ប្រជាពលរដ្ឋរស់នៅលើដីចំណីស្ទឹងពោធិ៍សាត់ ខេត្តពោធិ៍សាត់ ត្រង់ចំណុចភូមិក្បាលហុង និងភូមិពោធិ៍កំបោរ នៃឃុំវាល ស្រុកកណ្ដៀង បារម្ភអាជ្ញាធរមិនផ្ដល់សំណងសមរម្យ និងសមត្ថកិច្ចប្រើអំពើហិង្សា ដើម្បីបណ្ដេញពួកគាត់ចេញពីលំនៅឋាន នៅថ្ងៃទី១៥ ខែឧសភា ខាងមុខនេះ។ តំណាង និងអ្នកភូមិអះអាងថា ពួកគាត់ស៊ូស្លាប់មិនចាកចេញពីផ្ទះសម្បែងឡើយ ប្រសិនបើអាជ្ញាធរពុំមានដំណោះស្រាយជាក់លាក់ណាមួយជូនអ្នកភូមិ មុននឹងធ្វើការបណ្ដេញចេញទេនោះ។
គម្រោងបណ្ដេញពលរដ្ឋជាច្រើនគ្រួសារចេញពីមាត់ស្ទឹងពោធិ៍សាត់ ហាក់មានភាពស្ងប់ស្ងាត់បន្តិច បន្ទាប់ពីអ្នកភូមិនាំគ្នាតវ៉ា និងប្ដឹងទាស់សេចក្ដីជូនដំណឹងរបស់សាលាខេត្តពោធិ៍សាត់ ទៅតុលាការ ដែលតម្រូវឲ្យពួកគាត់រុះរើលំនៅឋានចេញដោយពុំទាន់មានការផ្ដល់សំណងអ្វីសោះនោះ។ ពលរដ្ឋភាគច្រើននៅតែខ្វល់ខ្វាយក្នុងចិត្ត ចំពោះការបាត់បង់ផ្ទះសម្បែង និងខ្លាចទីតាំងថ្មីដែលអាជ្ញាធរបង្ខំឲ្យទៅរស់នៅនោះមានបញ្ហា។
តំណាងពលរដ្ឋម្នាក់នៅភូមិពោធិ៍កំបោរ លោក ជឹង សៀងឡេង មានប្រសាសន៍ថា គ្រួសារលោក និងពលរដ្ឋជាច្រើនគ្រួសារផ្សេងទៀត នឹងមិនរុះរើផ្ទះសម្បែងចេញតាមកាលកំណត់របស់សាលាខេត្តនៅថ្ងៃទី១៥ ខែឧសភា ខាងមុខនេះទេ ដោយសារតែអាជ្ញាធរពាក់ព័ន្ធមិនទាន់មានការឆ្លើយតប ឬដំណោះស្រាយជាក់លាក់ណាមួយជូនពលរដ្ឋនៅឡើយ។ ម្យ៉ាង រដូវនេះមានភ្លៀងធ្លាក់ដែលអាចធ្វើឲ្យពួកគាត់លំបាកក្នុងការរស់នៅហាលវាល ឬជ្រកក្រោមដើមឈើ ដោយរង់ចាំដំណោះស្រាយនោះ៖ «ខ្ញុំសំណូមពរអភិបាលខេត្តថ្មីដែលគាត់ទើបតែឡើងថ្មី ជួយរកដីត្រង់ណាមួយដែលឲ្យពួកយើងរស់នៅជិតក្រុង ហើយនិងទី២ បើសិនជាជំរុញឲ្យពួកខ្ញុំទៅនៅឆ្ងាយដដែល សុំឲ្យគាត់រុះរើទាំងអស់គ្នា កាលណាដែលគាត់រុះរើទាំងអស់គ្នា ពួកខ្ញុំក៏នឹងរុះរើដែរ»។
ចំណែកពលរដ្ឋម្នាក់ទៀត អ្នកស្រី ឈុន គាង បង្ហាញពីក្ដីបារម្ភថា ប្រសិនបើអាជ្ញាធរនៅតែជម្នះក្នុងការជម្លៀសពលរដ្ឋចេញដោយគ្មានសំណងសមរម្យ ឬបង្ខំឲ្យទៅរស់នៅទីជនបទដាច់ស្រយាល ដែលគ្មានមុខរបររកស៊ីអ្វីដូចនៅទីប្រជុំជន ដែលខ្លួនកំពុងរស់នៅទេនោះ អ្នកភូមិភាគច្រើនច្បាស់ជាជួបបញ្ហាផ្នែកជីវភាពធ្ងន់ធ្ងរ៖ «នៅផ្សារទៅ ខ្ញុំរស់នៅដូចថាធ្វើរបស់លក់ដូរទៅមួយថ្ងៃរស់បានមួយថ្ងៃទៅ វាបានបន្តិចគ្រាន់ចាយវាយ ហើយក៏វាមានទឹកមានភ្លើងអីត្រឹមត្រូវ។ ចុះបើកាលណាឲ្យខ្ញុំទៅរស់នៅតាមជនបទ អត់ចេះរស់នៅទេ វាមិនដឹងធ្វើរបស់របរយកទៅលក់ឲ្យនរណាផង ហើយខ្ញុំចាស់ ហើយឲ្យទៅធ្វើស្រែធ្វើចម្ការអីកើត»។
