តំណាងប្រជាពលរដ្ឋចំនួន ៦នាក់ កំពុងស្វះស្វែងរកកិច្ចអន្តរាគមន៍ពីស្ថាប័នរដ្ឋាភិបាលឲ្យជួយរកដីកសិកម្មជូនប្រជាពលរដ្ឋជាង ១.៧០០គ្រួសារ នៅឃុំបឹងប្រាំ ស្រុកបវេល ខេត្តបាត់ដំបង។ ការទទួលបានដីបង្កបង្កើនផល នឹងអាចជួយកាត់បន្ថយភាពក្រីក្រ និងការធ្វើចំណាកស្រុកទៅរកការងារនៅប្រទេសថៃ។
អ្នកភូមិឈ្មោះ យ៉ាន យេន ថ្លែងនៅថ្ងៃទី១៦ មីនា ថា កាលពីថ្ងៃទី១៤ ខែមីនា ពួកគាត់បានធ្វើដំណើរទៅក្រសួងមហាផ្ទៃ ដោយបានដាក់ពាក្យបណ្ដឹង រួមនិងឯកសារពាក់ព័ន្ធជាច្រើនទៀត ទាក់ទិនការខ្វះដីបង្កបង្កើនផលរបស់ប្រជាពលរដ្ឋចំនួន ៧ភូមិ នៅឃុំបឹងប្រាំ ស្រុកបវេល ខេត្តបាត់ដំបង។ លោកស្រីបញ្ជាក់ថា រហូតមកដល់ពេលនេះ ក្រុមអ្នកភូមិទទួលបានតែលំនៅឋាន ប៉ុន្តែដីកសិកម្ម អាជ្ញាធរមូលដ្ឋានពុំទាន់បានបែងចែកឲ្យអ្នកភូមិនោះទេ។
លោកស្រី យ៉ាន យេន៖ «ដីមួយរ៉ៃរស់នៅ អ្នកខ្លះខកចិត្តមិនបានដី ខ្លះចេញទៅរកស៊ីនៅថៃ ទៅ ខ្លះគេនៅរ៉ាំរ៉ៃមិនដឹងមានមុខរបរអី ហើយខ្ញុំមកក្រសួងមហាផ្ទៃ ដើម្បីឲ្យគាត់ជួយដោះស្រាយរឿងដីហ្នឹង ធ្វើម៉េចឲ្យប្រជាពលរដ្ឋបានដីបង្កបង្កើនផលដូចប្រជាជនដទៃ ព្រោះសព្វថ្ងៃនេះ ប្រជាជនកំពុងតែអត់ ព្រោះខែជិតធ្វើស្រែហើយ»។
បឹងប្រាំ ជាឃុំទើបបង្កើតថ្មីនៅក្នុងអាណត្តិបោះឆ្នោតឃុំសង្កាត់ កាលពីឆ្នាំ២០១២ កន្លងទៅ។ រដ្ឋាភិបាលបានចេញអនុក្រឹត្យរៀបចំដីទំហំជិត ៤ពាន់ហិកតារ នៅឃុំបឹងប្រាំ ដើម្បីបែងចែកជូនអតីតគ្រួសារយុទ្ធជន និងប្រជាពលរដ្ឋដែលពុំមានដីធ្លីបង្កបង្កើនផល។ ប៉ុន្តែគម្រោងនេះបានជាប់គាំងរហូតមកដល់សព្វថ្ងៃ ដោយសារដីនៅឃុំបឹងប្រាំ នោះមានជម្លោះរ៉ាំរ៉ៃដោះស្រាយមិនចេះចប់។
