សំឡេងបន្ទរតាមមេក្រូរបស់សមាជិកគាំទ្រក្បួនឃោសនារបស់គណបក្សហ៊្វុនស៊ិនប៉ិច បានចាប់បន្លឺសំឡេងចេញពីទីលានប្រជាធិបតេយ្យ នាវេលាម៉ោងជាង ៧ព្រឹកថ្ងៃទី៣ ខែកក្កដា ដោយបានឆ្លងកាត់ផ្លូវមួយចំនួនក្នុងរាជធានីភ្នំពេញ។ ថ្នាក់ដឹកនាំសំខាន់ៗដែលបានចូលរួមក្នុងយុទ្ធនាការនេះមាន សម្ដេចរាជបុត្រី ព្រះអនុជ នរោត្តម អរុណរស្មី ប្រធានគណបក្សហ៊្វុនស៊ិនប៉ិច និងលោក ញឹក ប៊ុនឆៃ អគ្គលេខាធិការបក្សបានចូលរួមក្នុងយុទ្ធនាការនេះ។
សម្ដេចរាជបុត្រី ព្រះអនុជ នរោត្តម អរុណរស្មី ជាបុត្រីពៅរបស់សម្ដេច ព្រះមហាវីរក្សត្រ នរោត្តម សីហនុ មានបន្ទូលក្នុងក្បួនឃោសនា ដោយបានអំពាវនាវដល់ម្ចាស់ឆ្នោតឲ្យបោះឆ្នោតជូនគណបក្សហ៊្វុនស៊ិនប៉ិច ដែលមានលេខរៀងទី២ នៅលើសន្លឹកឆ្នោត។ សម្ដេចរាជបុត្រីបន្ថែមថា បោះឆ្នោតជូនហ៊្វុនស៊ិនប៉ិច គឺដើម្បីផ្តល់ឱកាសដល់គណបក្សនេះបានបម្រើតាមមាគ៌ារបស់ព្រះរាជបិតាស្ថាបនិកនាំមកនូវសុខសន្តិភាព ឯករាជ្យ និងការអភិវឌ្ឍជូនជាតិដូចសម័យសង្គមរាស្ត្រនិយម។
ក្បួនឃោសនារបស់គណបក្សហ៊្វុនស៊ិនប៉ិច លើកដំបូងនៅទីក្រុងភ្នំពេញ មានសមាជិកចូលរួមហែប្រមាណ ៣ពាន់នាក់ ហើយគ្មានសកម្មភាពរំខានពីគណបក្សផ្សេងនោះទេ ប៉ុន្តែ មានកកស្ទះចរាចរណ៍តិចតួច។
សម្ដេចរាជបុត្រី នរោត្តម អរុណរស្មី មានបន្ទូលថា ដើម្បីលើកស្ទួយស្ត្រី ឬគាំទ្រស្ត្រីឲ្យមានតួនាទីខ្ពស់ក្នុងជួររដ្ឋាភិបាល អ្នកមានសិទ្ធិបោះឆ្នោតត្រូវទៅបោះឆ្នោតឲ្យបានទាំងអស់គ្នានៅថ្ងៃអាទិត្យ ទី២៨ ខែកក្កដា ហើយបោះឆ្នោតជូនគណបក្សហ៊្វុនស៊ិនប៉ិច ដែលមានស្ត្រីជាតំណាង និងជាមេដឹកនាំ។
អតីតឯកអគ្គរាជទូតកម្ពុជា ប្រចាំប្រទេសម៉ាឡេស៊ី សម្ដេចរាជបុត្រី ព្រះអនុជ អរុណរស្មី មានបន្ទូលថា បើស្ត្រីមិនមានតួនាទីខ្ពស់ក្នុងជួររដ្ឋាភិបាលទេ ស្ត្រីនឹងគ្មានឱកាសលើកស្ទួយស្ត្រីឲ្យមានឱកាសច្រើនដូចបុរសទេ។
មិនខុសគ្នាទេ ក្នុងក្បួនឃោសនាលោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច បានឲ្យម្ចាស់ឆ្នោតដឹងថា បើហ៊្វុនស៊ិនប៉ិច ឈ្នះការបោះឆ្នោត បក្សរាជានិយមមួយនេះនឹងមានឱកាសបន្តអនុវត្តនូវគោលនយោបាយ សីហនុនិយម ក្នុងសម័យសង្គមរាស្ត្រនិយម។ លោកសន្យាថា បន្ទាប់ពីគណបក្សហ៊្វុនស៊ិនប៉ិច ឈ្នះការបោះឆ្នោត បក្សខ្លួននឹងអនុវត្តការដឹកនាំប្រទេសឲ្យដូចសម័យសង្គមរាស្ត្រនិយម ជំរុញឲ្យសង្គមជាតិមានសន្តិភាព និងមានស្ថិរភាពគ្រប់វិស័យ។ លោកថា សម័យសង្គមរាស្ត្រនិយម ប្រទេសជាតិមានការរីកចម្រើន គ្មានអំពើហិង្សា គ្មានអំពើពុករលួយ គ្មានអយុត្តិធម៌ សង្គមគ្មានសកម្មភាពបណ្ដេញពលរដ្ឋពីដីធ្លី និងមានការគោរពសិទ្ធិមនុស្ស។
