នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង ចូលឆ្លើយបំភ្លឺក្នុងនាមជាសាក្សីនៅថ្ងៃទី១៨ ខែសីហា តាមការកោះហៅរបស់សាលាដំបូងរាជធានីភ្នំពេញ ក្នុងសំណុំរឿងអាស្រូវស្នេហាដែលត្រូវបានគេចោទរវាងអនុប្រធានគណបក្សសង្គ្រោះជាតិ លោក កឹម សុខា និងអ្នកនាង ខុម ចាន់តារាទី ហៅស្រីមុំ។
ចៅក្រមស៊ើបសួរលោក ធាម ចន្ទពិសិដ្ឋ បានសាកសួរលោក ប៉ា ងួនទៀង ប្រហែលកន្លះម៉ោង។ ចៅក្រមសួរថា តើលោក ប៉ា ងួនទៀង មានបានរៀបចំឲ្យលោក នី ចរិយា ជួបជាមួយលោក កឹម សុខា ឬទេ? ហើយមានបានទូរស័ព្ទទាក់ទងជាមួយអ្នកស្រី ទ្រី ឈូន មេធាវីរបស់អ្នកនាងស្រីមុំដែរ ឬទេ?
លោក ប៉ា ងួនទៀង ក៏ជាថ្នាក់ដឹកនាំគ្រប់គ្រងស្ថាប័នព័ត៌មាន វី.អូ.ឌី (VOD)។ ចៅក្រមបានសួរលោកថា តើ វី.អូ.ឌី មានបំណងហៅអ្នកនាង ស្រីមុំ មកធ្វើជាវាគ្មិនឬទេ?
ទោះបីជាយ៉ាងណាលោក ប៉ា ងួនទៀង ឆ្លើយតបថា លោកចាំមិនច្បាស់ទេថា លោកមានទំនាក់ទំនងជាមួយអ្នកណាខ្លះ ជជែករឿងអ្វីខ្លះ ពីព្រោះពេលវេលាកន្លងផុតទៅយូរ ហើយលោកមានការងារច្រើនត្រូវធ្វើ៖ «ខ្ញុំមិនច្បាស់ដែរ ថាខ្ញុំមានទំនាក់ទំនងជាមួយអ្នកណាខ្លះ រឿងអីខ្លះ និយាយម៉េចខ្លះ ខ្ញុំមិនដឹង។ ខ្ញុំចាំថា ខ្ញុំមិនដែលជជែករឿងអីទេ»។
នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យរូបនេះបញ្ជាក់ថា តុលាការកោះហៅរូបលោកធ្វើជាសាក្សី ដោយសារមានចម្លើយរបស់អ្នកពាក់ព័ន្ធមុន ដែលបានឆ្លើយពាក់ព័ន្ធនឹងរូបលោក ក៏ប៉ុន្តែលោក ប៉ា ងួនទៀង មិនបានបញ្ជាក់ពីអត្តសញ្ញាណអ្នកដែលឆ្លើយពាក់ព័ន្ធនឹងរូបលោកនោះទេ៖ «បើតុលាការមានភស្តុតាងត្រឹមត្រូវច្បាស់លាស់ ហ្នឹងខ្ញុំទទួល»។
តុលាការកោះហៅលោក ប៉ា ងួនទៀង គឺដើម្បីទទួលបានព័ត៌មានបន្ថែម មិនទាន់ដល់ដំណាក់កាលស៊ើបអង្កេតនៅឡើយ។ លោក ប៉ា ងួនទៀង បានចេញពីតុលាការនៅពេលថ្ងៃត្រង់។
នៅខាងក្រៅសវនាការ បុគ្គលិករបស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ មន្ត្រីអង្គការសង្គមស៊ីវិល អ្នកសារព័ត៌មានជាច្រើននាក់ បានឃ្លាំមើលដំណើរការសាកសួររបស់តុលាការករណីលោក ប៉ា ងួនទៀន។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា ថ្លែងតាមបណ្ដាញទំនាក់ទំនងតេឡេក្រាម (telegram) ឲ្យដឹងថា ការសាកសួរលោក ប៉ា ងួនទៀង ក្នុងនាមជាសាក្សី ផ្ដល់ប្រយោជន៍ជាច្រើនដល់ការស៊ើបសួរ ហើយចៅក្រមស៊ើបសួរសម្រេចស៊ើបសួរបន្ត។