ប្រជាពលរដ្ឋឈ្មោះ សាន់ ប៊ុនគ្រី បញ្ជាក់ថា ប្រជាពលរដ្ឋចំនួន ៧ភូមិ ក្នុងឃុំបឹងប្រាំ បច្ចុប្បន្នទទួលបានដីលំនៅឋាន ប៉ុន្តែពុំមានដីកសិកម្មទេ។ បញ្ហានេះ បង្ខំឲ្យពួកគាត់ធ្វើចំណាកស្រុកទៅរកការងារធ្វើនៅប្រទេសថៃ។ លោកសុំឲ្យរដ្ឋាភិបាលជួយរកដីជូនក្រុមអ្នកភូមិ៖ «អន្តរាគមន៍ធ្វើយ៉ាងម៉េចឲ្យបានដីសម្រាប់អាស្រ័យផលមួយគ្រួសារបានពីរហិកតារ។ ការដោះស្រាយ សូម្បីតែអាជ្ញាធរស្រុកខេត្ត ដោះស្រាយមិនចេញដែរ ព្រោះតាំងពីប៉ុន្មានឆ្នាំមកហើយនៅតែរញ៉េរញ៉ៃ អត់ទៅមុខទៅក្រោយរួច»។
កាលពីឆ្នាំ២០០៥ ក្រុមអ្នកភូមិនាំគ្នាចូលទៅរស់នៅតំបន់បឹងប្រាំ ដោយបានកាប់ឆ្ការព្រៃបង្កបង្កើនផលបានធំតូចបានលទ្ធភាព ប៉ុន្តែជម្លោះដីធ្លីនៅតំបន់នោះ ក៏បានកើតមានជាហូរហែរហូតមានការកាប់ចាក់ និងចាប់ខ្លួនអ្នកភូមិដាក់គុកថែមទៀត។ ក្រុមអ្នកភូមិអះអាងថា ប្រជាពលរដ្ឋនៅតាមភូមិទាំង៧ ក្នុងឃុំបឹងប្រាំ បានបង់លុយទៅឲ្យក្រុមអាជ្ញាធរភូមិក្នុងមួយគ្រួសារ ២លាន ៥សែន ទៅ ៣លានរៀល ដើម្បីជាថ្នូរទទួលបានដីស្រែទំហំ ៥ហិកតារ៖ «មេភូមិគេយកខ្លះទៅ ២លានកន្លះ ខ្លះបីលានរៀល ហើយដីនោះគេថាចែកឲ្យ ៥ហិកតារ។ ដីភូមិ១រ៉ៃ ប៉ុន្តែរហូតមកដល់ពេលនេះ បានដីតែ១រ៉ៃ ហើយដីកសិកម្មវាមិនទាន់បាន ៧ភូមិបង់ដូចតែគ្នា»។
វិទ្យុអាស៊ីសេរី នៅពុំទាន់អាចទាក់ទងលោក ឈា នី មេឃុំបឹងប្រាំ ដើម្បីបញ្ជាក់ជុំវិញបញ្ហានេះបានទេ។
ក្រុមអ្នកភូមិបញ្ជាក់ថា ក្រុមអាជ្ញាធរមូលដ្ឋានបានសន្យារកដីចែកជូនអ្នកភូមិ ប៉ុន្តែការពិតរកដីចែកជូនប្រជាពលរដ្ឋពុំបានរហូតមកដល់សព្វថ្ងៃ។ កន្លងទៅនេះ ក្រុមមន្ត្រីអង្គការសង្គមស៊ីវិល ធ្លាប់ជំរុញឲ្យអាជ្ញាធរមូលដ្ឋានពន្លឿនការដោះស្រាយដីកសិកម្មជូនប្រជាពលរដ្ឋឲ្យឆាប់ ដើម្បីជួយដល់ភាពខ្វះខាតរបស់អ្នកភូមិ និងកាត់បន្ថយការធ្វើចំណាកស្រុកទៅរកការងារធ្វើនៅប្រទេសថៃ។ បញ្ហាដោះស្រាយមិនចេញ ដោយសារដីនៅតំបន់នោះមានអាជ្ញាធរមូលដ្ឋានខ្លះក៏មានជាប់ពាក់ព័ន្ធនៅក្នុងជម្លោះដីធ្លីនោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។