លោក ញឹក ប៊ុនឆៃ បញ្ជាក់ថា បើបក្សហ៊្វុនស៊ិនប៉ិច ឈ្នះការបោះឆ្នោតសភាអាណត្តិទី៥ មន្ត្រីរាជការ លោកគ្រូអ្នកគ្រូ និងកងកម្លាំងប្រដាប់អាវុធ នឹងទទួលបានប្រាក់បៀវត្សសមរម្យ។ ក្រៅពីនេះ លោក ញឹក ប៊ុនឆៃ ឲ្យដឹងថា គោលនយោបាយគណបក្សហ៊្វុនស៊ិនប៉ិច ក្នុងការដឹកនាំប្រទេស គឺមិនប្រកាន់បក្ខពួកប្រកាន់យកនយោបាយបង្រួបបង្រួម និងផ្សះផ្សាជាតិ មិនប្រកាន់និន្នាការនយោបាយបក្សណាមួយនោះទេ។
ក្បួនឃោសនារបស់គណបក្សហ៊្វុនស៊ិនប៉ិច ក្នុងរាជធានីភ្នំពេញ និងនៅតាមខេត្តផ្សេងៗ បានប្រព្រឹត្តទៅដោយរលូន និងមានម្ចាស់ឆ្នោតអបអរសាទរគួរជាទីមោទនៈ។ លោក ញឹក ប៊ុនឆៃ មានជំនឿថា ម្ចាស់ឆ្នោតនឹងបន្តបោះឆ្នោតគាំទ្រហ៊្វុនស៊ិនប៉ិច ទៀត ក្នុងការបោះឆ្នោតសភាអាណត្តិទី៥។
ទាក់ទិនបញ្ហានេះ គណៈកម្មាធិការជាតិរៀបចំការបោះឆ្នោត (គ.ជ.ប) បានបង្ហាញថា គ្មានអំពើហិង្សាណាមួយកើតឡើងគួរឲ្យកត់សម្គាល់ទេក្នុងរយៈពេល ៥ថ្ងៃ នៃថ្ងៃបើកយុទ្ធនាការឃោសនាបោះឆ្នោតរបស់គណបក្សនយោបាយ។
លោក ទេព នីថា អគ្គលេខាធិការ គ.ជ.ប បានឲ្យដឹងថា លោកបានអំពាវនាវឲ្យគ្រប់គណបក្សនយោបាយបានចុះបញ្ជីចូលរួមប្រកួតការបោះឆ្នោត ត្រូវចូលរួមគោរពច្បាប់បោះឆ្នោតឲ្យបានត្រឹមត្រូវ និងជៀសឲ្យផុតពីអំពើហិង្សាផ្សេងៗ។
ចំណែកលោកបណ្ឌិត ហង្ស ពុទ្ធា ជានាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរីនៅកម្ពុជា និចហ្វិក (NICFEC)។ លោកបានទទួលស្គាល់ថា យុទ្ធនាការឃោសនាបោះឆ្នោតរបស់គណបក្សនយោបាយប៉ុន្មានថ្ងៃមកនេះ បានកើតមានភាពមិនប្រក្រតីមួយចំនួន ប៉ុន្តែបញ្ហាមិនធ្ងន់ធ្ងររហូតមានអំពើហិង្សាទេ។
យុទ្ធនាការឃោសនាបោះឆ្នោតសភាអាណត្តិទី៥ ចាប់ផ្ដើមពីថ្ងៃទី២៧ ខែមិថុនា ដល់ថ្ងៃទី២៦ ខែកក្កដា ឆ្នាំ២០១៣។ រីឯថ្ងៃបោះឆ្នោតនឹងចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣។ ការបោះឆ្នោតនេះមានគណបក្សនយោបាយចំនួន៨ បានចុះឈ្មោះចូលរួមប្រកួតប្រជែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។