សាលាដំបូងរាជធានីភ្នំពេញ ប្រកាសលើកពេលសវនាការលើសំណុំរឿងរបស់ជនជាប់ចោទឈ្មោះ វន់ ពៅ ទៅបើកសវនាការនៅព្រឹកថ្ងៃទី២២ ខែឧសភា បន្តទៀត។ សវនាការនៅថ្ងៃពុធ ទី២១ នេះ បានផ្អាកត្រឹមម៉ោងប្រមាណ ៣រសៀល បន្ទាប់ពីមានសំណូមពររបស់ លោក វន់ ពៅ ដែលមិនអាចឈរឆ្លើយសំណួរក្នុងសវនាការបាន។ ចៅក្រមតុលាការបានទទួលយកសំណូមពររបស់ជនសង្ស័យ ក្រោយបើកសវនាការបានមួយរយៈពេលខ្លី។
សវនាការនៅសាលាដំបូងរាជធានីភ្នំពេញ លើសំណុំរឿងជនសង្ស័យឈ្មោះ វន់ ពៅ និងមនុស្ស ២២នាក់ទៀត លើសំណុំរឿងបង្កហិង្សានៅផ្លូវវ៉េងស្រេង និងរោងចក្រ យ៉ាក ជីន នាថ្ងៃពុធ ទី២១ ខែឧសភា តុលាការបានចែកសាលសវនាការជាពីរបន្ទប់ដាច់ដោយឡែកពីគ្នា គឺបន្ទប់ ឬសាលសវនាការទី១ ជាសវនាការទៅលើជនជាប់ចោទ ១០នាក់ លើសំណុំរឿងនៅរោងចក្រ យ៉ាក ជីន និងសាលសវនាការទី២ គឺជាសវនាការ ដើម្បីសាកសួរសាក្សីរបស់ដើមបណ្ដឹង។
សវនាការនៅក្នុងបន្ទប់សវនាការទី១ ព្រឹកនេះ តុលាការបានចោទសួរលើជនជាប់ចោទតែម្នាក់ទេ គឺលោក វន់ ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ ប៉ុន្តែចៅក្រមបានប្រកាសផ្អាកសវនាការមុនម៉ោងកំណត់ ដោយសារ លោក វន់ ពៅ មានអាការៈងងឹតមុខ និងស្ពឹកស្រពន់ មិនអាចឈរឆ្លើយសំណួរក្នុងសវនាការនោះបាន។
លោក អំ សំអាត ប្រធានផ្នែកស៊ើបអង្កេតអង្គការលីកាដូ (Licadho) ដែលចូលស្តាប់ក្នុងសវនាការ បានឲ្យដឹងថា សវនាការនៅពេលព្រឹកនេះ មានការចោទសួរតឹងតែងរវាងចៅក្រម ព្រះរាជអាជ្ញាជាមួយ លោក វន់ ពៅ និងមេធាវីការពារជនជាប់ចោទ។ ជាងនេះ តុលាការបានលើកយករូបភាពឯកសារជារូបភាពវីដេអូដែល លោក វន់ ពៅ ចូលរួមទាមទារដំឡើងប្រាក់ខែជូនកម្មករ នៅពីមុខទីស្ដីការគណៈរដ្ឋមន្ត្រី កាលពីថ្ងៃទី៣០ ខែធ្នូ ឆ្នាំ២០១៣ ដែលមិនជាប់ពាក់ព័ន្ធនឹងសំណុំរឿងនៅរោងចក្រ យ៉ាក ជីន មកចាក់បញ្ចាំងក្នុងសវនាការ។
លោក អំ សំអាត៖ «នៅក្នុងរូបភាពនោះ ចៅក្រមហាក់បានបញ្ជាក់ម្តងហើយម្តងទៀតទៅលើសម្ដីរបស់ លោក វន់ ពៅ ដែលរូបភាពទាំងអស់នេះហាក់បីដូចជាមិនទាក់ទងគ្នាទៅនឹងរោងចក្រ យ៉ាក ជីន ទេ គឺវាអត់ទាក់ទងគ្នាទាល់តែសោះ។ ប៉ុន្តែ យើងនៅតែឆ្ងល់ថា មិនដឹងជាគោលបំណងអ្វី បានជាតុលាការប្រើប្រាស់រូបវីដេអូនេះយកមកចាក់បញ្ចាំងនៅពេលនេះ ហើយចៅក្រមក៏បានបញ្ជាក់ថា រូបភាពនេះមិនទាក់ទងនឹងរោងចក្រ យ៉ាក ជីន ដែរ។ ត្រង់ចំណុចនេះ យើងនៅតែឆ្ងល់»។
លោក អំ សំអាត បានលើកជាចម្ងល់ទៅលើអង្គសវនាការនោះ ពីព្រោះចៅក្រមហាក់បានដើរតួនាទី ឬផ្ដើមសំណួរជំនួសឲ្យព្រះរាជអាជ្ញា ច្រើនជាងតួនាទីជាចៅក្រម។ លោក អំ សំអាត មើលឃើញថា សវនាការលើសំណុំរឿងនៅរោងចក្រ យ៉ាក ជីន ដែលមានជនសង្ស័យចំនួន ១០នាក់ តុលាការហាក់មិនបង្ហាញពីអព្យាក្រឹត្យរបស់ខ្លួនទេនៅក្នុងអង្គសវនាការ។
