តំណាងគណបក្សជាប់ឆ្នោតទាំងពីរ គឺគណបក្សសង្គ្រោះជាតិ និងគណបក្សប្រជាជនកម្ពុជា បានជួបគ្នាក្រៅផ្លូវការដូចការគ្រោងទុក នៅព្រឹកថ្ងៃព្រហស្បតិ៍ ទី២២ ឧសភា នេះ ដែលជជែកអំពីរបៀបវារៈក្នុងការចរចាបន្តទៀត។ ហើយតំណាងគណបក្សទាំងពីរ បានយកការពិគ្រោះយោបល់គ្នានេះ ដាក់ជូនថ្នាក់ដឹកនាំកំពូលគណបក្សរៀងៗខ្លួន រួចនឹងណាត់ជួបគ្នាបន្តទៀត។
មន្ត្រីជាន់ខ្ពស់គណបក្សសង្គ្រោះជាតិ ឲ្យដឹងថា តំណាងគណបក្សទាំងពីរនឹងជួបគ្នាម្ដងទៀត នៅដើមសប្ដាហ៍ក្រោយយកលទ្ធផលពីថ្នាក់ដឹកនាំរៀងៗខ្លួនមកពិគ្រោះគ្នាបន្ត ដើម្បីឈានទៅដល់ការចរចាក្រុមបច្ចេកទេស។
លោក គួយ ប៊ុនរឿន មានប្រសាសន៍ថា លោកបានជួបតំណាងគណបក្សប្រជាជនកម្ពុជា និងបានឯកភាពលើគោលដៅទាំង ១៤ចំណុច ដែលក្រុមបច្ចេកទេសនៃគណបក្សទាំងពីរ បានចុះកិច្ចព្រមព្រៀងរួមគ្នា កាលពីខែមីនា ឆ្នាំ២០១៤។ តែយ៉ាងនេះក្ដី លោក គួយ ប៊ុនរឿន បញ្ជាក់ថា មិនទាន់មានលទ្ធផលពិតប្រាកដទេ រង់ចាំថ្នាក់ដឹកនាំគណបក្សទាំងពីរសម្រេច។
«សំឡេង»
គណបក្សទាំងពីរបានឯកភាពគ្នានោះ រួមមាន ការរៀបចំចុះឈ្មោះបោះឆ្នោត និងបញ្ជីឈ្មោះអ្នកបោះឆ្នោត រៀបចំបង្កើតច្បាប់ស្ដីពីហិរញ្ញវត្ថុគណបក្សនយោបាយ កំណែទម្រង់ស្ថាប័នបោះឆ្នោត អព្យាក្រឹត្យភាព សុចរិតភាពរបស់សង្គមស៊ីវិល ប្រព័ន្ធផ្សព្វផ្សាយ និងមធ្យោបាយផ្សព្វផ្សាយរបស់គណបក្សនយោបាយ យន្តការនៃការដោះស្រាយវិវាទ ការសង្កេតការណ៍បោះឆ្នោត អព្យាក្រឹត្យភាពនៃមន្ត្រីរាជការកងកម្លាំងប្រដាប់អាវុធ កាលបរិច្ឆេទនៃការបោះឆ្នោត បទបញ្ជា និងនីតិវិធីនៃការបោះឆ្នោត កែសម្រួល និងពង្រឹងទោសបញ្ញត្តិនៅក្នុងការបោះឆ្នោត ការឃោសនាបោះឆ្នោត ការបោះឆ្នោតមេភូមិ និងការស្ទង់មតិ។
ប៉ុន្តែ អ្វីដែលឈានដល់ក្រុមបច្ចេកទេសបក្សទាំងពីរផ្អាកការចរចាជាបណ្ដោះអាសន្ននោះ គឺខុសគ្នាត្រង់ថា គណបក្សសង្គ្រោះជាតិ ចង់ដាក់ស្ថាប័ន គ.ជ.ប ជាស្ថាប័នធម្មនុញ្ញ។
លោក គួយ ប៊ុនរឿន អះអាងថា ចំណុចដែលគណបក្សសង្គ្រោះជាតិ ចង់បានស្ថាប័ន គ.ជ.ប ជាស្ថាប័នធម្មនុញ្ញនេះ លោកក៏បានជជែកជាមួយឯកឧត្តម ព្រុំ សុខា តំណាងគណបក្សប្រជាជនកម្ពុជា ដែរ។
ឧបនាយករដ្ឋមន្ត្រី ស ខេង និងជារដ្ឋមន្ត្រីក្រសួងមហាផ្ទៃ មានប្រសាសន៍ថា ការចរចាបញ្ចប់នយោបាយនោះ អាស្រ័យលើឆន្ទៈនយោបាយ។ លោកបញ្ជាក់ថា បើសិនជាគណបក្សសង្គ្រោះជាតិ ចង់បញ្ចប់ជម្លោះនយោបាយមែននោះ គឺអាចឈានដល់ជួបថ្នាក់ដឹកនាំកំពូលទៀត។
«សំឡេង»
អ្នកវិភាគនយោបាយបានបញ្ជាក់ថា នៅក្នុងស្ថានភាពនយោបាយបច្ចុប្បន្ននេះ គណបក្សនយោបាយទាំងពីរត្រូវតម្កល់ជាតិជាធំ ពិសេសនៅខណៈដែលអ្នកជំនាញការបោះឆ្នោតជប៉ុន បានចូលខ្លួនមកជួយកម្ពុជា លើការកែទម្រង់ការបោះឆ្នោតនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។