សង្គមស៊ីវិល និងសហគមន៍ចំនួន៣០ ចេញសេចក្តីថ្លែងការណ៍រួមនៅថ្ងៃទី១២ ខែវិច្ឆិកា ថ្កោលទោសចំពោះការផ្ដន្ទាទោសស្ត្រី ៧នាក់ តំណាងអ្នកតវ៉ាដីធ្លីនៅតំបន់បឹងកក់។
សេចក្តីថ្លែងការណ៍នេះ បានធ្វើឡើងក្រោយពីតុលាការផ្ដន្ទាទោសស្ត្រី ៧រូប កាលពីថ្ងៃទី១១ ខែវិច្ឆិកា បន្ទាប់ពីក្រុមស្ត្រីទាំងនោះចេញតវ៉ាដោយសារទឹកលិចផ្ទះច្រើនថ្ងៃ ហើយគ្មានលូអាចបង្ហូរទឹកចេញ ខណៈអាជ្ញាធររាជធានីភ្នំពេញ និងក្រុមហ៊ុនស៊ូកាគូ (Shukaku) វិនិយោគតំបន់បឹងកក់នោះដោយមិនបានអើពើពីការលំបាករបស់ប្រជាពលរដ្ឋ។
បញ្ហានេះ ជំរុញឲ្យក្រុមស្ត្រីបឹងកក់ បុរីកីឡា និងថ្មគោល ឡើងតវ៉ានៅមុខសាលារាជធានីភ្នំពេញ កាលពីថ្ងៃទី១០ ខែវិច្ឆិកា ហើយត្រូវបានសមត្ថកិច្ចចាប់ឃុំខ្លួន រួចបញ្ជូនឲ្យតុលាការផ្ដន្ទាទោសភ្លាមៗ។
លោក ច័ន្ទ ពុទ្ធិស័ក្ត អ្នកតំណាងសហគមន៍បឹងកក់ ថ្លែងថា ការសម្រេចផ្ដន្ទាទោសលើក្រុមស្ត្រីទាំង ៧នាក់នោះ សហគមន៍ដីធ្លីយល់ថាជាការរំលោភសិទ្ធិមនុស្ស ព្រោះផ្លូវក្នុងរាជធានីភ្នំពេញបានស្ទះចរាចរណ៍រហូតមកហើយ មិនមែនជាកំហុសរបស់អ្នកតវ៉ាពីរឿងទឹកលិចផ្ទះបឹងកក់នោះ ទៅបិទផ្លូវសាធារណៈនោះទេ៖ «ព្រោះការតវ៉ានេះ គឺកើតឡើងដោយសារការលិចទឹកនៅក្នុងតំបន់បឹងកក់ហ្នឹង ដែលជាការមិនទទួលខុសត្រូវរបស់សាលារាជធានីភ្នំពេញ ដែលគាត់មិនបានសិក្សាទៅលើលក្ខណៈបច្ចេកទេសឲ្យបានច្បាស់លាស់នៅក្នុងតំបន់បឹងកក់ ហើយនិងប្រព័ន្ធហេដ្ឋារចនាសម្ព័ន្ធផ្សេងៗហ្នឹង អ៊ីចឹងជាហេតុនាំឲ្យមានការលិចលង់។ ហើយនេះគឺជាការរំលោភសិទ្ធិមនុស្សយ៉ាងធ្ងន់ធ្ងរ ហើយជាចេតនាមួយដើម្បីបំបាក់ស្មារតីរបស់សហគមន៍ដែលតវ៉ារឿងដីធ្លីហ្នឹង ដែលធ្វើឲ្យពួកយើងមិនអាចទទួលយកបានជាដាច់ខាត ហើយយើងសុំធ្វើការថ្កោលទោសទៅលើរដ្ឋាភិបាល ជាពិសេសសាលារាជធានីភ្នំពេញដែលពាក់ព័ន្ធនឹងគម្រោងអភិវឌ្ឍន៍បឹងកក់ ដែលគាត់ពុំបានទៅសិក្សាលើលក្ខណៈបច្ចេកទេសហេដ្ឋារចនាសម្ព័ន្ធឲ្យបានច្បាស់លាស់»។
ក្នុងសេចក្តីថ្លែងការណ៍រួមដដែលនោះ បង្ហាញឈ្មោះស្ត្រីដែលតុលាការផ្ដន្ទាទោសឲ្យជាប់ឃុំ ១ឆ្នាំ និងពិន័យជាប្រាក់ក្នុងម្នាក់ៗប្រមាណ ៥០០ដុល្លារ រួមមាន អ្នកស្រី ទេព វន្នី អ្នកស្រី ង៉ែត ឃុន អ្នកស្រី គង់ ចន្ថា អ្នកស្រី ផាន់ ឈុនរ៉េត កញ្ញា សុង ស្រីលាភ កញ្ញា បូ ឆវី និងស្ត្រី នង ស្រេង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។