លោក អំ សំអាត៖ «ហើយអ្វីដែលឃើញភាពខុសគ្នានៅពេលដែល លោក វន់ ពៅ ក៏ដូចជាជនជាប់ចោទផ្សេងទៀត និងមេធាវី និយាយដល់រោងចក្រ យ៉ាក ជីន ហើយនិយាយដល់ការប្រើប្រាស់កងកម្លាំងយោធា៩១១ ដែលប្រើប្រាស់អំពើហិង្សាដល់ពួកគាត់ ត្រូវបានចៅក្រម ត្រូវបានព្រះរាជអាជ្ញាជំទាស់ថា វាខុសពីអង្គហេតុ ខុសពីសំណួរដែលសួរ។ នេះជាចម្ងល់របស់យើង មិនដឹងថាមានបញ្ហាអ្វី។ ហើយមួយទៀត ដែលយើងគួរតែឆ្ងល់ដែរនៅព្រឹកនេះដែរ យើងហាក់បីដូចជាឃើញថា ចៅក្រមគាត់ដើរតួនាទីជាព្រះរាជអាជ្ញាច្រើនជាងចៅក្រម ដោយការតាំងសំណួររបស់គាត់ហាក់ដូចជាសំណួររបស់ព្រះរាជអាជ្ញា»។
ទោះយ៉ាងណា សវនាការនៅព្រឹកថ្ងៃពុធ ទី២១ ឧសភា តុលាការសាលាដំបូងបានអនុញ្ញាតឲ្យគ្រួសារជនជាប់ចោទ មន្ត្រីសង្គមស៊ីវិល អ្នកកាសែត និងមន្ត្រីស្ថានទូតមួយចំនួន ចូលស្តាប់សវនាការ ប៉ុន្តែមិនអនុញ្ញាតឲ្យយកម៉ាស៊ីនថតរូប ឬទូរស័ព្ទចូលក្នុងបន្ទប់សវនាការនោះទេ។ មុនចៅក្រមផ្អាកសវនាការ លោក វន់ ពៅ ក៏បានស្នើលោកចៅក្រមសម្រាកចំនួន ២ដង នៅពេលព្រឹកម្តង និងពេលល្ងាចមួយដង មុននឹងសុំចៅក្រមប្រកាសផ្អាក និងលើកពេលសវនាការ។
នៅក្នុងបន្ទប់សវនាការ លោក វន់ ពៅ បានច្រានចោលការចាក់រូបភាពវីដេអូឯកសាររបស់តុលាការ ជុំវិញសកម្មភាពរបស់លោកជួយទាមទារប្រាក់ខែគោលកម្មករ នៅពីមុខទីស្ដីការគណៈរដ្ឋមន្ត្រី កាលពីថ្ងៃទី៣០ ខែធ្នូ ឆ្នាំ២០១៣ ដោយភ្ជាប់ទៅនឹងព្រឹត្តិការណ៍នៅថ្ងៃទី២ ខែមករា ឆ្នាំ២០១៤ នៅមុខរោងចក្រ យ៉ាក ជីន។
រីឯកូនប្រុសតូចៗរបស់ លោក វន់ ពៅ ដែលមានអាយុមិនដល់ ១០ឆ្នាំផងនោះ ក៏បានទទូចដល់តុលាការឲ្យដោះលែងឪពុកបាននៅក្រៅពន្ធនាគារ ដើម្បីទទួលព្យាបាលជំងឺ៖ «សូមឲ្យតុលាការដោះលែងប៉ារបស់ខ្ញុំបានទៅពិនិត្យជំងឺនៅក្រៅឃុំ។ គាត់គ្មានកំហុសទេ គឺគ្រាន់តែចូលរួមជួយតាមទារប្រាក់ខែកម្មករចំនួន ១៦០ដុល្លារក្នុង១ខែទេ។ ដោះលែងប៉ាខ្ញុំទៅ ប៉ាខ្ញុំមានជំងឺ ដោះលែងទៅ។ ប៉ាខ្ញុំអត់មានកំហុសអីទេ សូមឲ្យតុលាការដោះលែងប៉ាខ្ញុំទៅ»។
លោក វន់ ពៅ រួមជាមួយសកម្មជនសិទ្ធិមនុស្ស សកម្មជនដីធ្លី និងកម្មកររោងចក្រចំនួន ២២នាក់ទៀត ត្រូវតុលាការចោទប្រកាន់ពីបទប្រព្រឹត្តអំពើហិង្សាដោយចេតនា និងបទបំផ្លិចបំផ្លាញទ្រព្យសម្បត្តិសាធារណៈ និងឯកជន នៅក្នុងព្រឹត្តិការណ៍ប៉ះទង្គិចគ្នារវាងកម្លាំងចម្រុះរដ្ឋាភិបាល បង្ក្រាបបាតុកម្មកម្មកររោងចក្រកាត់ដេរនៅតាមផ្លូវវ៉េងស្រេង និងរោងចក្រ យ៉ាក ជីន កាលពីថ្ងៃទី២ និងថ្ងៃទី៣ ខែមករា ឆ្នាំ២០១៤។ ហេតុការណ៍នោះ សមត្ថកិច្ចបានបាញ់សម្លាប់កម្មករប្រមាណ ៥នាក់ និងរងរបួសជាង ៤០នាក់ ព្រមទាំងចាប់ខ្លួនចំនួន ២៣នាក់។ អំពើហិង្សានេះ មន្ត្រីសង្គមស៊ីវិលថ្លែងថា ជនដៃដល់ដែលជាអ្នកបង្កហិង្សាឲ្យមានមនុស្សស្លាប់ និងរបួស បែរជាតុលាការមិនបានចាប់ខ្លួនយកមកផ្ដន្ទាទោស ប៉ុន្តែទៅចាប់ខ្លួនជនរងគ្រោះដោយអំពើហិង្សាទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។