តំណាងគណបក្សសង្គ្រោះជាតិ ខេត្តសៀមរាប បានចោទប្រកាន់សមត្ថកិច្ចរបស់រដ្ឋាភិបាលដែលចាប់ខ្លួនសកម្មជនរបស់ខ្លួនម្នាក់ បញ្ជូនទៅឲ្យតុលាការឃុំខ្លួននៅក្នុងពន្ធនាគារជាបណ្ដោះអាសន្ន ថាជាការគំរាមកំហែងផ្នែកនយោបាយ ច្រើនជាងរូបភាពនៃការអនុវត្តច្បាប់ការពារធនធានធម្មជាតិ។
ការចាប់ខ្លួនសកម្មជនគណបក្សប្រឆាំងម្នាក់នេះ ធ្វើឡើងកាលពីថ្ងៃទី១១ ខែមករា ដោយសារតែអាជ្ញាធរចោទប្រកាន់សកម្មជនគណបក្សនយោបាយរូបនោះ ថាមានជាប់ពាក់ព័ន្ធនឹងការបូមខ្សាច់ធ្វើអាជីវកម្មដោយមិនមានច្បាប់អនុញ្ញាត។
មន្ត្រីគណបក្សសង្គ្រោះជាតិ ខេត្តសៀមរាប អំពាវនាវឲ្យតុលាការខេត្តនេះដោះលែងសកម្មជនគណបក្សរបស់ខ្លួនម្នាក់ ដែលរស់នៅឃុំតាសោម នៃស្រុកអង្គរជុំ ឲ្យមានសេរីភាពវិញ។
ការអំពាវនាវ បានធ្វើឡើងនៅក្រោយពេល ៤ថ្ងៃបន្ទាប់ពីសមត្ថកិច្ចបានចាប់ខ្លួនសកម្មជនគណបក្សប្រឆាំងម្នាក់ បញ្ជូនទៅឲ្យតុលាការឃុំខ្លួននៅក្នុងពន្ធនាគារខេត្តសៀមរាប។
អនុប្រធានគណៈកម្មាធិការប្រតិបត្តិគណបក្សសង្គ្រោះជាតិ ខេត្តសៀមរាប គឺលោក សុខ គឹមសេង។ លោកអះអាងកាលពីព្រឹកថ្ងៃអាទិត្យ ទី១៥ ខែមករា ថា កាលពីថ្ងៃទី១១ ខែមករា សមត្ថកិច្ចបានចាប់ខ្លួនបេក្ខជនត្រៀមឈរឈ្មោះប្រកួតប្រជែងការបោះឆ្នោតក្រុមប្រឹក្សាឃុំ-សង្កាត់របស់គណបក្សសង្គ្រោះជាតិម្នាក់ឈ្មោះ ថុន ធឿត អាយុជាង ៥០ឆ្នាំ នៅឃុំតាសោម នៃស្រុកអង្គរជុំ។
លោក សុខ គឹមសេង ឲ្យដឹងថា ការចាប់ខ្លួននេះដោយសារតែគាត់បូមខ្សាច់លក់នៅក្នុងដីកម្មសិទ្ធិរបស់គាត់ ប៉ុន្តែអាជ្ញាធរបែរជាចោទប្រកាន់ទៅលើការប្រកបអាជីវកម្មដោយគ្មានច្បាប់។ លោកយល់ថា តាមការពិនិត្យទៅលើការចាប់ខ្លួនសកម្មជននេះ គឺជាអំពើគំរាមកំហែងផ្នែកនយោបាយច្រើនជាងការអនុវត្តច្បាប់ ដើម្បីការពារធនធានធម្មជាតិ ពីព្រោះតែនៅតំបន់អង្គរជុំមិនមែនអ្នកបូមខ្សាច់លក់មានតែសកម្មជនគណបក្សប្រឆាំងតែម្នាក់ឯងនោះឡើយ៖ « គណបក្សសង្គ្រោះជាតិ ចាត់ទុកការចាប់ខ្លួននេះ ជាហេតុផលនយោបាយ ដែលគណបក្សកាន់អំណាចបានធ្វើមកលើគណបក្សប្រឆាំង »។
