ប្រជាពលរដ្ឋខ្លះដែលរស់នៅស្រុកឆែប ខេត្តព្រះវិហារ កំពុងទទួលរងការប៉ះពាល់ដល់ស្ថានភាពសិទ្ធិមនុស្ស និងសិទ្ធិសេដ្ឋកិច្ចផង នៅពេលដែលក្រុមហ៊ុនដីសម្បទានសេដ្ឋកិច្ចខ្លះ កំពុងបង្កឱ្យមានជម្លោះដីធ្លី។ អង្គការសិទ្ធិមនុស្សក្រៅរដ្ឋាភិបាល កំពុងព្រួយបារម្ភលើបញ្ហាទាំងនេះ នៅស្របពេលដែលមានព័ត៌មានថា ក្រុមហ៊ុនរបស់ចិន មួយ បានយកថ្នាំគីមីទៅបាញ់បំផ្លាញស្រូវរបស់ប្រជាកសិករ។
កសិករ ១គ្រួសារ នៅភូមិឆែប ឃុំឆែប១ ស្រុកឆែប កំពុងត្រូវការជំនួយពីអាជ្ញាធររដ្ឋាភិបាល ឱ្យជួយអន្តរាគមន៍ដោះស្រាយបញ្ហាក្រុមហ៊ុនចិន ដែលបានយកថ្នាំគីមី ទៅបាញ់សម្លាប់ស្រូវរបស់គាត់។
បុរសវ័យចំណាស់ម្នាក់ក្នុងចំណោមកសិករជាង ៤០គ្រួសារទៀត នៅភូមិឆែប គឺលោក សែម សុំ។ លោកមានប្រសាសន៍កាលពីថ្ងៃសៅរ៍ ទី៥ ខែកក្កដា ថា រូបលោក និងកសិករជាង ៤០គ្រួសារទៀត កំពុងមានទំនាស់ដីធ្លីជាមួយក្រុមហ៊ុនចិន ឈ្មោះ ហេង យូ ក្នុងពេលដែលក្រុមហ៊ុននេះទៅពង្រីកផ្ទៃដី ដើម្បីដាំអំពៅ។ បុរសដដែលបញ្ជាក់ថា ក្រុមហ៊ុនចិន នោះធ្លាប់បញ្ចុះបញ្ចូលប្រជាពលរដ្ឋ ឱ្យដោះដូរដីស្រែទាំងឡាយណា ដែលមាននៅក្នុងប្លង់របស់គេ ក៏ប៉ុន្តែអ្នកភូមិជាច្រើន មិនសុខចិត្តដូរទេ ដោយសារតែគេឱ្យដីស្រែទំហំតូចៗ មិនស្មើនឹងដីពីមុន។
លោក សែម សុំ អះអាងថា កាលពីថ្ងៃទី២៨ ខែមិថុនា កន្លងទៅ ដោយសារតែអ្នកភូមិមិនសុខចិត្តដូរដីស្រែចេញពីកន្លែងធ្លាប់ធ្វើ គឺមនុស្សរបស់ក្រុមហ៊ុនចិន បានយកថ្នាំគីមីទៅបាញ់សម្លាប់ស្រូវរបស់គាត់អស់ចំនួន១ហិកតារ៖ «លេងយកថ្នាំទៅបាញ់ងាប់ស្រូវអស់បណ្ដោយ ម្សិលមិញងាប់អស់ហើយ។ ខ្ញុំប្រាប់អាជ្ញាធរ មេភូមិ មេឃុំ ប៉ុស្តិ៍នគរបាលឃុំស្រុក គេថាដោះស្រាយឱ្យ ហើយប្រធានមន្ទីរកសិកម្មខេត្ត គាត់ថាចាំមើល ២-៣ថ្ងៃទៀត គាត់នឹងជួបក្រុមហ៊ុនឱ្យដោះស្រាយសំណងវិញ គេថាអ៊ីចឹង ប៉ុន្តែខ្ញុំមិនអស់ចិត្ត ពីព្រោះដូចជាពន្យារពេលៗ ឱ្យខ្ញុំទៅសង្ឃឹមអីទៀត បើគេមិនរកដំណោះស្រាយឱ្យ»។
ទោះយ៉ាងណា អាជ្ញាធរស្រុកឆែប និយាយផ្ទុយពីកសិករដែលអះអាងថា គេបានប្រាប់អាជ្ញាធររួចហើយជុំវិញករណីនោះ។
អភិបាលស្រុកឆែប លោក អ៊ុង វុឌ្ឍី មានប្រសាសន៍ថា លោកមិនទាន់ទទួលព័ត៌មាននៅឡើយទេពាក់ព័ន្ធរឿងនោះ។ លោកអភិបាលស្រុកសន្យាថា លោកនឹងចុះស្រាវជ្រាវនៅពេលឆាប់ៗ៖ «យើងកាន់ខាងប្រជាពលរដ្ឋហើយ យើងមិនឱ្យគេធ្វើអ៊ីចឹងទេ។ ប្រសិនជាមានបាញ់ថ្នាំអីអ៊ីចឹងមែន ប៉ុន្តែមិនដឹងយ៉ាងម៉េចទេ ពីព្រោះខ្ញុំក្ដាប់ព័ត៌មានអត់ទាន់បានទេ»។
ប្រជាពលរដ្ឋជាង ៤០គ្រួសារ ធ្លាប់ប្រឆាំងនឹងក្រុមហ៊ុនចិន ហេង យូ ដែលព្យាយាមយកដីស្រែរបស់ពួកគេ ធ្វើជាដីសម្បទានសេដ្ឋកិច្ចនោះម្ដងមកហើយ ដោយគេធ្លាប់នាំគ្នាឡើងទៅតវ៉ានៅឯទីក្រុងភ្នំពេញ។
អ្នកសម្របសម្រួលសមាគមការពារសិទ្ធិមនុស្សអាដហុក (adhoc) ខេត្តព្រះវិហារ លោក ឡោ ច័ន្ទ មានប្រសាសន៍ថា លោកទើបតែបានទទួលព័ត៌មានអំពីរឿងនេះ ក៏ប៉ុន្តែលោកមិនទាន់បានទទួលបណ្ដឹងពីម្ចាស់ស្រែនៅឡើយទេ។
លោក ឡោ ច័ន្ទ បញ្ជាក់ថា លោកនឹងចុះស៊ើបអង្កេតករណីនោះនៅពេលដែលទទួលបានបណ្ដឹង ហើយបើរកឃើញថា ក្រុមហ៊ុនបានយកថ្នាំគីមីទៅបាញ់សម្លាប់ស្រូវរបស់កសិករមែន គឺជាការរំលោភសិទ្ធិសេដ្ឋកិច្ចយ៉ាងធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។