មន្ត្រីជាន់ខ្ពស់គណបក្សប្រជាជនកម្ពុជាឲ្យដឹងថាគណបក្សជាប់ឆ្នោតទាំងពីរ នឹងជួបគ្នាចរចាបន្ត នៅពេលឆាប់ៗនេះ តែមិនទាន់បញ្ជាក់អំពីកាលបរិច្ឆេទជាក់លាក់នោះឡើយ។ រីឯគណបក្សសង្គ្រោះជាតិថាខ្លួនរង់ចាំចម្លើយពីគណបក្សប្រជាជនកម្ពុជាក្នុងការណាត់ជួបគ្នាបន្តនេះ។
មន្ត្រីឃ្លាំមើលការបោះឆ្នោតលើកឡើងថា គណបក្សទាំងពីរកំពុងពន្យារពេលការចរចា និងលេងល្បែងនយោបាយមួយថ្មីទៀត ក្នុងការចរចាពេលខាងមុខ ពីព្រោះថាទ្វារនៃការចរចាគ្រាន់តែបានបើក តែគណបក្សទាំងពីរមិនបានជួបគ្នា ដើម្បីបញ្ចប់ជម្លោះនយោបាយឲ្យពិតប្រាកដនៅឡើយ។
មន្ត្រីជាន់ខ្ពស់គណបក្សសង្គ្រោះជាតិឲ្យដឹងនៅថ្ងៃទី២៧ ឧសភាថាគណបក្សសង្គ្រោះជាតិបានបញ្ជូនរបៀបវារៈ ចរចាទៅគណបក្សប្រជាជនកម្ពុជារួចហើយ បន្ទាប់ពីថ្នាក់ដឹកនាំកំពូលគណបក្សបានសម្រេច។
មន្ត្រីជាន់ខ្ពស់គណបក្សសង្គ្រោះជាតិ លោក គួយ ប៊ុនរឿន និងជាសមាជិកក្រុមបច្ចេកទេស ចរចាមានប្រសាសន៍ថាគណបក្សសង្គ្រោះជាតិ រង់ចាំចម្លើយពីគណបក្សប្រជាជនកម្ពុជា ក្នុងការជួបគ្នាបន្តជជែកអំពីការចរចានេះ៖ «ជាគោលការណ៍យើងបានជួបគ្នា ហើយសំខាន់ យើងបានបញ្ជូនរបាយការណ៍ជាគោលការណ៍ទៅគណបក្សប្រជាជនកម្ពុជាហើយ តែយើងមិនទាន់មានអីទេគឺមិនទាន់មានលទ្ធផលនៅឡើយ»។
រីឯប្រធានគណៈកម្មការ សេដ្ឋកិច្ចនិងសវនកម្មនៃរដ្ឋសភា លោក បណ្ឌិតរដ្ឋ ជាម យៀប និងជាសមាជិកក្រុមការងារបច្ចេកទេសចរចាគណបក្សប្រជាជនកម្ពុជា មានប្រសាសន៍ថាតំណាងគណបក្សទាំងពីរនឹងជួបគ្នាឆាប់ក្នុងពេលឆាប់ៗ ពីព្រោះថាគ្មានជម្រើសអ្វីល្អជាងការចរចាទេ ដើម្បីបញ្ចប់ជម្លោះនយោបាយ។ យ៉ាងនេះក្ដី លោក ជាម យៀប មិនបានបញ្ជាក់កាលបរិច្ឆេទជួបគ្នាពិតប្រាកដ ទេអំពីការកំណត់ជួបគ្នារវាងតំណាងគណបក្សសង្គ្រោះជាតិ និងតំណាងគណបក្សប្រជាជនកម្ពុជានោះ៖ «សភាពការណ៍នៅកម្ពុជា ដែលនៅសេសសល់លើគ្រប់ផ្នែក ដែលគណបក្សទាំងពីរជាប់ឆ្នោតនៅរដ្ឋសភាហ្នឹង មានតែការចរចាទេ ដែលជាដំណោះស្រាយនោះ មិនអាចយកគោលការណ៍ដំណោះស្រាយធ្វើបាតុកម្មនោះអត់បានទេ អាហ្នឹងអត់បានទេ»។