មន្ត្រីគណបក្សសង្គ្រោះជាតិ ដដែល ចោទប្រកាន់ថា សមត្ថកិច្ចរដ្ឋាភិបាលដែលលម្អៀងទៅរកគណបក្សកាន់អំណាច ហាក់ដូចជារៀបចំផែនការជាប្រព័ន្ធ ដើម្បីចាប់ខ្លួនសកម្មជនរបស់គណបក្សប្រឆាំងរូបនោះ ពីព្រោះតែតុលាការបានចេញដីកាអញ្ជើញសាមីខ្លួនឲ្យទៅដោះស្រាយនៅថ្ងៃទី៨ ខែធ្នូ ឆ្នាំ២០១៦ ប៉ុន្តែនៅពេលដែលប៉ូលិសយកដីកាទៅឲ្យសាមីខ្លួន បែរជានៅថ្ងៃទី១២ ខែធ្នូ ដែលហួសអំឡុងពេលនៃការណាត់ជួបទៅហើយ។
កាលពីព្រឹកថ្ងៃអាទិត្យ ទី១៥ ខែមករា ក្រុមគ្រួសាររបស់សកម្មជនដែលត្រូវបានចាប់ខ្លួននោះ បានមកដល់ការិយាល័យរបស់អង្គការសិទ្ធិមនុស្សក្រៅរដ្ឋាភិបាលក្នុងទីរួមខេត្តសៀមរាប ដើម្បីពឹងពាក់ឲ្យជួយរកវិធីដោះស្រាយ។
កូនប្រសាប្រុសរបស់សកម្មជនរូបនោះ លោក ទូច វុទ្ធី មានប្រសាសន៍ថា កាលពីថ្ងៃទី២៦ ខែតុលា ឆ្នាំ២០១៦ កម្លាំងសមត្ថកិច្ច មន្ត្រីមន្ទីររ៉ែ និងថាមពល ព្រមទាំងព្រះរាជអាជ្ញារងរបស់តុលាការខេត្តសៀមរាប ធ្លាប់ចុះទៅដល់ការដ្ឋានបូមខ្សាច់របស់ឪពុកគាត់នៅឃុំគោកដូង ហើយក៏ឃាត់គ្រឿងចក្រយកទៅរក្សាទុក។ លុះដល់ថ្ងៃទី៨ ខែវិច្ឆិកា ក៏មានដីកាកោះហៅរបស់តុលាការឲ្យចូលខ្លួនទៅបំភ្លឺនៅថ្ងៃទី៨ ខែធ្នូ ក៏ប៉ុន្តែដីកានោះត្រូវសមត្ថកិច្ចយកទៅប្រគល់ឲ្យនៅថ្ងៃទី១២ ខែធ្នូ ទៅហើយ។
លោក ទូច វុទ្ធី មិនយល់ពីនីតិវិធីច្បាប់ជុំវិញករណីនោះទេ ប៉ុន្តែលោកទទូចឲ្យតុលាការដោះលែងឪពុករបស់លោកឲ្យមានសេរីភាពវិញ៖ « ខ្ញុំចង់សូមឲ្យតុលាការដោះលែងឪពុកក្មេងរបស់ខ្ញុំមកវិញ ពីព្រោះគាត់មានជំងឺ ឧស្សាហ៍ឈឺក្បាល។ ខ្ញុំព្រួយបារម្ភខ្លាចគាត់មានបញ្ហាជំងឺកាន់តែធ្ងន់ធ្ងរ ពេលដែលអត់មានកូនចៅនៅក្បែរខ្លួន »។
ក្រុមគ្រួសាររបស់សកម្មជនបានសង្ស័យថា ដើមបណ្ដឹងដែលប្ដឹងចោទប្រកាន់ឪពុករបស់គាត់ពីបទបូមខ្សាច់លក់គ្មានច្បាប់នោះ អាចជាមន្ត្រីមន្ទីររ៉ែ និងថាមពលខេត្តសៀមរាប។
អាស៊ីសេរី មិនអាចទាក់ទងប្រធានមន្ទីររ៉ែ និងថាមពល ខេត្តសៀមរាប លោក មាស ជូរ៉ានី ដើម្បីសុំការអធិប្បាយជុំវិញរឿងនេះបានថាយ៉ាងណានៅឡើយ នៅថ្ងៃអាទិត្យ ទី១៥ ខែមករា ដោយសារតែទូរស័ព្ទរបស់លោកបានបិទ។
ក្រុមអង្គការសិទ្ធិមនុស្សក្រៅរដ្ឋាភិបាល មានគម្រោងនឹងបើកការស៊ើបអង្កេតទៅលើករណីចាប់ខ្លួនសកម្មជនគណបក្សប្រឆាំងម្នាក់នេះនៅសប្ដាហ៍ខាងមុខ។
