អភិបាលខណ្ឌជ្រោយចង្វារ សន្យាដោះស្រាយជម្លោះដីរវាងប្រជាពលរដ្ឋមកពី ៣សង្កាត់ ក្នុងខណ្ឌជ្រោយចង្វារ និងក្រុមហ៊ុន អូ.ស៊ី.អាយ.ស៊ី (OCIC) របស់លោកឧកញ៉ា ពុង ខៀវសែ ដែលជាម្ចាស់គម្រោងក្រុងរណបនៅតំបន់នោះឲ្យចប់នៅក្នុងឆ្នាំ២០១៥នេះ។ ប៉ុន្តែប្រជាពលរដ្ឋ និងមន្ត្រីសង្គមស៊ីវិលដែលឃ្លាំមើលរឿងនេះហាក់មិនទាន់ជឿជាក់លើលទ្ធភាពនេះនៅឡើយ ព្រោះបញ្ហាការកំណត់តម្លៃសំណងផលប៉ះពាល់នៅខុសគ្នាឆ្ងាយនៅឡើយ។
អាជ្ញាធរខណ្ឌជ្រោយចង្វារ រាជធានីភ្នំពេញ បង្ហាញទិសដៅគម្រោងអភិវឌ្ឍន៍ក្រុងរណបនៅក្នុងខណ្ឌនេះ និងយុទ្ធសាស្ត្រដោះស្រាយជម្លោះផលប៉ះពាល់រវាងប្រជាពលរដ្ឋ និងម្ចាស់គម្រោង។
អភិបាលខណ្ឌជ្រោយចង្វារ លោក ឃ្លាំង ហួត មានប្រសាសន៍ថា ការដោះស្រាយលោកឈនៅខាងប្រជាពលរដ្ឋ ហើយឲ្យពលរដ្ឋភាគច្រើនចំណេញពីគម្រោងអភិវឌ្ឍនៅតំបន់នោះ។ យុទ្ធសាស្ត្រនោះគឺផ្ដល់ឱកាសឲ្យភាគីក្រុមហ៊ុន និងប្រជាពលរដ្ឋជួបចរចាគ្នាដើម្បីរកដំណោះស្រាយរួមដោយឈលើផលប្រយោជន៍រួម និងដោយសន្តិវិធី។
លោក ឃ្លាំង ហួត ក៏បានសន្យាដែរថា ក្នុងដោះស្រាយនេះគឺឈលើគោលការណ៍អភិវឌ្ឍនៅនឹងកន្លែងដោយគ្មានការជម្លៀសពលរដ្ឋចេញទៅឆ្ងាយក្រៅសហគមន៍នេះឡើយ៖ «គ្មានការរើចេញពីតំបន់នេះដាច់ខាត! បើថាឥឡូវបងប្អូននៅត្រង់នេះ ក្រុមហ៊ុនថាទើសចំប្លង់អភិវឌ្ឍន៍ ដូច្នេះសុំប្ដូរចេញ ប៉ុន្តែនៅក្នុងសង្កាត់តែមួយនៅក្នុងខណ្ឌតែមួយដដែល»។
ការសន្យានេះធ្វើឡើងក្នុងកិច្ចប្រជុំមួយជាមួយតំណាងពលរដ្ឋនៅសាលាខណ្ឌជ្រោយចង្វារ នៅព្រឹកថ្ងៃទី៩ កុម្ភៈ ក្រោយពលរដ្ឋប្រមាណជិត ១០០នាក់មកពី ៣សង្កាត់ គឺសង្កាត់ជ្រោយចង្វារ សង្កាត់ព្រែកលៀប និងសង្កាត់ព្រែកតាសេក បាននាំគ្នាតវ៉ានឹងក្រុមហ៊ុន អូ.ស៊ី.អាយ.ស៊ី ដែលលើកស្លាកគំនូរប្លង់គម្រោងអភិវឌ្ឍន៍ទីក្រុងរណបជ្រោយចង្វារ ដោយប៉ះចំដីរបស់ពលរដ្ឋទាំងនោះនិងមិនទាន់បានបញ្ចប់ដំណោះស្រាយផលប៉ះពាល់។
ទោះជាយ៉ាងណាក៏ដោយ អភិបាលខណ្ឌជ្រោយចង្វារ លោក ឃ្លាំង ហួត ក៏បានចេញមុខសម្របសម្រួល និងបង្ហាញគោលការណ៍ដោះស្រាយ ព្រមទាំងទិសដៅអភិវឌ្ឍមូលដ្ឋាននោះជូនប្រជាពលរដ្ឋឲ្យស្ងប់ចិត្ត។ ក្នុងនោះមានគោលការណ៍កាត់ដីភូមិចាស់ចេញពីគម្រោង ដោយគិតពីអ័ក្សផ្លូវ ១០០ម៉ែត្រ ហើយផុតពី ១០០ម៉ែត្រនោះ គ្រោងនឹងសង់ផ្លូវមួយខ្សែ ដែលមានទទឹង ២០ ទៅ ២៥ម៉ែត្រ សង់ប្រព័ន្ធលូ និងប្រព័ន្ធភ្លើងអគ្គិសនី។
ប៉ុន្តែដីដែលចំលើផ្លូវនោះ លោកមិនទាន់កំណត់ថា នឹងត្រូវផ្តល់សំណងក្នុងកម្រិតណានោះទេ ដោយរង់ចាំអ្នកជំនាញសិក្សាបង្ហាញពីទំហំនៃផលប៉ះពាល់នោះចប់សិន។ ពលរដ្ឋក៏យល់ព្រមផ្អាកតវ៉ាបណ្ដោះអាសន្ន និងរង់ចាំមើលការសន្យានោះទៅមុខទៀត។
