គណបក្សសង្គ្រោះជាតិ បានប្រកាសថា ខ្លួនអាចគ្រងតំណែងជាមេឃុំ និងចៅសង្កាត់រហូតដល់ ៥០០ឃុំ-សង្កាត់ ផ្អែកលើលទ្ធផលក្រៅផ្លូវការដែលគណបក្សនេះប្រមូលបាន។ ទោះជាយ៉ាងនេះក្តី លទ្ធផលផ្លូវការពីគណៈកម្មាធិការជាតិរៀបចំការបោះឆ្នោត (គ.ជ.ប) នៅមិនទាន់ប្រកាសនៅពេលនេះនៅឡើយក្តី។
មន្ត្រីគណបក្សសង្គ្រោះជាតិ នៅយប់ថ្ងៃទី៤ ខែមិថុនា ថ្លែងនៅមុខអ្នកសារព័ត៌មានថា គណបក្សសង្គ្រោះជាតិ អាចឈ្នះតំណែងជាមេឃុំ និងចៅសង្កាត់ប្រមាណ ៥០០ឃុំ-សង្កាត់ក្នុងចំណោមឃុំ-សង្កាត់ទាំង ១.៦៤៦ នៅទូទាំងប្រទេស ឬស្មើនឹង ៤៦% នៃអ្នកចេញទៅបោះឆ្នោតសរុបជាង ៦,៧លាននាក់ (៦.៧៤៣.៣២៩នាក់) បើផ្អែកលើលទ្ធផលក្រៅផ្លូវការដែលគណបក្សនេះប្រមូលបានពីប្រភពរបស់ខ្លួនតាមបណ្ដាខេត្ត។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ចាត់ទុកលទ្ធផលបណ្ដោះអាសន្ននេះថាជាជោគជ័យយ៉ាងត្រចះត្រចង់ សម្រាប់ប្រវត្តិនយោបាយរបស់គណបក្សសង្គ្រោះជាតិ៖ « នៅក្នុងប្រវត្តិសាស្ត្រដែលគណបក្សសង្គ្រោះជាតិ ឥឡូវនេះគ្រប់គ្រងឃុំ ឈ្នះឃុំប្រមាណ ៥០០ឃុំ។ ៥០០ឃុំហ្នឹងគ្រប់គ្រងដោយគណបក្សសង្គ្រោះជាតិ នៅពេលខាងមុខ ហើយសុទ្ធជាឃុំធំៗដែលមានសក្ដានុពល និងសកម្មភាពសេដ្ឋកិច្ច ដែលមានប្រជាពលរដ្ឋរស់នៅច្រើន។ ដូច្នេះ នេះគឺជាជោគជ័យដ៏ធំសម្រាប់គណបក្សសង្គ្រោះជាតិ »។
ស្របពេលដែលលោក យឹម សុវណ្ណ អះអាងអំពីលទ្ធផលបណ្ដោះអាសន្នដែលថាគណបក្សសង្គ្រោះជាតិ អាចឈ្នះរហូតដល់ ៥០០ឃុំ-សង្កាត់នេះ តួលេខបឋមនៃលទ្ធផលបោះឆ្នោតពី "សំឡេងម្ចាស់ឆ្នោតកម្ពុជា" ត្រឹមម៉ោង ១០:១៣នាទីយប់ថ្ងៃទី៤ មិថុនា បង្ហាញថា គណបក្សប្រជាជនកម្ពុជា និងគណបក្សសង្គ្រោះជាតិ ទទួលបានសំឡេងគាំទ្រប្រកៀកប្រកិតគ្នា ដោយគណបក្សកាន់អំណាចមានសំឡេងលើសគណបក្សប្រឆាំងនេះប្រហែលតែ ១០% ប៉ុណ្ណោះ។ ទោះជាយ៉ាងនេះក្តី លទ្ធផលនេះ គឺប្រមូលបានពីឃុំ-សង្កាត់ត្រឹមតែ ១.២៣២ ប៉ុណ្ណោះ ក្នុងចំណោមឃុំ-សង្កាត់ទាំងអស់ ២២.១៤៨។
លទ្ធផលបណ្ដោះអាសន្នដែលប្រកាសដោយលោក យឹម សុវណ្ណ ហាក់មានភាពប្រហាក់ប្រហែលគ្នាទៅនឹងលទ្ធផលក្រៅផ្លូវការ ដែលចេញផ្សាយដោយសារព័ត៌មានក្នុងស្រុកមួយស្និទ្ធនឹងរដ្ឋាភិបាលលោក ហ៊ុន សែន ដែលបង្ហាញថា គណបក្សសង្គ្រោះជាតិ កើនសំឡេងពី ៤០ឃុំ-សង្កាត់ក្នុងឆ្នាំ២០១២ ដល់ ៤៨២ឃុំ-សង្កាត់ ចំណែកឯគណបក្សប្រជាជនកម្ពុជា ថយសំឡេងពី ១.៥៩២ឃុំ-សង្កាត់ មកនៅត្រឹម ១.១៦៣ឃុំ-សង្កាត់ ពោលគឺគណបក្សកាន់អំណាចបាត់បង់រហូតដល់ ៤២៩ឃុំ-សង្កាត់ បើប្រៀបធៀបទៅនឹងការបោះឆ្នោតឃុំ-សង្កាត់ឆ្នាំ២០១២។
ទោះជាយ៉ាងណាក៏ដោយ គណៈកម្មាធិការជាតិរៀបចំការបោះឆ្នោត ដែលជាស្ថាប័នផ្លូវការតែមួយគត់ដែលអាចប្រកាសលទ្ធផលផ្លូវការនៃការបោះឆ្នោតនេះ នៅមិនទាន់ប្រកាសលទ្ធផលបឋមចប់សព្វគ្រប់នៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។