ប្រធានផ្នែកឃ្លាំមើលនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍នៅមុខតុលាការថា បើតាមនីតិវិធី ការសាកសួររបស់តុលាការជាការត្រឹមត្រូវ ក៏ប៉ុន្តែបើមើលរូបភាពពីមួយជ្រុងទៀត វាជាការគំរាមកំហែង និងបំភិតបំភ័យដល់លោក ប៉ា ងួនទៀង និងអ្នកដទៃទៀតដែរ៖ «លោក ប៉ា ងួនទៀង សកម្មក្នុងយុទ្ធនាការថ្ងៃចន្ទពណ៌ខ្មៅ ហើយក៏សកម្មក្នុងការរៀបចំពិធីបុណ្យសពបណ្ឌិត កែម ឡី ដែលត្រូវបានគេបាញ់សម្លាប់»។
ក្នុងសំណុំរឿងស្នេហារវាងលោក កឹម សុខា និងអ្នកនាង ខុម ចាន់តារាទី អ្នកពាក់ព័ន្ធក្នុងប្រព័ន្ធតុលាការមាន ១៦នាក់ រាប់បញ្ចូលទាំងលោក ប៉ា ងួនទៀង ដោយមានអ្នកត្រូវគេឃុំខ្លួន ៦នាក់ អ្នកត្រូវគេចោទប្រកាន់ ៣នាក់ អ្នកគេហៅធ្វើជាសាក្សី ៤នាក់ និងអ្នកធ្វើជាដើមបណ្ដឹង ៣នាក់។
លោក ប៉ា ងួនទៀង មានប្រសាសន៍ថា គេគួរព្យាយាមរកដំណោះស្រាយបញ្ចប់សំណុំរឿង មិនមែនពង្រីករឿងនោះទេ ដើម្បីធានាដល់សេចក្ដីសុខរបស់សង្គម៖ «ចំពោះខ្ញុំ អ្នកដឹកនាំល្អ គេព្យាយាមរកដំណោះស្រាយបញ្ចប់រឿងជាជាងពង្រីករឿង ព្រោះយើងជាអ្នកដឹកនាំ ត្រូវទទួលខុសត្រូវពីភាពស្ងប់ស្ងាត់ក្នុងសង្គម អំពីសេចក្ដីរបស់ប្រជារាស្ត្រ ពីភាពសុខសាន្តផ្នែករាងកាយ ផ្នែកអារម្មណ៍របស់ប្រជារាស្ត្រ។ កាលណាយើងពង្រីករឿង ធ្វើឲ្យប្រជារាស្ត្រភ័យខ្លាច។ នេះមិនមែនជាជម្រើសល្អទេ»។
ចៅក្រមស៊ើបសួរនៃសាលាដំបូងរាជធានីភ្នំពេញ លោក ធាម ច័ន្ធពិសិដ្ឋ បានចេញដីកាកោះហៅលោក ប៉ា ងួនទៀង កាលពីថ្ងៃទី៣ ខែសីហា ឲ្យចូលធ្វើជាសាក្សីជុំវិញដំណើររឿងសូកប៉ាន់សាក្សីតាមមាត្រា៥៤៨ នៃក្រមព្រហ្មទណ្ឌ។
លោក ប៉ា ងួនទៀង ត្រូវនគរបាលតុលាការច្រានចេញពេលផ្ដល់បទសម្ភាសន៍
លោក ប៉ា ងួនទៀង បានផ្ដល់បទសម្ភាសន៍ដល់អ្នកសារព័ត៌មាននៅខាងមុខរោងយាមសន្តិសុខខាងតុលាការ មុនពេលលោកផ្ដល់សក្ខីកម្ម តែត្រូវបានមន្ត្រីនគរបាលប្រចាំសាលាដំបូងរាជធានីភ្នំពេញម្នាក់ ចាប់ទាញ និងរុញច្រានចេញឲ្យប្ដូរទីតាំងផ្ដល់សម្ភាសន៍។ លោក ប៉ា ងួនទៀង ហៅទង្វើនេះថា ជាការមិនអនុវត្តតាមវិជ្ជាជីវៈ និងគ្មានសីលធម៌៖ «ខ្ញុំថាអត់សីលធម៌។ យើងខ្មែរដូចគ្នា យើងនិយាយគ្នាបាន មិនដល់ថ្នាក់ច្រាន។ នីតិវិធីនៃការដោះស្រាយ មិនមែនទាល់តែហិង្សាបានយើងដោះស្រាយចេញទេ»។
យ៉ាងនេះក្តី លោក លី សុផាណា បដិសេធចំពោះការចោទប្រកាន់របស់លោក ប៉ាង ងួនទៀង ដោយអះអាងថា វាមិនមែនជាការពិត។ លោកថា មន្ត្រីរបស់តុលាការបានជួយសម្របសម្រួល និងរៀបចំសណ្ដាប់ធ្នាប់នៅបរិវេណតុលាការសម្រាប់ការផ្ដល់បទសម្ភាសន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។