ស្ត្រីឈ្មោះ សំ ផល្លា ជាម្ដាយរបស់ស្ត្រីម្នាក់ទៀត ឈ្មោះ កែវ សុផាណារី ដែលត្រូវបានគេអះអាងថា ជាអតីតស្រីកំណាន់របស់ប្រធានស្ដីទីគណបក្សសង្គ្រោះជាតិ លោក កឹម សុខា។
មន្ត្រីដែលបម្រើការងារនៅសាលាដំបូងខេត្តព្រៃវែង ដែលសុំមិនបញ្ចេញឈ្មោះបញ្ជាក់ប្រាប់វិទ្យុអាស៊ីសេរី នៅថ្ងៃទី១៧ ខែមិថុនា នេះថា សំណុំរឿងប្រើប្រាស់ហិង្សាទៅលើស្ត្រីម្នាក់ឈ្មោះ សំ ផល្លា កំពុងស្ថិតនៅក្នុងកណ្ដាប់ដៃតុលាការខេត្តព្រៃវែងហើយ។ សំណុំរឿងនោះត្រូវដើមបណ្ដឹងប្ដឹងថា អង្គរក្សលោក កឹម សុខា បង្កហិង្សាទៅលើខ្លួនក្នុងពិធីជួបជុំមួយរបស់គណបក្សសង្គ្រោះជាតិ នៅថ្ងៃទី១៣ ខែមិថុនា ក្នុងខេត្តព្រៃវែង។ ប៉ុន្តែតុលាការមិនទាន់សម្រេចថា នឹងកោះហៅដើមចោទ និងចុងចម្លើយដើម្បីសួរនាំនៅពេលណានោះទេ។
ចំពោះហេតុការណ៍នោះ កើតឡើងបន្ទាប់ពីស្ត្រីម្នាក់ឈ្មោះ កែវ សុផាណារី អះអាងថា ធ្លាប់ទាក់ទងស្នេហាជាមួយលោក កឹម សុខា ហើយស្ត្រីរូបនោះនិងម្ដាយឈ្មោះ សំ ផល្លា បានព្យាយាមទៅឆាឆៅវេទិកាជួបជុំរបស់លោក កឹម សុខា ម្ដងជាពីរដង ដោយប្រាប់ថា មានបំណងទារប្រាក់ខ្លះយកផ្គត់ផ្គង់ជីវភាព។ លុះដល់ថ្ងៃទី១៣ ខែមិថុនា ស្ត្រីម្ដាយនិងកូននោះ ក៏ទៅអុកឡុកវេទិកាសាធារណៈរបស់គណបក្សសង្គ្រោះជាតិនៅក្រុងព្រៃវែង ខេត្តព្រៃវែង ទៀត។ បន្ទាប់មកក៏កើតរឿងថា អ្នកស្រី សំ ផល្លា រងរបួសនិងត្រូវចូលដេកក្នុងមន្ទីរពេទ្យកាល់ម៉ែតដែលមានការយកចិត្តទុកដាក់យ៉ាងខ្លាំងពីសំណាក់គ្រូពេទ្យ និងក្រុមសកម្មជនរបស់គណបក្សប្រជាជនកម្ពុជា។
ទាក់ទិននឹងបញ្ហានេះ ប្រធានសាលាដំបូងខេត្តព្រៃវែង លោក សុខ កល្យាណ ត្រូវបានកាសែតក្នុងស្រុកស្រង់សម្ដីថា ករណីប្រើប្រាស់ហិង្សាលើស្ត្រី សំ ផល្លា ជាករណីព្រហ្មទណ្ឌ។ លោកបន្តថា ប្រសិនបើតុលាការរកឃើញថា លោក កឹម សុខា បានប្រើអង្គរក្សវាយលើស្ត្រីនោះមែន លោក កឹម សុខា អាចជាប់ពន្ធនាគាររយៈពេលពីមួយឆ្នាំទៅ ៣ឆ្នាំ។ លោកបន្ថែមថា តុលាការនឹងសម្រេចចាត់ការរឿងនេះ ឬអត់នៅចុងសប្ដាហ៍នេះ។
ទោះយ៉ាងណាក៏ដោយ មន្ត្រីអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ មានប្រសាសន៍ថា លោកស្ថិតនៅវេទិកាដែលស្ត្រីពីរនាក់នោះចុះទៅឆាឆៅ ហើយមិនមានកើតរឿងប្រតាយប្រតប់ណាមួយដែលអាចធ្វើឲ្យអ្នកស្រី សំ ផល្លា រងរបួសទេ។
