ក្រុមអ្នកតវ៉ាមានទាំងព្រះសង្ឃ និងប្រជាពលរដ្ឋរាប់រយនាក់ បន្តប្រមូលផ្តុំគ្នាធ្វើពិធីផ្សេងៗ និងស្រែកទាមទារឲ្យតុលាការលើកលែងការចោទប្រកាន់មនុស្សទាំង ២៣នាក់ ឲ្យមានសេរីភាពវិញនៅពីមុខសាលាដំបូងរាជធានីភ្នំពេញ។
សាលាដំបូងរាជធានីភ្នំពេញ បន្តបើកសវនាការទៅលើជនជាប់ចោទចំនួន ២៣នាក់ លើសំណុំរឿងប្រើអំពើហិង្សានៅផ្លូវវ៉េងស្រេង និងរោងចក្រ យ៉ាក ជីន នាវេលាម៉ោង ៨ព្រឹកថ្ងៃទី២២ ខែឧសភា នេះ។
ក្រុមអ្នកតវ៉ាបានប្រមូលផ្តុំគ្នានៅជាប់នឹងរបាំងដែក និងឡានទឹករបស់កម្លាំងសមត្ថកិច្ច រាប់រយនាក់នៅតាមផ្លូវឆ្លងកាត់មុខសាលាដំបូង ព្រឹកថ្ងៃព្រហស្បតិ៍ ទី២២ ខែឧសភា។
នៅអំឡុងពេលសវនាការកំពុងដំណើរការចូលថ្ងៃទី៣ មកហើយនោះ ក្រុមអ្នកតវ៉ាដឹកនាំដោយស្ត្រីសហគមន៍បឹងកក់ និងព្រះសង្ឃផង បាននិមន្ត និងដើរហែក្បួនលើកបដា ដើរព័ទ្ធជុំវិញសាលាដំបូង ដោយអ្នកតវ៉ាខ្លះបានគោះស្គរ ឬគោះឆ្នាំង ជាដើម។ ខ្លឹមសារក្នុងបដា និងសម្រែកតវ៉ារបស់ក្រុមអ្នកតវ៉ា បានរិះគន់សកម្មភាពរបស់មន្ត្រីតុលាការ ដែលក្រុមអ្នកតវ៉ាចាត់ទុកថាមិនឯករាជ្យ ពុករលួយ និងស្ថិតក្រោមបង្គាប់អ្នកមានអំណាច។
អ្នកស្រី ទេព វន្នី តំណាងស្ត្រីសហគមន៍បឹងកក់ ឲ្យដឹងថា ក្រុមអ្នកតវ៉ាបានរៀបចំធ្វើពិធីសែនលុយដុល្លារក្លែងក្លាយ ឬហៅថា លុយខ្មោច រាប់ពាន់ម៉ឺនដុល្លារ សែនដើម្បីឧបកិច្ចជូនមន្ត្រីតុលាការពុករលួយ។ ជាងនេះ ពិធីសែនព្រេនក្រុមអ្នកតវ៉ាក៏បានអន្ទងហៅចំឈ្មោះលោកចៅក្រម និងព្រះរាជអាជ្ញាសាលាដំបូងមួយចំនួន ឲ្យមកទទួលយកសំណែននោះ៖ «អ្នកដែលចាប់ខ្លួនហ្នឹងសុទ្ធតែជាអ្នកទោសក្លែងក្លាយទាំងអស់។ ហើយតុលាការហ្នឹង គាត់ចូលចិត្តលុយខ្លាំងណាស់ ចូលចិត្តអំពើពុករលួយ។ អ៊ីចឹងក្នុងនាមយើងជាអ្នកស្អាតស្អំ យើងអត់មានប្រព្រឹត្តបទល្មើសខុស គឺយើងអត់មានលុយដែលពិតប្រាកដយកទៅឲ្យគាត់ទេ គឺមានតែលុយក្លែងក្លាយ ឧបកិច្ចជូនគាត់ទៅ»។
សវនាការលើសំណុំរឿងជនជាប់ចោទទាំង ២៣នាក់ នៅថ្ងៃនេះ ចាប់ផ្ដើមនៅម៉ោង ៨ព្រឹក។ រីឯក្រុមអ្នកតវ៉ា ឬមន្ត្រីសិទ្ធិមនុស្ស ក៏បានបង្ហាញវត្តមានព្រមគ្នានៅខាងក្រៅរបងតុលាការ។
សាច់ញាតិជនជាប់ចោទមួយចំនួន ដែលបានប្រមូលផ្តុំគ្នានៅមុខតុលាការ បានរិះគន់ថា សកម្មភាពប្រើហិង្សា និងចូលចាប់សាច់ញាតិដល់ក្នុងផ្ទះរបស់សមត្ថកិច្ចចម្រុះ កាលពីព្រឹកថ្ងៃទី២ និងទី៣ ខែមករា នៅតាមផ្លូវវ៉េងស្រេង និងរោងចក្រ យ៉ាក ជីន ជារឿងឃោរឃៅបំផុត។