ពាក្យបណ្ដឹងចូលសាលាដំបូងខេត្តពោធិ៍សាត់ របស់ពលរដ្ឋភូមិក្បាលហុង និងភូមិពោធិ៍កំបោរ សរុបចំនួន ២៦គ្រួសារ ដែលវិទ្យុអាស៊ីសេរី ទទួលបាននៅថ្ងៃទី៨ ខែឧសភា បង្ហាញថា ក្រុមអ្នកភូមិស្នើសុំឲ្យតុលាការចេញសាលក្រមមោឃភាព ឬលុបចោលនូវសេចក្ដីជូនដំណឹងរបស់ លោក ខូយ សុខា អតីតអភិបាលខេត្តពោធិ៍សាត់ ដែលតម្រូវឲ្យពលរដ្ឋរុះរើលំនៅឋានចេញឲ្យអស់នៅមុនថ្ងៃទី១៥ ខែឧសភា ឆ្នាំ២០១៤ និងទាមទារលក្ខខណ្ឌមួយចំនួនទៀត។ ក្នុងករណីដែលមានការរុះរើ ក្រុមប្រជាពលរដ្ឋទាមទារឲ្យអាជ្ញាធរចុះត្រួតពិនិត្យភូមិសាស្ត្រ និងចាត់របៀបចាប់ផ្ដើមពីចំណុចក្បាលស្ពានថ្ម រហូតមកដល់ប៉ែកខាងក្រោម ហើយការរុះរើមិនថាផ្ទះឈើ ឬសំណង់រឹងរបស់អ្នកមាន ឬអ្នកក្រនោះទេ គឺត្រូវតែមានការអនុវត្តស្មើគ្នា។ ជាងនេះទៀត ការរុះរើលំនៅឋានរបស់ប្រជាពលរដ្ឋ អាចធ្វើទៅបានលុះត្រាតែមានការរៀបចំភូមិសាស្ត្រឲ្យបានរួចរាល់ជាមុនសិន។
ទោះជាយ៉ាងណា ការទាមទាររបស់ពលរដ្ឋនេះត្រូវបានចៅក្រមនៃសាលាដំបូងខេត្តពោធិ៍សាត់ លោក កុល កំពូល បដិសេធដោយចេញដីកាបង្គាប់ឲ្យកែតម្រូវពាក្យបណ្ដឹង ព្រោះសំអាងហេតុថា ពាក្យបណ្ដឹងរបស់ឈ្មោះ ជឹង សៀងឡេង ឈ្មោះ ចាន់ រតនា និងឈ្មោះ តែ សុគន្ធា ដែលជាដើមបណ្ដឹង និងជាតំណាងពលរដ្ឋទាំង ២៦គ្រួសារនោះ ធ្វើឡើងដោយពុំមានលក្ខណៈត្រឹមត្រូវតាមបញ្ញត្តិមាត្រា៧៥ នៃក្រមនីតិវិធីរដ្ឋប្បវេណី។
ចំពោះបញ្ហានេះ តំណាងប្រជាពលរដ្ឋបញ្ជាក់ថា នៅគ្រាដែលខ្លួនមិនទាន់បានកែតម្រូវលើពាក្យបណ្ដឹងនោះផង ស្រាប់តែនៅថ្ងៃទី២៥ ខែមេសា ឆ្នាំ២០១៤ តុលាការផ្ទេរសមត្ថកិច្ចដោះស្រាយក្នុងរឿងនេះទៅខាងមន្ទីររៀបចំដែនដី នគរូបនីយកម្ម និងសំណង់ វិញ ប៉ុន្តែរហូតមកដល់ពេលនេះ មិនទាន់មានលទ្ធផលអ្វីនៅឡើយ។ បច្ចុប្បន្ន ប្រជាពលរដ្ឋទាំង ២៦គ្រួសារ ដាក់លិខិតសុំកិច្ចអន្តរាគមន៍ទៅក្រសួងយុត្តិធម៌ និងក្រសួងរៀបចំដែនដី នគរូបនីយកម្ម និងសំណង់ ព្រមទាំងស្ថាប័ននៅក្នុងខេត្តពោធិ៍សាត់ មួយចំនួនទៀត។
