានដីព្រៃរវាងក្រុមហ៊ុន និងពលរដ្ឋដើម្បីដណ្ដើមកាន់កាប់ដីនៅបន្តមាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។