អ្នកស៊ើបអង្កេតរបស់អង្គការសិទ្ធិមនុស្សលីកាដូ (LICADHO) ខេត្តសៀមរាប លោក ចៅ ល័ក្ខវណ្ណា មានប្រសាសន៍ថា អង្គការរបស់លោកក៏ដូចជាអង្គការជាដៃគូ នៅមិនទាន់ចាត់ទុកការចាប់ខ្លួនបេក្ខជនត្រៀមឈរឈ្មោះប្រកួតប្រជែងការបោះឆ្នោតក្រុមប្រឹក្សាឃុំ-សង្កាត់របស់គណបក្សសង្គ្រោះជាតិ ម្នាក់នោះ ថាជាករណីអ្វីនៅឡើយទេ គឺត្រូវរង់ចាំការចុះស៊ើបអង្កេតជាមុនសិន៖ « ឥឡូវនេះខ្ញុំទើបតែបានសាកសួរព័ត៌មានពីក្រុមគ្រួសាររបស់គាត់ជាបឋម ហើយយើងនឹងសាកសួរបន្ថែមទៅទៀត ព្រមជាមួយនឹងការស្វែងរកភស្តុតាងបន្ថែម »។
ចំណែកអ្នកស៊ើបអង្កេតរបស់សមាគមការពារសិទ្ធិមនុស្សអាដហុក (ADHOC) លោក ច័ន្ទ ចំរើន មានប្រសាសន៍ប្រហាក់ប្រហែលគ្នាថា បើតាមលោកដឹង នៅចំណុចដែលសមត្ថកិច្ចចាប់ខ្លួនសកម្មជននោះ ក៏មានមនុស្សជាច្រើនប្រកបរបរបូមខ្សាច់លក់ដូចគ្នាដែរ ដូច្នេះករណីនេះ បើសមត្ថកិច្ចអនុវត្តច្បាប់ជាទូទៅ គឺវាមិនជាអ្វីទេ ប៉ុន្តែប្រសិនបើអនុវត្តច្បាប់ដោយស្តង់ដារពីរខុសគ្នា គឺវាអាចជាការគាបសង្កត់ខាងនយោបាយដែរ៖ « ពិនិត្យមើលទៅតាមអង្គហេតុហ្នឹង យើងឃើញថា នៅឆ្នាំ២០១៧ នេះ លោក ថុន ធឿត គាត់បានជាប់ជាបេក្ខជនត្រៀមឈរឈ្មោះប្រកួតប្រជែងការបោះឆ្នោតក្រុមប្រឹក្សាឃុំ - សង្កាត់ឲ្យគណបក្សសង្គ្រោះជាតិ ដូច្នេះអង្គការសិទ្ធិមនុស្សកំពុងសិក្សាករណីនេះ ថាតើការចាប់ខ្លួនវាពាក់ព័ន្ធទៅនឹងករណីខុសច្បាប់សុទ្ធសាធ ឬក៏មានពាក់ព័ន្ធនឹងគណបក្សនយោបាយ ?»។
គណបក្សសង្គ្រោះជាតិ ខេត្តសៀមរាប អះអាងថា ក្នុងរយៈពេលជាងមួយខែមកនេះ មានការគំរាមកំហែងពីសំណាក់អាជ្ញាធររបស់រដ្ឋាភិបាលមកលើសកម្មជននៃគណបក្សប្រឆាំងចំនួន ២ករណីហើយ។
កាលពីថ្ងៃទី១៣ ខែធ្នូ ឆ្នាំ២០១៦ ប្រធានយុវជននៃគណបក្សសង្គ្រោះជាតិ ប្រចាំក្រុងសៀមរាប ឈ្មោះ សៀក ចំណាប់ ក៏ត្រូវបានតុលាការខេត្តសៀមរាប កោះហៅទៅសាកសួរជុំវិញបទបរិហារកេរ្តិ៍ បន្ទាប់ពីគាត់បានបង្ហោះរូបស្ត្រីម្នាក់ឈ្មោះ ភាព តាមបណ្ដាញសង្គមហ្វេសប៊ុក (Facebook) ដោយអះអាងថា គឺជាជនជាតិវៀតណាម ដែលទៅចុះឈ្មោះបោះឆ្នោតនៅសង្កាត់នគរធំ ហើយត្រូវម្ចាស់រូបនោះដាក់ពាក្យប្ដឹងទៅតុលាការពីបទបរិហារកេរ្តិ៍មក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។