រដ្ឋសភាកម្ពុជា នៅថ្ងៃទី២២ ខែឧសភា បន្តអនុម័តសេចក្ដីព្រាងច្បាប់ពាក់ព័ន្ធប្រព័ន្ធតុលាការចំនួន ៣ គឺច្បាប់ស្ដីពីការរៀបចំអង្គការតុលាការ ច្បាប់ស្ដីពីលក្ខន្តិកៈ នៃចៅក្រម និងព្រះរាជអាជ្ញា និងច្បាប់ស្ដីពីការរៀបចំនិងការប្រព្រឹត្តទៅនៃឧត្ដមក្រុមប្រឹក្សានៃអង្គចៅក្រម។
ក្នុងចំណោមសេចក្ដីព្រាងច្បាប់ទាំង៣នេះ សេចក្ដីព្រាងច្បាប់ស្ដីពីការរៀបចំអង្គការតុលាការត្រូវបានសភាអនុម័តរួចរាល់ហើយ ចំណែកសេចក្ដីព្រាងច្បាប់ស្ដីពីលក្ខន្តិកៈនៃចៅក្រម និងព្រះរាជអាជ្ញា ត្រូវអង្គសភាអនុម័តបានមួយជំពូកហើយ ហើយរដ្ឋសភានឹងបន្តការងាររបស់ខ្លួននៅព្រឹកថ្ងៃទី២៣ ខែឧសភា ទៀត។
សមាជិករដ្ឋសភាដែលមានតែតំណាងរាស្ត្រមកពីគណបក្សប្រជាជនកម្ពុជា ចំណាយពេលប្រហែល ២ម៉ោង ដើម្បីបន្តការពិភាក្សានិងអនុម័តទៅលើជំពូកចំនួន ៦បន្ថែមទៀត នៃសេចក្ដីព្រាងច្បាប់ស្ដីពីការរៀបចំអង្គការតុលាការដែលសភាមិនទាន់បានអនុម័តរួចរាល់ កាលពីថ្ងៃទី២១ ខែឧសភា។
សេចក្ដីព្រាងច្បាប់ស្ដីពីការរៀបចំអង្គការតុលាការនេះ មានទាំងអស់ ៨ជំពូក និងចែកចេញជា ៩១មាត្រា ត្រូវបានសភាអនុម័តដោយរលូន ដោយសំឡេង ៦៤ លើ ៦៤ នៃចំនួនសមាជិកសភាចូលរួម។
សេចក្ដីព្រាងច្បាប់ដែលត្រូវបានសភាអនុម័តមួយជំពូកម្តងៗ បន្ទាប់ពីប្រធានគណៈកម្មការនីតិកម្មនិងយុត្តិធម៌នៃរដ្ឋសភា លោក ប៉ែន បញ្ញា អាចចប់នោះ មិនត្រូវបានសមាជិកសភាពិភាក្សាលំអិតឲ្យបានគ្រប់ចំណុច ឬសួរដេញដោលឲ្យផុសផុលលើខ្លឹមសារច្បាប់នោះឡើយ។ ផ្ទុយទៅវិញ សមាជិកសភាដែលឡើងសម្ដែងមតិ ភាគច្រើនប្រកាសការគាំទ្ររបស់ខ្លួនចំពោះសេចក្ដីព្រាងច្បាប់ទាំងនេះ ហើយបែរជាយកវេទិកាសភានេះ វាយប្រហារទៅលើអង្គការសង្គមស៊ីវិល និងបក្សប្រឆាំង ដែលចេះតែរិះគន់មិនឈប់ឈរទៅលើសេចក្ដីព្រាងច្បាប់ទាំងអស់នេះ។ មានតំណាងរាស្ត្រខ្លះ ថែមទាំងស្នើឲ្យសង្គម ស៊ីវិល ឈប់បន្តនិយាយឲ្យសភា ផ្អាកការអនុម័តច្បាប់ទាំងនេះទៀតទៅ ហើយបានពោលរបៀបចំអកទៅវិញថា គេមិនអាចចាប់ផែនដីដែលកំពុងតែវិលឲ្យឈប់វិលបាននោះឡើយ រីឯតំណាងរាស្ត្រខ្លះទៀតពោលថា មិនខ្វល់ថា សង្គមស៊ីវិលលើកឡើងយ៉ាងម៉េចនោះទេ សំខាន់ឲ្យតែមានច្បាប់ វាប្រសើរជាងអត់ច្បាប់ជាដើម។
