សាលាឧទ្ធរណ៍នៅព្រឹកថ្ងៃអង្គារទី១១ ខែកុម្ភៈ បើកសវនាការសំណុំរឿងសុំនៅក្រៅឃុំរបស់សកម្មជនសិទ្ធិមនុស្ស និងកម្មករចំនួន ២១នាក់ ដែលកំពុងជាប់ឃុំនៅពន្ធនាគារត្រពាំងផ្លុង។
សវនាការនៅថ្ងៃនេះធ្វើដោយបិទទ្វារ ដោយពុំមានវត្តមានរបស់ជនជាប់ឃុំទាំង ២១នាក់នោះឡើយគឺមានតែមេធាវីការពារជនជាប់ចោទដែលបានចូលរួមសវនាការ។
នៅក្រោយសវនាការចៅក្រមសាលាឧទ្ធរណ៍សម្រេចតម្កល់សេចក្ដីសម្រេចរបស់ចៅក្រមសាលាដំបូង គឺពុំអនុញ្ញាតអោយអ្នកទាំង ២១នាក់បាននៅក្រៅឃុំឡើយ។
ចៅក្រមសាលាឧទ្ធរណ៍ដឹកនាំដោយចៅក្រម ឃុន លាងម៉េង និងចៅក្រម សេង ស៊ីវត្ថា បានសំអាងហេតុផលសំខាន់៣ ក្នុងការសម្រេចមិនអោយសកម្មជនសិទ្ធិមនុស្ស និងកម្មករចំនួន ២១នាក់បាននៅក្រៅឃុំ។ ក្នុងនោះរួមមានការដោះលែងអោយនៅក្រៅឃុំ អាចនឹងធ្វើអោយប៉ះពាល់ដល់សន្តិសុខ សណ្ដាប់ធ្នាប់សង្គម ហើយសំណុំរឿងនេះកំពុងឋិតក្នុងការស៊ើបអង្កេត និងថា សំណើសុំនៅក្រៅឃុំដែលដាក់ដោយក្រុមគ្រួសារ និងមេធាវីការពារ គឺពុំមានហេតុផលគ្រប់គ្រាន់ដែលអាចអោយចៅក្រមពិចារណាបាន។
ការសម្រេចនេះត្រូវប្រកាសនៅក្នុងបន្ទប់សវនាការដែលបិទទ្វារ គឺធ្វើឡើងចំពោះមុខមេធាវីការពារចំនួន ១០នាក់ ដោយអវត្តមានជនជាប់ចោទចំនួន ២១នាក់។
មេធាវីការពារមកពីមជ្ឈមណ្ឌលសិទ្ធិមនុស្សកម្ពុជា លោក សំ សុខគង់ មានប្រសាសន៍នៅខាងមុខបន្ទប់សវនាការថា ចៅក្រមពុំបានបង្ហាញហេតុផលគ្រប់គ្រាន់ក្នុងការសម្រេច អោយកូនក្ដីរបស់លោក និងអ្នកដទៃទៀតបន្តនៅក្នុងឃុំ៖ «ពួកខ្ញុំទាំងអស់គ្នានឹងមានបំណងប្ដឹងទៅតុលាការកំពូលចំពោះសេចក្ដីសម្រេចនេះ ព្រោះពុំទាន់មានលក្ខណៈត្រឹមត្រូវនៅឡើយ»។
សំណុំរឿងសកម្មជនសិទ្ធិមនុស្ស និងកម្មករទាំង ២៣នាក់ត្រូវបែកចែកជា ៣ដាច់ដោយឡែកពីគ្នា។ សំណុំរឿងនៃអ្នកដែលត្រូវចាប់ខ្លួនចំនួន ១០នាក់នៅរោងចក្រយ៉ាកជីន (Yak Jin) កាលពីថ្ងៃទី២ ខែមករា រួមទាំងលោក វន់ ពៅ លោក ថេង សាវឿន និងលោក ចាន់ ពុទ្ធិស័ក្ត។ សំណុំរឿងមួយទៀតមានជនជាប់ចោទ ៣នាក់ ដែលត្រូវចាប់ខ្លួនកាលពីរំលងអធ្រាត្រឈានចូលថ្ងៃទី៣ មករា ក្នុងចំណោមនោះមាន ២នាក់ត្រូវចៅក្រមសាលាដំបូងសម្រេចដោះលែងអោយនៅក្រៅឃុំ កាលពីថ្ងៃទី៧ កុម្ភៈ និងសំណុំរឿងដែលមានជនជាប់ចោទចំនួន ១០នាក់ ដែលត្រូវចាប់ខ្លួនកាល ពីថ្ងៃទី៣ មករា។ អ្នកទាំង ២៣នាក់នេះត្រូវការពារដោយមេធាវីរបស់អង្គការមិនមែនរដ្ឋាភិបាលចំនួន ១០នាក់។ ចំណែកក្រុមប្រឹក្សាជំនុំជម្រះត្រូវបែងចែកជា ២ក្រុម។
