នៅព្រឹកថ្ងៃទី២៨ ខែឧសភានេះ មានតំណាងរាស្ត្របក្សសង្គ្រោះជាតិមួយរូបទៀត គឺលោក នុត រំដួល មិនបានចូលទៅបំភ្លឺ នៅសាលាដំបូងរាជធានីភ្នំពេញឡើយ ជុំវិញករណីបាតុកម្មហិង្សានៅទីលានប្រជាធិបតេយ្យ កាលពីថ្ងៃទី១៥ កក្កដា ២០១៤។
គិតមកដល់ពេលនេះមានអ្នកតំណាងរាស្រ្តចំនួន៥រូបហើយ ដែលមិនព្រមចូលបំភ្លឺតាមការកោះហៅរបស់តុលាការក្រុងភ្នំពេញ ជុំវិញករណីដូចគ្នានេះ។
មិនខុសពីតំណាងរាស្ត្របក្សសង្គ្រោះជាតិ៤រូបទៀតដែរ បានអោយមេធាវីចូលបំភ្លឺជំនួស ប៉ុន្តែតុលាការក៏មិនបានសាកសួរដែរ នៅពេលគ្មានសាមីខ្លួនចូលបំភ្លឺដូច្នេះ។
លោក នុត រំដួល បញ្ជាក់ថា លោកនឹងចូលបំភ្លឺបើតុលាការតម្រូវសាមីខ្លួនចូលបំភ្លឺ តែលោកចាត់ទុកថា ការកោះហៅទៅសាកសួរនេះជាការរំខាន និងសួរតែរឿងដដែល៖ «ជាយោបល់ខ្ញុំផ្ទាល់ ខ្ញុំចង់ជម្រាបថា តុលាការធ្វើនេះគ្រាន់តែជាការរំខាន ដើម្បីមិនឲ្យតំណាងរាស្ត្រមិនសូវបានចុះជួបជាមួយពលរដ្ឋអីចឹងទៅ»។
យ៉ាងណាក៏ដោយតំណាងរាស្ត្របក្សសង្គ្រោះជាតិមួយរូបទៀត ដែលត្រូវតុលាការកោះហៅចូលឆ្លើយបំភ្លឺនៅថ្ងៃទី២៩ ឧសភា គឺលោក ឡុង រី ក៏នឹងមិនចូលទៅឆ្លើយបំភ្លឺដោយផ្ទាល់ទេ ដោយលោកប្រគល់សិទ្ធិឲ្យមេធាវីរបស់លោកគឺ លោក សំ សុគង់ទៅជំនួស។
តំណាងរាស្ត្របក្សសង្គ្រោះជាតិ៤រូបទៀតដែលមិនបានចូលបំភ្លឺដែរ មានលោក ហូរ វ៉ាន់ លោក រៀល ខេមរិន្ទ្រ លោក ម៉ែន សុថាវរិន្ទ្រ និងលោក កែវ ភីរម្យ។
រដ្ឋធម្មនុញ្ញមាត្រា ៨០ ចែងថា តំណាងរាស្ត្រមានអភ័យឯកសិទ្ធិ។ តំណាងរាស្ត្ររូបណាក៏ដោយ មិនអាចត្រូវបានចោទប្រកាន់ ចាប់ខ្លួន ឃាត់ខ្លួន ឬឃុំខ្លួនដោយហេតុព្រោះតែសំដែងមតិយោបល់ ឬបញ្ចេញមតិក្នុងការបំពេញមុខងាររបស់ខ្លួនសោះឡើយ។ ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួនសមាជិកណាមួយនៃរដ្ឋសភានឹងអាចធ្វើទៅកើត លុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្រ្តៃយ៍របស់រដ្ឋសភាក្នុងចន្លោះសម័យប្រជុំនៃ រដ្ឋសភា វៀរលែងតែក្នុងករណីបទល្មើសព្រហ្មទណ្ឌជាក់ស្ដែងប៉ុណ្ណោះ។
ក្នុងចំណោមតំណាងរាស្ត្រទាំង៧រូប ដែលស្ថិតក្នុងបញ្ជីរបស់តំណាងតុលាការក្រុងភ្នំពេញ មានតែលោកស្រី មូរ សុខហួរ ម្នាក់គត់ ដែលព្រមចូលបំភ្លឺតាមការកោះហៅរបស់តុលាការ ប៉ុន្តែលោកស្រីមិនបានឆ្លើយនឹងសំណួររបស់តុលាការឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។