នាយករដ្ឋមន្ត្រីវៀតណាម លោក ង្វៀន ស៊ុងហ៊្វុក (Nguyen Xuan Phuc) បានស្នើឲ្យកម្ពុជា ផ្តល់ការយកចិត្តទុកដាក់ដល់ពលរដ្ឋ និងពាណិជ្ជករវៀតណាម ដើម្បីអាចរស់នៅ និងប្រកបរបររកស៊ីនៅកម្ពុជា ឲ្យបានរឹងប៉ឹង។ វៀតណាម យល់ថា ជំនួយរបស់រដ្ឋាភិបាលកម្ពុជា នេះ នឹងពង្រឹងទំនាក់ទំនងទ្វេភាគីរវាងប្រទេសទាំងពីរ។
សារព័ត៌មានវៀតណាម ឈ្មោះ ទួយ ជែរ ញូវ (Tuoi Tre News) បានចុះផ្សាយកាលពីថ្ងៃច័ន្ទ ទី១០ មករា ថា ក្នុងជំនួបលោក ង្វៀន ស៊ុងហ៊្វុក(Nguyen Xuan Phuc) ជាមួយលោក ស ខេង រដ្ឋមន្ត្រីក្រសួងមហាផ្ទៃ ក្នុងទីក្រុងហាណូយ (Hanoi) ប្រទេសវៀតណាម ហើយមេដឹកនាំរដ្ឋាភិបាលវៀតណាម រូបនេះ ក៏បានជំរុញឲ្យមានការបង្កើនការផ្លាស់ប្ដូរបទពិសោធន៍រវាងកងសន្តិសុខសណ្ដាប់ធ្នាប់សាធារណៈគ្រប់កម្រិតនៃប្រទេសទាំងពីរ តាមរយៈកិច្ចសហការលើយន្តការដែលមានស្រាប់។
នាយករដ្ឋមន្ត្រីវៀតណាម រូបនេះបញ្ជាក់ទៀតថា ប្រទេសទាំងពីរត្រូវបន្តគោលការណ៍មិនអនុញ្ញាតឲ្យកម្លាំងប្រឆាំងទាំងឡាយណាប្រើប្រាស់ទឹកដីនៃប្រទេសណាមួយ ដើម្បីរំខានដល់សន្តិសុខ សន្តិភាព និងស្ថិរភាពរបស់ប្រទេសដទៃនោះឡើយ។ លោកបន្តថា វៀតណាម និងកម្ពុជា ត្រូវតែបន្តការរួបរួម និងសហប្រតិបត្តិការគ្នាគ្រប់កាលៈទេសៈទាំងអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។