សាច់ញាតិជនជាប់ចោទមកពីខេត្តកំពង់ចាម ព្រៃវែង និងកំពង់ស្ពឺ មានចម្ងល់ថា ហេតុអ្វីបានជាអ្នកប្រើកាំភ្លើងបាញ់សម្លាប់កម្មករ បែរជាតុលាការមិនកាត់ទោស ហើយបែរជាទៅកាត់ទោសជនរងគ្រោះទៅវិញ៖ «ប្អូនខ្ញុំដេកក្នុងបន្ទប់ចំនួន ៣នាក់ មានឈ្មោះ ឈឿន យ៉ុង ប៉ាង វណ្ណី និង ប៉ោ សារ៉ាត គឺសមត្ថកិច្ចវ៉ៃបន្ទប់ចាប់ប្អូនខ្ញុំ អូសពីក្នុងមុង ហើយមិនចាប់ត្រឹមត្រូវទេ គឺវ៉ៃបែកឈាម និងបាញ់ថែមទៀតនៅក្នុងផ្ទះជួល។ ហើយនៅពេលខ្ញុំរត់ទៅតាមប្អូន កម្លាំងសមត្ថកិច្ចបានចង្អុលមុខខ្ញុំឲ្យចូលទៅក្នុងផ្ទះវិញ ប្រយ័ត្នងាប់ទាំងអស់គ្នា។ តុលាការកម្ពុជា អយុត្តិធម៌ណាស់ គឺគ្មានភាពយុត្តិធម៌ទេ។ ចាប់អ្នកអត់មានកំហុសយកមកកាត់ក្តី ដល់ពួកមានកំហុសនៅក្រៅឃុំនៅឡើយទេ»។
លោក ស ម៉ូរ៉ា ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា ដែលបានតាមដានសំណុំរឿងក្តីជនជាប់ចោទទាំង ២៣នាក់ បានចាត់ទុកករណីនេះថា ជារឿងនយោបាយ។ លោកសំណូមពរទៅថ្នាក់ដឹកនាំគណបក្សនយោបាយបក្សកាន់អំណាច កុំឲ្យភ្ជាប់ជនជាប់ចោទទាំង ២៣នាក់ ដើម្បីស្ដារស្ថានភាពជាប់គាំងនយោបាយនៅកម្ពុជា៖ «រឿងនេះវានៅតែជារឿងនយោបាយ ហើយតុលាការ តុលាការពេលដែលចៅក្រមសួរនាំទៅលើជនជាប់ចោទផ្សេងៗហ្នឹង គឺយើងឃើញថា មិនមានលក្ខណៈឯករាជ្យ ឬត្រឹមត្រូវទេ។ យើងនៅតែមានការព្រួយបារម្ភទៅលើរឿងហ្នឹង? មើលឃើញថា វាមានឥទ្ធិពលពីផ្នែកនយោបាយ ទៅលើរឿងហ្នឹង ហើយយើងអំពាវនាវឲ្យមានការដោះលែងជាបន្ទាន់ ចំពោះអ្នកទាំង ២៣នាក់ហ្នឹង ដោយមិនមានការចោទប្រកាន់អ្វីទាំងអស់»។
សវនាការនៅថ្ងៃនេះក៏ឃើញវត្តមានក្រុមគ្រូពេទ្យរបស់អង្គការលីកាដូ (Licadho) បានចុះទៅផ្តល់សេវាព្យាបាលបឋមដល់ជនជាប់ចោទ និងសាច់ញាតិទាំងនៅខាងក្នុង និងខាងក្រៅបរិវេណតុលាការ។ ជាងនេះ នៅខាងក្រៅរបងតុលាការ ក្រុមគ្រូពេទ្យលីកាដូ ក៏បានផ្តល់សេវាព្យាបាល ឬផ្តល់ថ្នាំសង្កូវផ្សេងៗ ជូនដល់អ្នកតវ៉ារាប់សិបនាក់ថែមទៀត។
ទោះយ៉ាងណា ការប្រមូលផ្តុំគ្នា ឬការដើរហែក្បួនរបស់ក្រុមអ្នកតវ៉ាដែលប្រមូលផ្តុំគ្នានៅពីមុខសាលាដំបូង ទល់មុខនឹងរបាំងដែករបស់សមត្ថកិច្ច នាថ្ងៃព្រហស្បតិ៍ ទី២២ ខែឧសភា មិនមានអំពើហិង្សាណាមួយកើតឡើងទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។