តំណាងពលរដ្ឋមួយរូប លោក ជា សុផាត ដែលរួមកិច្ចប្រជុំនោះមានប្រសាសន៍ថា លទ្ធផលនៃកិច្ចប្រជុំ និងមធ្យោបាយដោះស្រាយដែលលើកឡើងឡើងដោយអភិបាលខណ្ឌនោះ លោកនឹងយកទៅពិភាក្សាជាមួយសមាជិកសហគមន៍ឲ្យពិចារណាបន្ថែមទៀត និងត្រៀមចូលរួមពិភាក្សាផ្ទាល់ជាមួយតំណាងក្រុមហ៊ុនជាថ្មីម្ដងទៀតក្នុងការស្វែងរកដំណោះស្រាយ៖ «ចំណុចដែលគ្រោងលើកយកទៅពិភាក្សាជាមួយក្រុមហ៊ុននោះ ទីមួយចំពោះដីស្រែចំការពួកខ្ញុំ សុំឲ្យតម្លៃសមរម្យ ដោយគិតតាមទីផ្សារសេរី និងតម្លៃតាមលក្ខណៈបង់ពន្ធ។ តម្លៃបង់ពន្ធនោះមាន១០០ ២០០ ទៅ ៥០០ក្នុងមួយម៉ែត្រការ៉េ ដែលរដ្ឋបានកំណត់ឲ្យបង់ពន្ធកាលពីនៅក្នុងខណ្ឌឬស្សីកែវ អ៊ីចឹងយើងខ្ញុំនឹងជជែកគ្នាកំណត់តម្លៃមួយសមស្របមិនហួសហេតុ ដែលអាចឲ្យភាគីក្រុមហ៊ុន និងប្រជាពលរដ្ឋអាចទទួលយកបានទាំងអស់គ្នា»។
ចំណែកមន្ត្រីសិទ្ធិលំនៅឋាន លោក ណន អូនី ដែលឃ្លាំមើលរឿងនេះមានទស្សនៈថា បើសិនជាអាជ្ញាធរ និងក្រុមហ៊ុនមិនមានឆន្ទៈដោះស្រាយដោយតម្លាភាពលើការកំណត់តម្លៃដីឲ្យស្របទៅតាមទីផ្សារសេរី ឬតាមតម្លៃមួយដែលរដ្ឋកំណត់ឲ្យបង់ពន្ធចំពោះដីនៅតំបន់នោះទេ នោះការដោះស្រាយពិតជាមិនអាចលឿនដូចការសន្យារបស់អភិបាលខណ្ឌនោះទេ។ ប៉ុន្តែបើអាជ្ញាធរ និងក្រុមហ៊ុនមានឆន្ទៈដោះស្រាយផ្ដល់យុត្តិធម៌ពិតប្រាកដនោះ ការដោះស្រាយពិតជាលឿន ហើយអាចលឿនជាងការកំណត់របស់អភិបាលខណ្ឌនោះទៅទៀត៖ «បើប្រៀបធៀបតម្លៃដែលរដ្ឋដាក់បង់ពន្ធ និងតម្លៃដែលក្រុមហ៊ុនកំណត់ គឺខុសគ្នាឆ្ងាយពេក អាហ្នឹងមិនទាន់ប្រៀបធៀបនឹងទីផ្សារសេរីនោះទេ។ ដូច្នេះបញ្ហាតម្លៃជាឧបសគ្គមួយធំបំផុតក្នុងការបញ្ចប់ទំនាស់រវាងប្រជាពលរដ្ឋនិងក្រុមហ៊ុន អូ.ស៊ី.អាយ.ស៊ី»។
ទោះយ៉ាងណា អភិបាលខណ្ឌបញ្ជាក់ថា មិនអាចកំណត់តម្លៃដីនៅតំបន់នោះទៅតាមទីផ្សារសេរីបានទេ ប៉ុន្តែលោកគិតថា ភាគីពាក់ព័ន្ធនឹងកំណត់តម្លៃក្នុងចន្លោះណាមួយដែលអាចទទួលយកបានទាំងអស់គ្នា។
កន្លងមកក្រុមហ៊ុនបានដាក់តម្លៃសំណងចុងក្រោយជាចំហ គឺ ១៥ដុល្លារក្នុងមួយម៉ែត្រការ៉េ ឬអាចផ្តល់ ១០ភាគរយទៅម្ចាស់ដីក្រោយបូមខ្សាច់ចាក់ពេញហើយ ប៉ុន្តែករណីនេះត្រូវបានប្រជាពលរដ្ឋបដិសេធ។ ក្រៅពីនេះ ក្រុមហ៊ុនក៏មានការចរចាតម្លៃសម្ងាត់នៅតាមកន្លែងខ្លះៗ រហូតមានការព្រមព្រៀងគ្នាតែពួកគេមិនព្រមបញ្ចេញឲ្យដឹងទេ។
តំបន់អភិវឌ្ឍន៍នោះមានទំហំប្រមាណជិត ៤០០ហិកតារ ចំណែកអ្នករងផលប៉ះពាល់អាជ្ញាធរមិនទាន់ដឹងថា មានចំនួនសរុបប៉ុន្មានច្បាស់លាស់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។