សាលាដំបូងរាជធានីភ្នំពេញ បានប្រកាសសាលក្រមផ្ដន្ទាទោសជនជាប់ចោទគំរាមសម្លាប់លោកបណ្ឌិត សុខ ទូច ប្រធានក្រុមការងារស្រាវជ្រាវកិច្ចការព្រំដែននៃរាជបណ្ឌិត្យសភាកម្ពុជា តាមបណ្ដាញសង្គមហ្វេសប៊ុក (Faccbook) ឲ្យជាប់ទោស ១៨ខែ តែត្រូវអនុវត្តទោសចំនួន ៦ខែ និងពិន័យប្រាក់ ១លានរៀល។ ការប្រកាសនេះ ធ្វើឡើងនៅក្នុងបន្ទប់សវនាការ ថ្ងៃទី២៣ ខែកុម្ភៈ។
បន្ទាប់ពីចៅក្រមសាលាដំបូងរាជធានីភ្នំពេញ ប្រកាសសាលក្រមផ្ដន្ទាទោសជនជាប់ចោទគំរាមសម្លាប់លោកបណ្ឌិត សុខ ទូច ភរិយាជនជាប់ចោទបានព្រួយបារម្ភថា ខ្លួនពុំមានលទ្ធភាពរកថវិកាពិន័យដើម្បីបង់ជូនរដ្ឋនោះទេ។
ភរិយារបស់បុរសជាទណ្ឌិតឈ្មោះ ផង់ សីហា លោកស្រី ម៉ៅ សុភ័ក្ត្រ ដែលបីកូននៅដៃ ថ្លែងទាំងទឹកមុខភ័យអរថា អ្វីដែលជាក្ដីបារម្ភរបស់នាងនៅពេលនេះ គឺគ្រួសារនាងទីទាល់ក្រពុំមានលទ្ធភាពរកប្រាក់បង់ចូលថវិការដ្ឋបានឡើយ។
នាងបន្តថា គិតទៅដល់ថ្ងៃទី៧ ខែមីនា ស្វាមីនាងអនុវត្តទោសបានគ្រប់ ៦ខែ នឹងដល់កំណត់នៅក្រៅឃុំ៖ «ខ្ញុំពេញចិត្តទទួល ព្រោះអីគាត់អត់មានកាំភ្លើងពិតប្រាកដ ហើយគាត់អត់បានមានបំណងថា សម្លាប់លោកបណ្ឌិត សុខ ទូច ដែរ ព្រោះអីគាត់គ្រាន់តែបង្ហោះទៅជ្រុល។ ខ្ញុំអត់មានថវិកាសម្រាប់ឲ្យសំណងរដ្ឋសោះ តាំងពីគេចាប់ប្ដីខ្ញុំមក ខ្ញុំមានផ្ទៃពោះ ៦ខែ ខ្ញុំអត់បានចេញទៅរកស៊ីអី»។
សាលាដំបូងរាជធានីភ្នំពេញ នៅរសៀលថ្ងៃទី២៣ ខែកុម្ភៈ បានប្រកាសសាលក្រមផ្ដន្ទាទោសជនជាប់ចោទ ឈ្មោះ ផង់ សីហា អាយុ ២៦ឆ្នាំ ពីបទគំរាមសម្លាប់លោកបណ្ឌិត សុខ ទូច ប្រធានក្រុមការងារស្រាវជ្រាវកិច្ចការព្រំដែនឲ្យជាប់ពន្ធនាគារ ១៨ខែ ប៉ុន្តែអនុវត្តទោស ៦ខែ និងពិន័យប្រាក់ ១លានរៀល បង់ចូលថវិការដ្ឋ។ ការប្រកាសនេះ ធ្វើឡើងនៅចំពោះមុខជនជាប់ចោទ និងមេធាវីការពារក្ដីជនជាប់ចោទដែលផ្ដល់ឲ្យដោយគណៈមេធាវី។
បុរសជាជនជាប់ចោទមិនអាចឆ្លើយប្រាប់ពីការយល់ឃើញរបស់ខ្លួនដល់អ្នកយកព័ត៌មានវិទ្យុអាស៊ីសេរី អំពីការកាត់សេចក្ដីនេះបានទេ ដោយកងសន្តិសុខបណ្ដើរចូលទៅក្នុងបន្ទប់បិទជិតយ៉ាងប្រញាប់ប្រញាល់បន្ទាន់ពីប្រកាសសាលក្រមរួច។
