គ្រួសាររបស់ពលរដ្ឋទាំង ២រូប ដែលត្រូវបានមន្ត្រីឧទ្យានជាតិព្រះមុនីវង្សបូកគោ ចាប់ខ្លួនកាលពីព្រឹកថ្ងៃទី២៥ ខែតុលា ពាក់ព័ន្ធនឹងការរុករានយកដីនៅតំបន់ឧទ្យានជាតិ កំពុងព្រួយបារម្ភពីសុខទុក្ខ និងសុខភាពរបស់ជនសង្ស័យនៅក្នុងពន្ធនាគារ។
ពលរដ្ឋដែលរងការចោទប្រកាន់នោះមានឈ្មោះ ស្វាយ ជន អាយុ ៦៨ឆ្នាំ និងអ្នកភូមិម្នាក់ទៀតឈ្មោះ ប៊ុន ឡេវ ហៅ ចាន់ ធី អាយុ ៧២ឆ្នាំ រស់នៅភូមិព្រែកក្រែង ឃុំព្រែកត្នោត ស្រុកទឹកឈូ។
ភរិយារបស់ លោក ប៊ុន ឡេវ គឺអ្នកស្រី ឈុន ផា ថ្លែងនៅថ្ងៃទី៣០ ខែតុលា ថា ស្វាមីរបស់អ្នកស្រីត្រូវមន្ត្រីឧទ្យានជាតិព្រះមុនីវង្សបូកគោ ចាប់ខ្លួនកាលពីថ្ងៃទី២៥ ខែតុលា និងបញ្ជូនសំណុំរឿងទៅសាលាដំបូងខេត្តកំពត ហើយសាលាដំបូងខេត្តក៏បានឃុំខ្លួនស្វាមីគាត់នៅក្នុងពន្ធនាគារខេត្តភ្លាមៗ។ អ្នកស្រីបន្តថា នៅពេលអ្នកស្រីទៅពន្ធនាគារ ដើម្បីសុំជួបសួរសុខទុក្ខស្វាមីគាត់ បែរជាមន្ត្រីពន្ធនាគារហាមមិនឲ្យអ្នកស្រីចូលជួបនោះទេ។
អ្នកស្រី ឈុន ផា៖ «បីថ្ងៃអាទិត្យហ្នឹង លោកមេឃុំបាននាំខ្ញុំឲ្យទៅជួបគាត់ម្ដង។ ឥឡូវខ្ញុំសុំជួបគាត់យកបាយយកទឹកអី ខ្ញុំចង់ដឹងគាត់ឈឺជាអី សួរសុខទុក្ខគាត់ គេដល់១ខែអីបានគេឲ្យជួប។ វាអត់មានជាក់ស្ដែងសោះ គ្រាន់តែស៊ីឈ្នួលគេហ្នឹង១កុង៤ម៉ឺន ៣ថ្ងៃទៅ ៣ថ្ងៃកន្លះ ទើបបាន១កុង៤ម៉ឺនហ្នឹង។ ខ្ញុំតាំងពីថ្ងៃចាប់គាត់មកទល់ឥឡូវ ខ្ញុំមិនទាន់ហូបបាយអស់ ១ស្លាបព្រាទេ ហើយមានតែពីរនាក់តាយាយ ហើយសុំគេជួបអត់បាន»។
វិទ្យុអាស៊ីសេរី មិនអាចទាក់ទងព្រះរាជអាជ្ញារងសាលាដំបូងខេត្តកំពត លោក ខៃ សម្ផស្ស បានទេ នៅថ្ងៃទី៣០ ខែតុលា។
មេធាវីនៃសមាគមអាដហុក (Adhoc) ប្រចាំខេត្តកំពត អ្នកស្រី ទ្រី ឈួន ដែលការពារក្ដីឲ្យអ្នកភូមិទាំងពីរ បានថ្លែងថា អ្នកស្រីនៅពុំទាន់បានសិក្សាលើសំណុំរឿងនេះឲ្យបានស៊ីជម្រៅនៅឡើយ ដោយរឿងនេះទើបតែកើតឡើងថ្មីៗនេះ។
ទាក់ទងបញ្ហានេះ មេឃុំព្រែកត្នោត លោក គង់ ប៊ុនរា មានប្រសាសន៍ថា លោកកំពុងស្វែងរកអន្តរាគមន៍ពីមេធាវី ដើម្បីធានាពលរដ្ឋរបស់គាត់ទាំងពីរនាក់ឲ្យនៅក្រៅឃុំ៖ «ខ្ញុំកំពុងជួយអន្តរាគមន៍ ខ្ញុំជឿថារឿងនេះប្រហែលជាអាចដោះបានទេ។ ខ្ញុំបានពឹងពមេធាវីហើយ បើយោងតាមការបំភ្លឺហេតុផល យើងថាហេតុផលនេះគ្រប់គ្រាន់ ព្រោះថាគាត់គ្រាន់តែអ្នកស៊ីឈ្នួលគេទេ»។
កាលពីថ្ងៃទី២៦ ខែតុលា ប្រជាពលរដ្ឋប្រមាណ ៦០នាក់ បានទៅជួបជុំគ្នានៅមុខសាលាដំបូងខេត្តកំពត ដើម្បីទាមទារអោយដោះលែងអ្នកភូមិទាំងពីររូបនោះ ប៉ុន្តែពុំមានការឆ្លើយតបទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។