លោកបន្តថា ប្រជាពលរដ្ឋរាប់ពាន់នាក់អាចធ្វើជាសាក្សីបាន បើសិនណាជាតុលាការកោះហៅឲ្យលោក កឹម សុខា ចូលបំភ្លឺមែននោះ៖ «យើងបានដឹងបានឮរឿងកើតយ៉ាងម៉េចខ្លះ យើងបានដឹងឮដោយផ្ទាល់តែម្ដង។ ប៉ូលិសនគរបាលបានមកនាំគាត់ទៅខាង ហើយនាំទៅប៉ុស្តិ៍ ប៉ុន្មានម៉ោងក្រោយមកស្រាប់តែឃើញលេចមុខនៅកាល់ម៉ែតតែម្ដង។ យើងមានទាំងវីដេអូ ទាំងពលរដ្ឋរាប់ពាន់ ជិតមួយម៉ឺននាក់ធ្វើសាក្សីបាន។ ចេញពីបាតុកម្ម ចូលដល់បណ្ដឹង វាគួរឲ្យចម្លែកដែរបាទ!»។
លោក យ៉ែម បុញ្ញឫទ្ធិ បញ្ជាក់ថា គណបក្សសង្គ្រោះជាតិ មានបំណងចង់ឲ្យមានកិច្ចពិភាក្សាតស៊ូមតិដាក់តាមប្រព័ន្ធផ្សព្វផ្សាយ ដើម្បីឲ្យពលរដ្ឋបានជ្រាបពីគោលនយោបាយគណបក្សនីមួយៗ ប៉ុន្តែគណបក្សប្រជាជនកម្ពុជា ព្យាយាមបង្វែរសាច់រឿងទៅជាការវាយប្រហារសំដៅមេដឹកនាំគណបក្សសង្គ្រោះជាតិទៅវិញ។
ក្រៅពីបណ្ដឹងរបស់ស្ត្រី ឈ្មោះ សំ ផល្លា លោក កឹម សុខា ក៏ត្រូវអតីតអ្នកទោសគុកទួលស្លែង លោក ជុំ ម៉ី ប្តឹងទៅតុលាការរាជធានីភ្នំពេញ ពីបទបរិហារកេរ្តិ៍ចំពោះខ្សែអាត់សំឡេងដែលគណបក្សកាន់អំណាចយកមកផ្សព្វផ្សាយ ដោយលោក កឹម សុខា ទំនងជានិយាយថា គុកទួលស្លែងជាឆាកដែលវៀតណាម ជាអ្នកបង្កើត។ បើទោះជាលោក កឹម សុខា បដិសេធថា ខ្សែអាត់នោះត្រូវបានរៀបចំឡើងដោយគណបក្សប្រជាជនកម្ពុជា ក៏ដោយ។ បន្ថែមពីនេះ លោក ហ៊ុន សែន កាលពីថ្ងៃទី១៣ ខែឧសភា ក៏បានថ្លែងសំដៅទៅមេបក្សប្រឆាំងដែលមិនបញ្ចេញឈ្មោះថា បានចាយប្រាក់ដើម្បីរួមភេទជាមួយកុមារអាយុ ១៥ឆ្នាំ កាលពីឆ្នាំ២០១១ និងបានរំលឹកបើកកកាយថា មានមន្ត្រីបក្សប្រឆាំងមួយចំនួនមានសហាយស្មន់ថែមទៀត។
ទោះយ៉ាងណាក្តី អ្នកវិភាគបញ្ហានយោបាយមួយចំនួនលើកឡើងថា នៅមុនការបោះឆ្នោតនេះ ប្រជាជនកម្ពុជា ហាក់ដូចជាបារម្ភថា ប្រជាប្រិយភាពរបស់ខ្លួនអាចធ្លាក់ចុះដោយសារចំណុចអសកម្មមួយចំនួន ដូចជាបញ្ហាដីធ្លី អំពើពុករលួយ និងបញ្ហាជនអន្តោប្រវេសន៍ខុសច្បាប់ ទើបគណបក្សកាន់អំណាចជិត ៤អាណត្តិនេះ ប្រើប្រាស់មធ្យោបាយជាច្រើនដើម្បីបំបាក់កម្លាំងគាំទ្ររបស់គណបក្សសង្គ្រោះជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។