ជនជាប់ចោទ ផង់ សីហា ត្រូវបានគេចោទប្រកាន់ថា បានសរសេរគំរាមសម្លាប់ ដោយចោទប្រកាន់ថា លោកបណ្ឌិត សុខ ទូច លក់ក្បាលឲ្យវៀតណាម ក្នុងរឿងព្រំដែន ដោយបង្ហោះតាមហ្វេសប៊ុកកាលពីថ្ងៃទី២៩ ខែសីហា ឆ្នាំ២០១៥។ ប៉ុន្តែក្រុមគ្រួសាររបស់ជនជាប់ចោទអះអាងថា ខ្លួនបានចែករំលែក (Share) បន្តពីគេដើម្បីបង្ហោះតែប៉ុណ្ណោះ។
ភ្លាមៗនោះ ជនសង្ស័យត្រូវបានត្រូវប៉ូលិសខ្មែរ និងប៉ូលិសថៃ សហការគ្នាចាប់ខ្លួនបញ្ជូនពីក្រុងថេប ប្រទេសថៃ ក្នុងពេលកំពុងធ្វើការ ហើយសាលាដំបូងរាជធានីភ្នំពេញ បានសម្រេចឃុំខ្លួនបណ្ដោះអាសន្ននៅពន្ធនាគារព្រៃស។
ការគំរាមសម្លាប់លោកបណ្ឌិត សុខ ទូច បានកើតឡើងបន្ទាប់ពីបញ្ហាព្រំដែនរវាងកម្ពុជា-វៀតណាម បានផ្ទុះឡើង និងទំនងបណ្ដាលឲ្យមនុស្សមួយចំនួនមិនពេញចិត្តចំពោះការបកស្រាយរបស់លោក។ ក្រៅពីនេះអ្នកស្រី កុយ ពិសី ជាអនុប្រធានលេខាធិការដ្ឋានអចិន្ត្រៃយ៍នៃអាជ្ញាធរជាតិទទួលបន្ទុកកិច្ចការព្រំដែន ក៏រងការប្រមាថតាមបណ្ដាញសង្គមហ្វេសប៊ុក ដូចគ្នា។
ពាក់ព័ន្ធនឹងរឿងគំរាមសម្លាប់តាមហ្វេសប៊ុកនេះដែរ កាលពីថ្ងៃសុក្រ ទី៣០ ខែតុលា តុលាការខេត្តសៀមរាប បានសម្រេចដោះលែងឲ្យយុវជនឈ្មោះ តៅ សាវឿន ដែលគំរាមដាក់គ្រាប់បែកសម្លាប់លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ឲ្យនៅក្រៅឃុំបណ្ដោះអាសន្ន បន្ទាប់ពីកាត់ទោសរយៈពេល ១៥ខែ ប៉ុន្តែអនុវត្តទោសជាប់ពន្ធនាគារតែ ១ខែ។
ទាក់ទងនឹងការគំរាមសម្លាប់ និងប្រមាថលោកនាយករដ្ឋមន្ត្រី ហ៊ុន សែន តាមបណ្ដាញសង្គមវិញ កាលពីពេលថ្មីៗនេះ កម្លាំងនគរបាលសន្តិសុខផ្ទៃក្នុងក្រសួងមហាផ្ទៃ ក៏បានឃាត់ខ្លួនស្ត្រីវ័យក្មេងម្នាក់ទៅសាកសួរអស់ជាច្រើនម៉ោង បន្ទាប់ពីនាងបង្ហោះរូបភាពប្រមាថលោក ហ៊ុន សែន កាត់តរូបភាពលោក ហ៊ុន សែន ដេកក្នុងមឈូស តែត្រូវបានដោះលែងវិញក្រោយពីសាកសួរ។
នៅក្នុងខែកុម្ភៈ នេះ តុលាការខេត្តកំពង់ធំ បានដោះលែងយុវជនម្នាក់ឈ្មោះ ម៉ាន់ សំអ៊ាន់ ពាក់ព័ន្ធករណីគំរាមលោកនាយករដ្ឋមន្ត្រី ហ៊ុន សែន តាមបណ្ដាញសង្គម ដោយបញ្ជាឲ្យឈប់ប្រើគណនេយ្យហ្វេសប៊ុក របស់ខ្លួនបន្តទៀត។
ដោយឡែកជុំវិញការដែលគំរាមសម្លាប់លោក កឹម សុខា អនុប្រធានគណបក្សសង្គ្រោះជាតិ តាមបណ្ដាញសង្គមហ្វេសប៊ុក ដូចគ្នាដែរនោះ តុលាការនៅមិនទាន់ចាត់ការរកជនល្មើសបាននៅឡើយ ទោះបីជាត្រូវគេស្គាល់ថា ជាមន្ត្រីនគរបាលនៅក្រសួងមហាផ្ទៃ ក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។