ប្រជាសហគមន៍ជនជាតិដើមភាគតិចកួយ ជិត ៤០០គ្រួសារ (៣៦៧គ្រួសារ) រស់នៅក្នុងឃុំប្រមេរ ស្រុកត្បែងមានជ័យ ខេត្តព្រះវិហារ បានដាក់ពាក្យបណ្ដឹងទៅតុលាការខេត្ត ប្ដឹងក្រុមហ៊ុន ឡាន ហ្វេង និងក្រុមហ៊ុន រ៉ូយ ហ្វេង។ ព្រះរាជអាជ្ញាតុលាការខេត្តព្រះវិហារ ប្រាប់ថា ករណីបណ្ដឹងនេះលោកនឹងចាត់ចែងបើកការស៊ើបអង្កេតបឋម។
តុលាការខេត្តព្រះវិហារ យល់ព្រមទទួលលិខិតបណ្ដឹងរបស់ជនជាតិដើមភាគតិចកួយ ដែលប្ដឹងក្រុមហ៊ុនចិន ចំនួន២ ថាបានឈូសឆាយដីព្រៃសហគមន៍ ៣ភូមិ ស្ថិតក្នុងឃុំប្រមេរ ស្រុកត្បែងមានជ័យ ខេត្តព្រះវិហារ។
មន្ត្រីសម្របសម្រួលអង្គការសិទ្ធិមនុស្សអាដហុក (adhoc) លោក ឡោ ចាន់ ឲ្យដឹងថា ជនជាតិដើមភាគតិចជិត ៤០០គ្រួសារ រស់នៅក្នុងភូមិប្រមេរ ភូមិស្រែព្រាង និងភូមិបោះធំ ក្នុងឃុំប្រមេរ ដាក់ពាក្យបណ្ដឹងទៅតុលាការខេត្តព្រះវិហារ កាលពីថ្ងៃរសៀលថ្ងៃទី៧ ឧសភា។ លោកបន្តថា ក្នុងលិខិតបណ្ដឹងនោះ ជនជាតិដើមភាគតិចកួយ ប្ដឹងក្រុមហ៊ុន ឡាន ហ្វេង និងក្រុមហ៊ុន រ៉ូយ ហ្វេង ពីបទឧក្រិដ្ឋប្រឆាំងមនុស្សជាតិ តាមមាត្រ១៨៨ នៃក្រមព្រហ្មទណ្ឌ៖ «ដូចជា ការបណ្ដេញចេញ អត់ឲ្យពួកគាត់ធ្វើស្រែចម្ការ ការបង្ខិតបង្ខំអត់ឲ្យពួកគាត់បង្កបង្កើនផល គាត់ចាត់ទុកវាជាឧក្រិដ្ឋកម្មប្រឆាំងមនុស្សជាតិ»។
លោក ឡោ ចាន់ បញ្ជាក់ថា ក្រៅពីស្នើសុំឲ្យតុលាការចាត់ការស៊ើបអង្កេតទៅលើក្រុមហ៊ុនចិន ចំនួន២ ដែលបន្តឈូសឆាយដីព្រៃសហគមន៍ហើយនោះ ខាងជនជាតិភាគតិចកួយ ក៏ប្ដឹងទាមទារសំណងខូចខាត ការខាតបង់អនុផលព្រៃឈើរាប់ពាន់ហិកតារ ដែលក្រុមហ៊ុនបានឈូសឆាយអស់ចំនួនសរុប ២.៤០០លានរៀល។
សមាជិកសហគមន៍ជនជាតិភាគតិចកួយ លោក ស្វាយ ភឿន ឲ្យដឹងថា ពួកគាត់ចង់ឲ្យតុលាការស៊ើបអង្កេតពីរឿងឈូសឆាយព្រៃ និងរានយកដីរបស់ក្រុមហ៊ុនចិន ទាំង២នោះ។ លោកបន្តថា ខាងសហគមន៍ធ្លាប់ដាក់ពាក្យបណ្ដឹងច្រើនលើកច្រើនសា ទៅអាជ្ញាធរខេត្តព្រះវិហារ ប៉ុន្តែអាជ្ញាធរមិនមានដំណោះស្រាយដល់ពួកគាត់ ទើបលើកនេះខាងសហគមន៍បានរួមគ្នាដាក់ពាក្យបណ្ដឹងទៅតុលាការវិញម្តង ដោយសង្ឃឹមថា តុលាការនឹងចាត់វិធានការតាមច្បាប់៖ «ឲ្យតុលាការទៅពិភាក្សាជាមួយក្រុមហ៊ុនឡើងវិញ ដើម្បីដោះស្រាយពីបញ្ហាដីរបស់ពួកគាត់ដែលកំពុងរងគ្រោះនៃការឈូសឆាយ»។
ព្រះរាជអាជ្ញាតុលាការខេត្តព្រះវិហារ លោក លី លន់ ប្រាប់ថា លោកបានឃើញពាក្យបណ្ដឹងរបស់ពលរដ្ឋនៅឃុំប្រមេរ ហើយលោកកំពុងចាត់ចែងស៊ើបអង្កេតបឋមចំពោះករណីបណ្ដឹងនេះ៖ «ត្រូវការធ្វើការស៊ើបអង្កេតបឋមសិន វាមានបទល្មើសដែរ ឬក៏អត់យ៉ាងម៉េចដែរ បើសិនជាមានបទល្មើសមានភស្តុតាងដែលល្មមអាចធ្វើការចោទបាន ព្រះរាជអាជ្ញាគាត់ធ្វើការសន្និដ្ឋានទៅ ចៅក្រមស៊ើបសួរ»។
វិទ្យុអាស៊ីសេរី មិនអាចទាក់ទងតំណាងក្រុមហ៊ុនចិន ឡាន ហ្វេង និងក្រុមហ៊ុន រ៉ូយ ហ្វេង បំភ្លឺរឿងនេះបានទេ នៅថ្ងៃទី៨ ឧសភា។
ជនជាតិដើមភាគតិចកួយ ក្នុងឃុំប្រមេរ បានរិះគន់ចំពោះការផ្តល់ដីសម្បទានសេដ្ឋកិច្ចរបស់រដ្ឋាភិបាល ទៅឲ្យក្រុមហ៊ុនចិន វិនិយោគ ថាកំពុងធ្វើឲ្យជនជាតិដើមភាគតិចកួយ បាត់បង់វប្បធម៌ប្រពៃណីពីដូនតា។ ការចោទប្រកាន់នេះ កើតមានបន្ទាប់ពីរដ្ឋាភិបាលសម្រេចប្រគល់ដីព្រៃឲ្យក្រុមហ៊ុនចិន វិនិយោគដោយពុំបានពិភាក្សាជាមួយពលរដ្ឋម្ចាស់ស្រុកជាមុន។ ក្រុមហ៊ុន ឡាន ហ្វេង ឈូសឆាយដីព្រៃវាលរបស់សហគមន៍ជនជាតិភាគតិចកួយ ប្រមាណ ៥០% លើផ្ទៃដីសម្បទានជាង ៩ពាន់ហិកតារ (៩.០១៥ហិកតារ)។
បច្ចុប្បន្ន ក្រុមហ៊ុនចិន ចំនួន៥ កំពុងទទួលដីសម្បទានសេដ្ឋកិច្ចលើផ្ទៃដីជាង ៤ម៉ឺន ២ពាន់ហិកតារ (៤២.០០០ហិកតារ) នៅក្នុងស្រុកឆែប ស្រុកជ័យសែន និងស្រុកត្បែងមានជ័យ ខេត្តព្រះវិហារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។