សាលក្រមតុលាការកំពូលនៅព្រឹកថ្ងៃទី៩ ខែឧសភា មិនអនុញ្ញាតឲ្យជនសង្ស័យចំនួន ២១នាក់ នៅក្រៅមន្ទីរឃុំឃាំងទៅតាមសំណើរបស់មេធាវីការពារក្តីទេ ដោយតម្កល់ការសម្រេចរបស់សាលាឧទ្ធរណ៍ឲ្យនៅដដែល។ សាលក្រមនេះ ត្រូវក្រុមគ្រួសារជនជាប់ចោទរិះគន់ និងចាត់ទុកថា ជាតុលាការមិនឯករាជ្យ បម្រើឲ្យគណបក្សនយោបាយកំពុងកាន់អំណាច។
សំឡេងតវ៉ា៖ «សូមអស់លោកព្រះរាជអាជ្ញាចៅក្រម ឮសម្រែកប្រពន្ធកូន ដែលគេស្រែកហៅទន្ទឹងរង់ចាំប្ដី វិលមកផ្ទះវិញនោះ តើលោកខ្លោចផ្សាឬអត់? បើលោកជាខ្មែរដែរ លោកត្រូវចេះពិចារណា ហើយរិះគិត! ថាប្រពន្ធកូននៅរង់ចាំឯផ្ទះ តែប្ដីនៅក្នុងឃុំឃាំង ហើយមានជំងឺជាប់ខ្លួនទៀត»។
សម្រែកទាមទារឲ្យតុលាការកំពូលដោះលែងសាច់ញាតិទាំង ២១នាក់ ធ្វើឡើងនៅក្រៅរបងរបស់តុលាការកំពូល មានទីតាំងនៅអតីតមន្ទីររដ្ឋសភាមុខព្រះបរមរាជវាំង។ ការទន្ទឹងរង់ចាំការប្រកាសសាលក្រមនេះ ឃើញមានវត្តមានភរិយា ឬសាច់ញាតិជនជាប់ចោទ ព្រះសង្ឃ និងសហគមន៍រងគ្រោះដីធ្លីរាប់សិបនាក់ បានប្រមូលផ្តុំគ្នាលើកបដា មានទង់ជាតិ និងទង់សាសនា ជាដើម នៅខាងក្រៅរបងតុលាការកំពូល។
លោក សំ សុគង់ មេធាវីម្នាក់ស្ថិតក្នុងចំណោមមេធាវីការពារក្តីឲ្យជនជាប់ចោទ ឲ្យដឹងថា សាលក្រមតុលាការកំពូល មិនដោះលែងឲ្យកូនក្តីរបស់លោកទាំង ២១នាក់ នៅក្រៅឃុំទេ ដោយសំអាងថា សំណុំរឿងនេះកំពុងបន្តនីតិវិធីនៅសាលាដំបូង៖ «គាត់យោងនូវចំណុច២។ ទី១ ដោយសារសំណុំរឿងនេះខាងសាលារាជធានីភ្នំពេញបានបិទការស៊ើបសួរ ហើយបញ្ជូនសំណុំរឿងនេះទៅជំនុំជម្រះ ហើយទី២ ដោយសារសំណុំរឿងអង្គសេចក្តីរបស់សាលាដំបូងរាជធានីភ្នំពេញហ្នឹង កំពុងដំណើរការកាត់ក្តី។ អ៊ីចឹង ចំពោះក្រុមមេធាវីការពារយើងមានការសោកស្ដាយ»។
អ្នកស្រី ហៀន សុខា ភរិយាជនសង្ស័យឈ្មោះ ច័ន្ទ ពុទ្ធិសក្តិ បានរិះគន់សាលក្រមតុលាការកំពូល ថា មិនឯករាជ្យ និងអនុវត្តតាមក្រោមបង្គាប់បក្សកាន់អំណាច។ ភរិយារូបនេះ ថ្កោលទោសចំពោះបុគ្គលរបស់តុលាការកំពូល ខ្លះថាគ្មានវិជ្ជាជីវៈ និងមិនសមជាអ្នកមានចំណេះដឹងខ្ពង់ខ្ពស់ទេ៖ «តុលាការអយុត្តិធម៌ណាស់! ខ្ញុំជាភរិយារបស់គាត់ ខ្ញុំកំពុងទន្ទឹងរង់ចាំមើលផ្លូវគាត់ ដើម្បីមកជួបជុំគ្រួសារវិញ។ ហេតុអីតុលាការអយុត្តិធម៌ តុលាការជាអ្នករៀនច្បាប់ ហេតុអីក៏ឈរលើច្បាប់ កាន់ជើងតែអ្នកមានអំណាច អ្នកមានទឹកលុយ។ ចំណែកពួកខ្ញុំជាប្រជាពលរដ្ឋ សាមញ្ញធម្មតាពួកលោកមិនរកយុត្តិធម៌ឲ្យខ្ញុំទេ»។