ការបង្ហើបឲ្យដឹងអំពីផែនការជួបគ្នាចរចាបន្តនេះ នៅខណៈប្រទេសថៃកំពុងមានវិបត្តិនយោបាយផ្ទៃក្នុងធ្ងន់ធ្ងរ ហើយអ្នកវិភាគនយោបាយ បានជំរុញឲ្យគណបក្សជាប់ឆ្នោតទាំងពីរ ត្រូវពន្លឿនការចរចា ក្នុងការរកឯកភាពជាតិ ដែលជាឱកាសល្អសម្រាប់អ្នកនយោបាយកម្ពុជា ក្នុងការទាញយកប្រយោជន៍ពីប្រទេសជិតខាងដែលកំពុងតែមានវិបត្តិនេះ។
តំណាងគណបក្សទាំងពីរបានជួបគ្នាកាលពីថ្ងៃទី២២ ឧសភា នោះពិភាក្សាអំពីចំណុចមួយចំនួនក្នុងចំណោម១៤ចំណុច ដែលគណបក្សទាំងពីរបានព្រមព្រៀងគ្នាកាលពីខែមីនា។
ប្រធានគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា លោក បណ្ឌិត ហង្ស ពុទ្ធា មានប្រសាសន៍ថាគណបក្សទាំងពីរហាក់លេងល្បែងនយោបាយ មួយថ្មីទៀតក្នុងការចរចាបន្ត ព្រោះថាគណបក្សទាំងពីរបានអះអាងថា ទ្វារចរចានៅតែបើកចំហ តែបញ្ហាធ្វើឲ្យឈានជួបគ្នាក្នុងការចរចា ហាក់ដូចជាមិនទាន់ច្បាស់លាស់នៅឡើយ៖ «បាទខ្ញុំគិតថា គណបក្សទាំងពីរមិនទាន់ គិតគូរពីផលប្រយោជន៍ជាតិខ្ពស់ជាង ផលប្រយោជន៍បក្សនៅឡើយទេ អ៊ីចឹងហើយទើបមានការ រាំងស្ទះក្នុងការចរចាបាទ»។
ក្រុមអ្នកជំនាញការបោះឆ្នោតជប៉ុន ដែលដឹកនាំដោយលោក សិនយ៉ា ម៉ូរី (Senya Mori) អគ្គនាយករងនៃអគ្គនាយកដ្ឋានអភិវឌ្ឍន៍ឧស្សាហកម្ម និងគោលនយោបាយសាធារណៈនៃទីភ្នាក់ងារសហប្រតិបត្តិការអន្តរជាតិជប៉ុន(JICA) បានជួបតំណាងគណបក្សទាំងពីរកាលពីថ្ងៃទី២០ ឧសភា។ នៅក្នុងជំនួបទាំងតំណាងគណបក្សទាំងពីរនោះ អ្នកជំនាញការបោះឆ្នោតជប៉ុនបាន ជំរុញឲ្យគណបក្សទាំងពីរឆាប់ត្រូវរ៉ូវគ្នាលើរឿងជម្លោះនយោបាយនេះ ដើម្បីឲ្យរដ្ឋាភិបាលជប៉ុនងាយនឹងជួយលើការ កែទម្រង់ការបោះឆ្នោតនេះ។
ក្រៅពីជួបតំណាងគណបក្សនយោបាយទាំងពីរ អ្នកជំនាញការបោះឆ្នោតជប៉ុន ក៏បានជួបតំណាងអង្គការ សង្គមស៊ីវិល ដើម្បីស្រាវជ្រាវអំពីការកែទម្រង់ការបោះឆ្នោតនៅកម្ពុជា។ លោកបណ្ឌិត ហង្ស ពុទ្ធា ឲ្យដឹងថា តំណាងអង្គការសង្គមស៊ីវិលបានដាក់របាយការណ៍ជាច្រើន ទាក់ទងនិងការកែទម្រង់ការបោះឆ្នោតនេះ។ លោក ហង្ស ពុទ្ធា ឲ្យដឹងចំណុចដែលសំខាន់នោះ មាន៥ចំណុចដូចជា សុំឲ្យជប៉ុន ជួយកែទម្រង់គណៈកម្មាធិការជាតិរៀបចំការបោះឆ្នោត កែទម្រង់បញ្ជីឈ្មោះបោះឆ្នោត ប្រព័ន្ធផ្សព្វផ្សាយ រៀបចំរបៀបដោះស្រាយទំនាស់ និង សុំឲ្យជួយកែទម្រង់ប្រព័ន្ធបោះឆ្នោត ដើម្បីធានាថាប្រជាពលរដ្ឋគ្រប់រូបមានសិទ្ធិបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។