ភ្លាមៗក្រោយសេចក្ដីសម្រេចភរិយា លោក វន់ ពៅ និងកូនប្រុស ២នាក់ បានស្រែកទ្រហោយំ ដោយយល់ថា ការសម្រេចនេះអយុត្តិធម៌ ម្យ៉ាងព្រួយបារម្ភពីសុខភាពរបស់លោកនៅក្នុងពន្ធនាគារ នៅពេលសុខភាពទ្រុឌទ្រោម ស្របគ្នានឹងតវ៉ាដោយបង្អត់អាហារ៖ «វាអយុត្តិធម៌ខ្លាំងណាស់។ ប៉ាខ្ញុំជាមនុស្សស្រឡាញ់ជាតិ ជាមនុស្សស្នេហាជាតិ ប៉ាខ្ញុំអត់មានកំហុសអីទេ ដោះលែងប៉ាខ្ញុំទៅ។ មិនសមនឹងមិនដោះលែងគាត់អោយនៅក្រៅឃុំទេ ព្រោះដោយសារតែគាត់កំពុងតែឈឺចុកចាប់មែនទែន ហើយស្ថានភាពរបស់គាត់ពីមួយថ្ងៃទៅមួយថ្ងៃ គឺគាត់មានសភាពធ្ងន់ធ្ងរមែនទែន។ នៅពេលតុលាការមិនអោយគាត់នៅក្រៅឃុំមានន័យថា រដ្ឋាភិបាលយង់ឃ្នងមែនទែន ដែលធ្វើបាបពលរដ្ឋខ្លួនឯងនេះ»។
ការសម្រេចរបស់ចៅក្រមសាលាឧទ្ធរណ៍ពុំបានការសាទរពីអ្នកឃ្លាំមើលការរំលោភសិទ្ធិមនុស្សនៃអង្គការមិនមែនរដ្ឋាភិបាលឡើយ។
ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍លោក មឿន តុលា មានប្រសាសន៍ថា លោកមើលឃើញថា អ្នកទាំង ២១នាក់នោះ ជាពិសេសគឺអ្នកទាំង ១០នាក់ដែលត្រូវចាប់ខ្លួននៅក្បែររោងចក្រ យ៉ាក ជីន គ្មានកំហុសឡើយ៖ «ពួកគាត់ប៉ុន្មាននាក់ហ្នឹងមិនមែនជាអ្នកដែលបង្កហិង្សា យើងឃើញសមត្ថកិច្ចទេ ដែលប្រើកាំភ្លើងបាញ់ទៅលើពួកគាត់ដែលប្រើដំបងវាយអ៊ីចឹង។ បើទោះជាដោះលែងអ្នកទាំង ២១នាក់ហ្នឹងយើងមើលអត់ឃើញថាវាប៉ះពាល់ដល់សុវត្ថិភាពសាធារណៈអីទេ»។
ចំណែកអ្នកគ្រប់គ្រងផ្នែកបច្ចេកទេសស៊ើបអង្កេតនៃអង្គការលីកាដូ លោក អំ សំអាត បានអោយដឹងដែរថា សវនាការនៅពេលនេះបានរំលោភលើសិទ្ធិរបស់ជនជាប់ចោទដែលត្រូវមកវែកញែកស្រាយបំភ្លឺហេតុការណ៍ដែលនាំអោយពួកគេត្រូវចាប់ខ្លួន៖ «សវនាការនៅក្រៅឃុំ វត្តមានរបស់ជនជាប់ចោទជាការសំខាន់។ កាលណាយើងមិនបានបញ្ជូនមកក្នុងសវនាការ វាធ្វើអោយខ្វះចន្លោះ ហើយនឹងបាត់ភាពយុត្តិធម៌សម្រាប់ជនជាប់ចោទ»។
វិទ្យុអាស៊ីសេរីពុំអាចសុំការពន្យល់ពីចៅក្រមសាលាឧទ្ធរណ៍នៅពីបញ្ហានេះបានទេ នៅរសៀលថ្ងៃទី១១ កុម្ភៈ។
ប្រធានពន្ធនាគារត្រពាំងផ្លុង លោក គា សុវណ្ណា មានប្រសាសន៍តាមទូរស័ព្ទថា លោកពុំបានទទួលលិខិតបង្គាប់អោយនាំអ្នកទាំង ២១នាក់នោះមកសវនាការឡើយ ម្យ៉ាងពន្ធនាគារខ្វះខាតមធ្យោបាយដឹកជញ្ជូន៖ «លិខិតបង្គាប់នឹងក៏អត់ឃើញ ហើយវាអត់ឡានផង ព្រោះដល់ទៅ ២០នាក់។ ឡានខ្ញុំចាស់ផង មានតែមួយ មានអីបញ្ជូន។ នៅដឹកកម្លាំងដឹកអីទៀតមានអីបញ្ជូនទៅ»។
ជនជាប់ចោទចំនួន ២១នាក់ក្នុងចំណោម ២៣នាក់ដែលត្រូវចាប់ឃុំខ្លួនក្នុងពេលអាជ្ញាធរបង្ក្រាបបាតុកម្មកម្មករដែលទាមទារដំឡើងប្រាក់ខែអោយបាន ១៦០ដុល្លារ នៅពេលនេះ កំពុងប្ដូរវេនគ្នាតវ៉ាដោយបង្អត់អាហារខ្លួនឯងក្នុងពន្ធនាគារ។ ប្រធានពន្ធនាគារត្រពាំងផ្លុងបញ្ជាក់ថា អ្នកដែលចាប់ផ្ដើមអត់អាហារតាំងពីថ្ងៃអាទិត្យ ចុងសប្ដាហ៍កន្លងទៅ ដោយរួមទាំងលោក វន់ ពៅ ផង បានទទួលទានអាហារឡើងវិញហើយ ប៉ុន្តែក៏នៅមានអ្នកបន្តអត់អាហារមួយចំនួនទៀតដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។