អភិបាលនៃគណៈអភិបាលខេត្តពោធិ៍សាត់ ដែលទើបឡើងកាន់តំណែងថ្មី លោក ម៉ៅ ធនិន មិនបញ្ជាក់អំពីដំណោះស្រាយក្នុងរឿងនេះយ៉ាងណានោះទេ ហើយនៅថ្ងៃទី១៥ ខែឧសភា ខាងមុខ អាជ្ញាធរនឹងអនុវត្តសេចក្ដីជូនដំណឹងរបស់សាលាខេត្តដែរ ឬយ៉ាងណានោះទេ ប៉ុន្តែលោកថ្លែងយ៉ាងខ្លីថា មុននឹងធ្វើអ្វីមួយ លោកដឹងពីសុខទុក្ខរបស់ប្រជាពលរដ្ឋ៖ «ការងារនេះបើក្នុងនាមអាជ្ញាធរខេត្ត ប្រជាពលរដ្ឋនៅក្នុងខេត្ត គឺជាប្រជាពលរដ្ឋខ្ញុំ ខ្ញុំធ្វើយ៉ាងម៉េចក៏យើងខ្ញុំគិតពីរឿងសុខទុក្ខប្រជាពលរដ្ឋដែរ។ អ៊ីចឹងបានហើយបងខ្ញុំជាប់រវល់បន្តិច»។
ទាក់ទងបញ្ហានេះ មានប្រជាពលរដ្ឋ និងមន្ត្រីសង្គមស៊ីវិលខ្លះរិះគន់អាជ្ញាធរ និងមន្ត្រីជំនាញសុរិយោដី ក្នុងការផ្ដល់ប្លង់កម្មសិទ្ធិស្របច្បាប់ទៅលើដីក្បែរមាត់ស្ទឹងពោធិ៍សាត់ ដោយអ្នកខ្លះទទួលបានប្លង់ និងអ្នកខ្លះអត់។ ការរិះគន់នេះ ត្រូវបានប្រធានមន្ទីររៀបចំដែនដី នគរូបនីយកម្ម និងសំណង់ ខេត្តពោធិ៍សាត់ លោក ចេង ឡៃ ឆ្លើយតបថា អ្នកដែលទទួលបានប្លង់កាន់កាប់ដីនៅតាមបណ្ដោយមាត់ស្ទឹងនោះ គឺដោយសារតែស្ថានដីលយចេញពីចំណីស្ទឹង ទើបមានការវាស់វែង និងចេញប្លង់កម្មសិទ្ធិដោយផ្អែកលើមូលដ្ឋានច្បាប់។
មន្ត្រីសម្របសម្រួលនៃអង្គការសិទ្ធិមនុស្សលីកាដូ (Licadho) ប្រចាំខេត្តពោធិ៍សាត់ លោក អេង ឈុនហាន ចង់ឃើញអាជ្ញាធរអនុវត្តច្បាប់ឲ្យបានស្មើមុខគ្នារវាងអ្នកមានលុយ ឬមានអំណាច និងប្រជាពលរដ្ឋក្រីក្រ។ លោកបន្តថា មុននឹងធ្វើការអភិវឌ្ឍ ឬយកទីតាំងណាមួយដើម្បីបម្រើផលប្រយោជន៍សាធារណៈ អាជ្ញាធរគប្បីប្រជុំរកដំណោះស្រាយ និងពិគ្រោះយោបល់ជាមួយពលរដ្ឋ៖ «រស់នៅហ្នឹងមានខ្លះតាំងពីឆ្នាំ១៩៩៣ ខ្លះឆ្នាំ១៩៩៦-១៩៩៧ អី គាត់មានចុះឈ្មោះក្នុងភូមិក្នុងឃុំទាំងបញ្ជីចុះឈ្មោះបោះឆ្នោតនៅតាមមណ្ឌលមួយៗ។ ដូច្នេះ ការតាំងទីលំនៅរបស់គាត់ បើយើងវិភាគទៅឃើញថា មិនមែនជាអ្នកមកនៅអនាធិបតេយ្យទេ»។
នៅក្នុងសេចក្ដីជូនដំណឹងរបស់សាលាខេត្តពោធិ៍សាត់ ចុះហត្ថលេខាដោយអតីតអភិបាលខេត្ត លោក ខួយ សុខា នៅថ្ងៃទី២៥ ខែមីនា ឆ្នាំ២០១៤ បញ្ជាក់ថា ប្រជាពលរដ្ឋដែលកំពុងរស់នៅ និងធ្វើអាជីវកម្មលើដីចំណីស្ទឹងត្រើយខាងលិចចាប់ពីទំនប់ក្បាលហុង ក្នុងភូមិក្បាលហុង រហូតដល់ផ្លូវក្រវាត់ក្រុងនៃភូមិពោធិ៍កំបោរ ឃុំវាល ស្រុកកណ្ដៀង ត្រូវរុះរើផ្ទះសម្បែង និងផលដំណាំផ្សេងៗចេញឲ្យអស់នៅមុនថ្ងៃទី១៥ ខែឧសភា ឆ្នាំ២០១៤ ដោយរដ្ឋបាលសាលាខេត្តមានផែនការសាងសង់ជើងទេរច្រាំងស្ទឹង រៀបចំសួនច្បារ និងដាំបង្គោលភ្លើងបំភ្លឺនៅទីសាធារណៈក្នុងពេលឆាប់ៗខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។