សេចក្ដីព្រាងច្បាប់ដ៏ចម្រូងចម្រាសទាំងនេះ ត្រូវបានសង្គមស៊ីវិលរិះគន់យ៉ាងខ្លាំងទៅលើខ្លឹមសារមួយចំនួន ដោយលើកឡើងថា ច្បាប់ទាំងនេះនឹងធ្វើឲ្យប្រព័ន្ធតុលាការដែលជាស្ថាប័នឯករាជ្យដាច់ដោយឡែកមួយ នឹងបន្តស្ថិតនៅក្រោមអំណាចរបស់ក្រសួងយុត្តិធម៌ ដែលជាសេនាធិការរបស់រដ្ឋាភិបាល។ ពួកគេក៏បានរិះគន់ចំពោះរបៀបតាក់តែងសេចក្ដីព្រាងច្បាប់ទាំងនេះផងដែរ។ ចំណែកគណបក្សប្រឆាំងវិញ បានលើកឡើងម្ដងហើយម្ដងទៀតថា ច្បាប់ដែលរដ្ឋសភាដែលមានតែតំណាងរាស្ត្រគណបក្សប្រជាជនកម្ពុជា កំពុងអនុម័តនេះ នឹងគ្មានតម្លៃនោះទេ ហើយថា ពួកគេនឹងធ្វើការសើរើឡើងវិញ។
ពាក់ព័ន្ធនឹងការលើកឡើងរបស់បក្សប្រឆាំងនេះ រដ្ឋមន្ត្រីក្រសួងមហាផ្ទៃ លោក ស ខេង បានថ្លែងបន្ទាប់ពីកិច្ចប្រជុំសភាថា ការដែលចង់សើរើ ឬមិនសើរើ វាជាសិទ្ធិរបស់បក្សប្រឆាំង ប៉ុន្តែលោកថា វាក៏អាស្រ័យលើសំឡេងភាគច្រើន និងភាគតិចនៅក្នុងរដ្ឋសភាដែរ៖ «ប្រហែលជាគាត់មិនមានសំឡេងគ្រប់គ្រាន់ដើម្បីសើរើទេមិនដឹង គាត់លើកឡើង លើកបាន ប៉ុន្តែគ្រាន់ថា ឲ្យឈានទៅដល់អនុម័តដើម្បីសើរើច្បាប់នេះ ច្បាប់នោះ ប្រហែល ជាមិនមានឱកាសទេ។ ប៉ុន្តែបើពេលហ្នឹង អាពេលកំពុងជជែកពិភាក្សាហ្នឹងណា គាត់ចូលមកពិភាក្សាប្រហែលជាគាត់អាចបញ្ចូលគំនិតរបស់គាត់ តែគាត់បោះបង់ចោលឱកាសហ្នឹង ហើយគាត់ចោទថា សភាមិនគ្រប់ទឹក ការពិតគាត់ទេដែលមិនគ្រប់ទឹក»។
ប៉ុន្តែមន្ត្រីជាន់ខ្ពស់គណបក្សសង្គ្រោះជាតិ លោក យឹម សុវណ្ណ អះអាងថា បក្សប្រឆាំងមិនមែនកំពុងបោះបង់ឱកាសឡើយ តែតាមពិតគណបក្សមួយនេះ កំពុងតែរកឱកាសដើម្បីជួយប្រជាពលរដ្ឋទៅវិញទេ។ លោកថា គណបក្សប្រឆាំងសុខចិត្តលំបាកនៅពេលនេះ តែមិនអាចបោះបង់ឱកាសដែលប្រជាពលរដ្ឋចង់បាននោះទេ។
លោក យឹម សុវណ្ណ៖ «គ្មានអ្វីដែលហួសពេលនោះទេ ឲ្យតែប្រជាពលរដ្ឋមានឆន្ទៈផុសផុលគាំទ្រអ្នកតំណាងរាស្ត្រនៃគណបក្សសង្គ្រោះជាតិ នៅក្នុងពេលឆាប់ៗដ៏ខ្លីខាងមុខនេះ យើងមានអំណាចនៅក្នុងរដ្ឋសភា និងនៅក្នុងរដ្ឋាភិបាលគ្រប់គ្រាន់ គឺយើងនឹងធ្វើវិសោធនកម្មច្បាប់មួយចំនួនដែលមិនបានបម្រើឲ្យផលប្រយោជន៍ជាតិ ផលប្រយោជន៍ប្រជាពលរដ្ឋ គឺថា យើងធ្វើវិសោធនកម្ម ហើយយើងធ្វើយ៉ាងម៉េចដើម្បីឲ្យទាំងខ្លឹមសារ ទាំងការអនុវត្ត គឺស្របតាមឆន្ទៈរបស់ប្រជាពលរដ្ឋ»។
បន្ទាប់ពីសេចក្ដីព្រាងច្បាប់ស្ដីពីការរៀបចំអង្គការតុលាការ ត្រូវបានអនុម័តរួចរាល់ហើយ សភាក៏បន្តពិភាក្សាអំពីសេចក្ដីព្រាងច្បាប់ស្ដីពីលក្ខន្តិកៈនៃចៅក្រម និងព្រះរាជអាជ្ញាបន្តទៀត ហើយបានអនុម័តជំពូកទី១ នៃសេចក្ដីព្រាងច្បាប់នេះរួចហើយ។ រដ្ឋសភាបានបិទបញ្ចប់កិច្ចប្រជុំរបស់ខ្លួននៅម៉ោងប្រមាណជាង ១២ថ្ងៃត្រង់ ហើយនឹងបន្តការជជែកអំពីជំពូកផ្សេងទៀតនៅព្រឹកថ្ងៃទី២៣ ឧសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។