ដូចគ្នាដែរ អ្នកស្រី ប្រាក់ សុណ្ណារី ភរិយា លោក វន់ ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ ស្ថិតក្នុងចំណោមជនជាប់ឃុំទាំង ២១នាក់នោះ មិនបានបានឲ្យតម្លៃសាលក្រម ឬការកាត់របស់មន្ត្រីតុលាការកំពូល ឡើយ៖ «អ្វីដែលខ្ញុំអស់សង្ឃឹមមែនទែន ដោយសារតែយើងសុំធានាមកនៅក្រៅឃុំ ដើម្បីឲ្យយើងបានព្យាបាលជំងឺរបស់គាត់នៅតែគេមិនអនុញ្ញាត។ នេះជារឿងមួយដែលធ្វើឲ្យខ្ញុំមានអារម្មណ៍ឈឺចាប់មែនទែន ដោយសារតែតុលាការនៅស្រុកខ្មែរ»។
លោក អំ សំអាត ប្រធានផ្នែកបច្ចេកទេសស៊ើបអង្កេតអង្គការលីកាដូ (Licadho) បានចាត់ទុកសាលក្រមរបស់តុលាការកំពូល សម្រេចក្តីឲ្យជនទាំង ២១នាក់ បន្តជាប់ពន្ធនាគារ ជារឿងនយោបាយ និងមានភាពអាថ៌កំបាំង៖ «ខ្ញុំគិតថា អ្នកទាំង ២១នាក់ហ្នឹង នឹងត្រូវតុលាការទម្លាក់ចោលការចោទប្រកាន់ និងត្រូវដោះលែងឲ្យមានសេរីភាពវិញ។ ក៏ប៉ុន្តែបើផ្អែកទៅលើស្ថានភាពនយោបាយ ផ្អែកទៅលើនយោបាយ ហើយតុលាការមិនឈរលើជំហរឯករាជ្យទេ វាសនាអ្នកទាំង ២៣នាក់ហ្នឹង គឺស្ថិតក្នុងភាពស្រពិចស្រពិលដដែល»។
តុលាការកំពូល កាលពីថ្ងៃទី២ ខែឧសភា បានបើកសវនាការបណ្ដឹងស្នើសុំនៅក្រៅឃុំរបស់មេធាវីការពារក្តីជនសង្ស័យទាំង ២១នាក់។ ចំណែកសាលាឧទ្ធរណ៍កាលពីថ្ងៃទី២៤ ខែមីនា បានតម្កល់សេចក្តីសម្រេចឲ្យជនសង្ស័យទាំង ២១នាក់ បន្តជាប់ក្នុងឃុំដែរ។
ជនសង្ស័យចំនួន ២១នាក់ ស្ថិតក្នុងចំណោមមនុស្សចំនួន ២៣នាក់ ដែលសមត្ថកិច្ចចាប់ខ្លួន កាលពីថ្ងៃទី២ និងទី៣ ខែមករា ឆ្នាំ២០១៤។ ការចាប់ខ្លួននេះ ធ្វើឡើងនៅក្នុងពេលកម្លាំងប្រដាប់អាវុធចម្រុះរដ្ឋាភិបាល បង្ក្រាបការតវ៉ារបស់ក្រុមកម្មករដែលប្រមូលផ្តុំគ្នានៅតាមផ្លូវវ៉េងស្រេង និងនៅម្តុំរោងចក្រ យ៉ាក ជីន ដើម្បីទាមទារឲ្យរដ្ឋាភិបាលដំឡើងប្រាក់បៀវត្ស ១៦០ដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។